Varaha Purana · Chapter 154

atha yamunātīrthaprabhāvaḥ //
varāha uvāca //
evaṃvidhāṃ ca mathurāṃ dṛṣṭvā tau mudamāpatuḥ //
evaṃ tu vasatastasya rājñastatra vasundhare

papraccha ca tadā bhāryā yadguhyaṃ pūrvabhāṣitam //
purasthena tadā rājñā vakṣyāmi mathurāṃ prati

//
tanme vada mahārāja yadgopyaṃ pūrvabhāṣitam //
rājāpyuvāca tāṃ rājñīṃ tvayāpyuktaṃ purā mama

tadvadasva svakaṃ guhyaṃ paścādvakṣyāmyahaṃ tava //
ityuktvā pīvarī jñātvā prahasya tu guṇālayā

provāca caiva rājānaṃ manasaḥ prītikāraṇam //
ahaṃ tu pīvarī nāma gaṃgātīranivāsinī

āgatemāṃ purīṃ draṣṭuṃ kumudasya tu dvādaśīm //
nāvamāruhya yāntīha patitā yamunājale

sadyaḥ prāṇairviyuktā ca tattīrthasya prabhāvataḥ //
kāśīrājapateḥ kanyā yātāsmi vasudhādhipa

tvayā vivāhitā rājanna ca māṃ vijahātsmṛtiḥ //
etattīrthaprabhāveṇa dharmayuktā tathā'nagha

dhārāpatanake tīrthe tyaktvā jīvitamātmanaḥ//
etacchrutvā tato rājā kathāṃ prāgjanmasambhavām

svāṃ cāpyakathayattasyai yathā saṃyamane mṛtaḥ //
evaṃ tau mathurāṃ prāpya snātvā yāmunatīrthake

māṃ paśyantau niyamatastatraiva nidhanaṃ gatau //
mṛtau sarvaparityaktau gatau mama salokatām

etatte kathitaṃ devi āścaryaṃ yadabhūnmahat //
tyaktvā cātmatanuṃ tīrthe dhārāpatanasaṃjñake

nākalokamavāpnoti tyaktapāpo na saṃśayaḥ //
yamuneśvaramāsādya tyaktvā jīvitamātmanaḥ

viṣṇulokamavāpnoti divyamūrtiścaturbhujaḥ //
dhārāpatanake snātvā nākaloke sa modate

athātra muṃcate prāṇānmama lokaṃ sa gacchati //
ataḥ paraṃ nāgatīrthaṃ tīrthānāmuttamottamam

yatra snātvā divaṃ yānti ye mṛtāste'punarbhavāḥ //
ghaṇṭābharaṇakaṃ tīrthaṃ sarvapāpapramocanam

/
yasminsnāto naro yāti sūryalokaṃ na saṃśayaḥ //
athā'tra muṃcate prāṇānmama lokaṃ sa gacchati

punaranyat pravakṣyāmi tacchṛṇuṣva vasundhare //
tīrthānāmuttamaṃ tīrthaṃ brahmalokeṣu viśrutam

tatra snātvā ca pītvā ca niyato niyatāśanaḥ //
brahmaṇā samanujñāto mama lokaṃ sa gacchati

somatīrthe tu vasudhe pavitre yamunāmbhasi //
yatra paśyati māṃ somo dvāpare yugasaṃsthite

tatrābhiṣekaṃ kurvīta svakarmapariniṣṭhitaḥ //
modate somaloke tu evameva na saṃśayaḥ

athātra muṃcate prāṇānmama lokaṃ sa gacchati //
sarasvatyāśca patanaṃ sarvapāpaharaṃ śubham

tatra snāto naro devi avarṇo'pi yatirbhavet //
punaranyatpravakṣyāmi māthure mama maṇḍale

yastatra kurute snānaṃ trirātropoṣito naraḥ//
snānamātreṇa manujo mucyate brahmahatyayā

athātra muṃcate prāṇānmama lokaṃ sa gacchati //
daśāśvamedhamṛṣibhiḥ pūjitaṃ sarvadā mudā

tatra ye snānti niyatāsteṣāṃ svargo na durlabhaḥ //
mathurāpaścime pārśve satataṃ tvṛṣipūjitam

brahmaṇā sṛṣṭikāle tu manasā nirmitaṃ purā //
mānasaṃ nāma tīrthaṃ tu ṛṣibhiḥ pūjitaṃ purā

tatra snātvā divaṃ yānti ye mṛtāste'punarbhavāḥ //
tīrthaṃ tu vighnarājasya puṇyaṃ pāpaharaṃ śubham

yatra snātānmanuṣyāṃśca vighnarājo na pīḍayet //
aṣṭamyāṃ ca caturdaśyāṃ caturthyāṃ tu viśeṣataḥ

tasmiṃstīrthavare snātaṃ na pīḍayati vighnarāṭ //
vidyārambheṣu sarveṣu yajñadānakriyāsu ca

avighnaṃ kurute tasya satataṃ pārvatīsutaḥ //
tatrātha muñcate prāṇānmama lokaṃ sa gacchati

tataḥ pare koṭitīrthe pavitraṃ paramaṃ smṛtam //
tatra vai snānamātreṇa gavāṃ koṭiphalaṃ labhet

tathātra muñcate prāṇām̐llobhamohavivarjitaḥ //
somalokamatikramya mama lokaṃ ca gacchati

ataḥ paraṃ śivakṣetramarddhakrośaṃ tu duṣkaram //
tatra sthito haro devo mathurāṃ rakṣate sadā

tatra snātvā ca pītvā ca māthuraṃ labhate phalam //
athā'tra muñcate prāṇānmama lokaṃ sa gacchati

iti śrīvarāhapurāṇe mathurāmāhātmye yamunātīrthaprabhāvo nāma catuṣpañcāśadadhikaśatatamo'dhyāyaḥ