Varaha Purana · Chapter 169

śrīvarāha uvāca //
mathurāyāḥ paraṃ kṣetraṃ trailokye na ca vidyate //
tasyāṃ vasāmyahaṃ devi mathurāyāṃ ca sarvadā

sarveṣāmeva tīrthānāṃ mathurā ca paraṃ mahat //
kṛṣṇena krīḍitaṃ tatra tacchuddhaṃ hi pade pade

cakrasthitaṃ hi tatsarvaṃ kṛṣṇasyaiva padena tu //
tatra madhyaṃ tu tatsthānamarddhacandre pratiṣṭhitam

tatraiva vāsino lokā muktiṃ yānti na saṃśayaḥ //
kṛṣṇasya dakṣiṇā koṭiruttarā koṭimadhyataḥ

tayormadhye sthito deva ākārātsomacakratā //
tau devau kṣetraphaladau snānadānādikarmaṇi

tasmāddhi maraṇaṃ cātra dve koṭī sarvakarmasu //
arddhacandre tu yaḥ snānaṃ karoti niyatāśanaḥ

tena vai cākṣayā lokāḥ prāptāścaiva na saṃśayaḥ //
dakṣiṇasyāṃ samārabhya uttarasyāṃ samāpayet //
yajñopavītamātreṇa trāyante ca kulaṃ bahu

pṛthivyuvāca //
yajñopavīta mātrāyā vidhānaṃ kīdṛśaṃ prabho

yathāmānaṃ hi kartavyaṃ tatsarvaṃ vaktumarhasi //
śrīvarāha uvāca //
yajñopavītasya vidhiṃ śṛṇuṣva varavarṇini

dakṣiṇasyāṃ samārabhya uttarasyāṃ samāpayet //
yajñopavītasya vidhireṣa eva prakārtitaḥ

manujā yena vidhinā muktiṃ yānti na saṃśayaḥ //
anena vidhinā caiva uttarasyāṃ samāpayet //
gṛhānniḥsṛtya maunena yāvatsnānaṃ samācaret

pūjāṃ kṛṣṇasya kṛtvā vai tato brūyādvasundhare //
snāne samāpte vidhivaddevadevasya caiva hi

kṛṣṇasya kṛtvā tu makhaṃ snānādīni yathākramam //
gāṃ vai payasvinīṃ dattvā hiraṇyaṃ vasu caiva hi

brāhmaṇānbhojayetpaścādvidhireṣa udāhṛtaḥ //
tathā śayanamuddiśya evamevaṃ tu kārayet

na tasya punarāvṛttirmama loke mahīyate //
arddhacandre mṛtā devi mama lokaṃ vrajanti te

anyatra tu mṛtā ye ca ardhacandrakṛtakriyāḥ //
te'pi svargaṃ gamiṣyanti dāhādikaraṇairyutāḥ

yāvadasthīnyarddhacandraṃ yasya tiṣṭhanti dehinaḥ //
tāvatsupuṇyakarttā ca svargaloke mahīyate

arddhacandre viśeṣo'sti tīrthe viśrāntisaṃjñake //
dāhādikaraṇe tatra gardabho'pi caturbhujaḥ

gartteśvaro'tha bhūteśo dve koṭī tu vasundhare //
madhye sadaiva tiṣṭhāmi na tyajāmi kadācana

māthurāṇāṃ ca yadrūpaṃ tadrūpaṃ me vasundhare //
māthureṇa tu tṛptena tṛpto'haṃ nātra saṃśayaḥ

śṛṇu devi yathāvṛttaṃ garuḍasya mahātmanaḥ //
mathurāmāgato yo'sau kṛṣṇadarśanakāṃkṣayā //
mathurāyāṃ sthitaṃ devaṃ bhinnarūpaṃ na paśyati

tadā gato'sau vasudhe devasyāgre vihaṃgamaḥ //
kṛṣṇasya darśanārthāya divyaṃ stotramudīrayan

garuḍa uvāca //
viśvarūpa jayāditya jaya viṣṇo jayācyuta //
jaya keśava īśāna jaya kṛṣṇa namo'stu te

jaya mūrta jayācintya jaya lokavibhūṣaṇa //
ityevaṃ saṃstuto devo garuḍena mahātmanā

garuḍasya purastatra sthito devaḥ śarīravān //
sāntvayāmāsa garuḍaṃ prītipūrvamuvāca ha

kiṃ kuryātstotrametanme kiṃ vā tava cikīrṣitam //
mathurāgamakṛtye te sarvaṃ brūhi mamāgrataḥ

garuḍa uvāca //
mathurāmāgataścāhaṃ tava darśanakāṃkṣayā //
āgate tu mayā deva na dṛṣṭaṃ tava rūpakam

māthuraireva lokaistu samaṃ dṛṣṭaṃ hi rūpakam //
ekībhūtamahaṃ sarvaṃ dṛṣṭvā māṃ moha āviśat

tasmātstutistu deveśa kṛtānugrahakāmyayā //
garuḍasya vacaḥ śrutvā prahasya madhusūdanaḥ

uvāca ślakṣṇayā vācā garuḍaṃ prati bhāvini //
śrīkṛṣṇa uvāca //
māthurāṇāṃ ca yadrūpaṃ tadrūpaṃ me vihaṃgama

ye pāpāste na paśyanti madrūpā māthurā dvijāḥ //
evamuktvā tataḥ kṛṣṇastatraivāntaradhīyata

garuḍo'pi tataḥ sthānādgato devi yathāsukham //
etatte kathitaṃ devi māthurāṇāṃ tu rūpakam

yeṣāṃ pūjitamātreṇa tuṣṭo'haṃ caiva sarvadā //
mathurāyāṃ mṛtā ye ca muktiṃ yānti na cānyathā

api kīṭaḥ pataṃgo vā tiryagyonigato'pi vā //
caturbhujāstu te sarve bhavantīti viniścitam

yaḥ paśyetpadmanābhaṃ tu dvādaśyāmāśvinasya tu //
ekadehadharau devau śivakeśavarūpiṇau

ekādaśyāṃ copavāsī kṛtaśaucaḥ samāhitaḥ //
kālindyāṃ tu naraḥ snāto muṃcate yonisaṃkaṭāt

caitrasya śukladvādaśyāmupoṣya snānamācaret //
cintāviṣṇuṃ samabhyarcya kṛtvā vai jāgaraṃ niśi

yaḥ karoti sa mucyeta nātra kāryā vicāraṇā //
ekānaṃśāṃ tato devīṃ yaśodāṃ devakīṃ tathā

mahāvidyeśvarīṃ devi mucyate brahmahatyayā //
yā dhārā dharmarājasya mathurāyāśca paścime

snānaṃ karoti tasyāṃ tu grahadāṣairna lipyate //
yaṃ yaṃ devamabhidhyāyedbhaktiyuktena cetasā

viśrāntisaṃjñakaṃ dṛṣṭvā dīrghaviṣṇuṃ ca keśavam //
sarveṣāṃ darśanaṃ puṇyaṃ pūjanāttu phalaṃ bhavet

iti japavidhihomadhyānakāle sa samyaksatatamabhisamīkṣya brahmaṇā yatprayuktam //
sakalaguṇagaṇānāmāspadaṃ brahmasaṃjñaṃ jananamaraṇahīnaṃ viṣṇumevābhiyāti

iti śrīvarāhapurāṇe prāgitihāse mathurāmāhātmyaṃ nāmaikonasaptatyadhikaśatatamo'dhyāyaḥ