Varaha Purana · Chapter 168

dharaṇyuvāca //
mathurāṃ rakṣate ko'sau kṣetrapālo vyavasthitaḥ //
tena dṛṣṭena yatpuṇyaṃ kathayasvākhilaṃ prabho

śrīvarāha uvāca //
dṛṣṭvā bhūtapatiṃ devaṃ varadaṃ pāpanāśanam //
tasya darśanamātreṇa mathurāyāṃ phalaṃ bhavet

purā varṣasahasraṃ tu tapastaptaṃ sudāruṇam //
pūrṇe varṣasahasre tu mayā santoṣito haraḥ

varaṃ varaya bhadraṃ te yaste manasi varttate //
īśvara uvāca //
sarvagastvaṃ hi deveśa mayā jñātaṃ suniścitam

mathurāyāṃ ca me sthānaṃ sadā deva pradīyatām //
devadeva vacaḥ śrutvā harirvacanamabravīt

mathurāyāṃ ca deva tvaṃ kṣetrapālo bhaviṣyasi //
tvayi dṛṣṭe mahādeva mama kṣetra phalaṃ bhavet

anyathā nāpnuyāt siddhimevametanna saṃśayaḥ //
yena yadyādṛśaṃ puṇyaṃ kṛtaṃ tīrthe prayatnataḥ

bhajate manujaḥ siddhimātmabhāvena tādṛśīm //
mama kṣetrapraveśe ca bhūmiḥ saṃsāranāśinī

indrasyaiva purī ramyā yathā nāke'marāvatī //
jambūdvīpe tathotkṛṣṭā mathurā mama vallabhā

viṃśatiryojanānāṃ hi māthuraṃ mama maṇḍalam //
pade pade'śvamedhānāṃ phalaṃ nātra vicāraṇā

na mayā kathitaṃ devi brahmaṇaśca mahātmanaḥ //
rudrasya na mayā pūrvaṃ kathitaṃ ca vasundhare

mayā sugopitaṃ pūrvaṃ guhyādguhyataraṃ param //
atra kṣetre purī ramyā sarvaratnavibhūṣitā

tasyāṃ tiṣṭhanti tīrthāni tāni vakṣyāmi tacchṛṇu //
ṣaṣṭikoṭisahasrāṇi ṣaṣṭikoṭiśatāni ca

tīrthasaṃkhyā ca vasudhe mathurāyāṃ mayoditā //
govarddhanaṃ tathākrūraṃ dve koṭī dakṣiṇottare

praskandanaṃ ca bhāṇḍīraṃ kurukṣetrasamāni ṣaṭ //
puṇyātpuṇyataraṃ śreṣṭhametadviśrāntisaṃjñakam

asikuṇḍaṃ savaikuṇṭhaṃ koṭitīrthottamaṃ smṛtam //
avimuktaṃ somatīrthaṃ yamanaṃ tindukaṃ tataḥ

cakratīrthaṃ tathākrūraṃ dvādaśādityasaṃjñitam //
etatpuṇyaṃ pavitraṃ ca mahāpātakanāśanam

kurukṣetrācchataguṇaṃ mathurāyāṃ na saṃśayaḥ //
ye paṭhanti mahābhāgāḥ śṛṇvanti ca samāhitāḥ

mathurāyāstu māhātmyaṃ te yānti paramaṃ padam//
kulāni te tārayanti dve śate viṃśayordvayoḥ

etanmaraṇakāle tu yaḥ smaretprayato naraḥ//
sa gacchetparamāṃ siddhimiha saṃsāranāśinīm

etatte kathitaṃ devi sarvapātakanāśanam //
tīrthānāṃ caiva māhātmyaṃ kimanyacchrotumicchasi

iti śrīvarāhapurāṇe bhagavacchāstre mathurāmāhātmye aṣṭaṣaṣṭyadhikaśatatamo'dhyāyaḥ