Varaha Purana · Chapter 147

atha goniṣkramaṇamāhātmyam//
dharaṇyuvāca //
atyāścaryaṃ śrutaṃ hyetadrurukṣetrasamudbhavam //
hṛṣīkeśasya mahimā tvayā ya upavarṇitaḥ

anyacca yatparaṃ guhyaṃ kṣetraṃ paramapāvanam //
vaktumarhasi deveśa paraṃ kautūhalaṃ mama

śrīvarāha uvāca //
śṛṇu bhūme prayatnena kāraṇaṃ paramaṃ mama //
guhyamastyaparaṃ caiva himaśṛṅga śiloccaye

goniṣkramaṇakaṃ nāma gāvo yatra pratāritāḥ //
yathā niṣkramaṇaṃ prāpya surabhīṇāṃ vasundhare

saptatiryatra kalpāni aurvo yatra prajāpatiḥ //
tapaścacāra paramaṃ mama māyābalānvitaḥ

tasyaivaṃ varttamānasya yāti kāle mahattare //
evaṃ hi tapyamānasya sarvalokasya saṃśayaḥ

na varaṃ prārthayatyeṣa lābhālābhasamanvitaḥ //
sūcako'pi na vidyeta balikarmasu saṃyataḥ

atha dīrghasya kālasya kaścidbrahmayatistadā //
tapastapasyati munau tasminśailoccaye dhare

īśvaro'pi mahābhāge tatpārśvaṃ samupāgataḥ //
goniṣkrameti vikhyāte tasmiṃstīrthe mahaujasi

tatra tvaurvo mahābhāge tapyate samadarśanaḥ //
padmānāṃ kāraṇādaurvo gaṃgādvāramupāgataḥ

tannirgataṃ tato jñātvā aurvaṃ sarve tapasvinaḥ //
maheśvaro mahātejāḥ sambhramātsamupāgataḥ

phalapuṣpasamākīrṇā lakṣmīścaivopajāyate //
āśramaṃ rūpasampannaṃ phalapuṣpopaśobhitam

tacca vai bhasmasādbhūtaṃ mahārudrasya tejasā//
dagdhvā taṃ cāśramaṃ puṇyamauravasya sumahatpriyam

īśvaro'pi tataḥ prāptaḥ śīghrameva himālayam //
etasminnantare devi gṛhya puṣpakaraṇḍakam

āśramaṃ samanuprāpta aurvo'pi munipuṃgavaḥ //
śānto dāntaḥ kṣamāśīlaḥ satyavrataparāyaṇaḥ

dṛṣṭvā svamāśramaṃ dagdhaṃ bahupuṣpaphalodakam //
manyunā paramāviṣṭo duḥkhanetrapariplutaḥ

uvāca krodharaktākṣo vacanaṃ nirdahanniva //
yenaiṣa cāśramo dagdho bahupuṣpaphalodakaḥ

so'pi duḥkhena santaptaḥ sarvalokānbhramiṣyati //
evamaurveṇa datte tu śāpe tasminmahaujasi

mahābhayāttu lokānāṃ na kaścitparyavārayat //
tatkṣaṇādeva deveśi īśo'pi jagato vibhuḥ

mahādāhena santaptaḥ śambhurdevīmuvāca ha //
aurvasya tu tapo dṛṣṭvā bhītairdevairudāhṛtam

dahyate sma jagatsarvaṃ sa tu kiñcinna cecchati //
ko vā prati vidhistatra yathā sarvasya sambhavet

evamukte mayā krodhādīkṣitastasya cāśramaḥ //
dagdho'bhavatkṣaṇenaiva vayaṃ tasmādvinirgatāḥ

etadduḥkhena santapto manyunā ca pariplutaḥ //
aurvaḥ śaśāpa roṣeṇa tena taptā vayaṃ śive

tato'bhramadvirūpākṣaḥ śaṃ na prāpnoti karhicit //
ahaṃ ca paritapto'smi ātmatvādīśvarasya ca

tena dāhena santapto na śaknomi viceṣṭitum //
pārvatyā ca tataḥ proktaḥ āvāṃ nārāyaṇaṃ prati

gacchāvastasya vākyena sukhaṃ yatra bhaviṣyati //
tato nārāyaṇaṃ gatvā saha tena tamaurvakam

vijñāpayāmo rudrasya śāpo'yaṃ vinivarttatām //
santaptāḥ sma vayaṃ sarve tasmācchāpaṃ nivarttaya

aurvo'pyuvāca noktaṃ me anṛtaṃ tu kadācana //
surabhīgaṇamānīya gatvaitaṃ snāpayantu vai

rudraśāpo nivṛttaḥ syāttenaiva kila nānyathā //
etasminnantare devi mayā gāvo'vatāritāḥ

saptasaptatiḥ kalyāṇi saurabheyā mahaujasaḥ //
tenāplāvitadehāśca parāṃ nirvṛtimāgatāḥ

tacca goniṣkramaṃ nāma tīrthaṃ paramapāvanam //
tatra snānaṃ tu kurvīta ekarātroṣito naraḥ

golokaṃ ca samāsādya modate nātra saṃśayaḥ //
athātra muñcate prāṇānkṛtvā karma suduṣkaram

śaṃkhacakragadāyukto mama loke mahīyate //
paṃca dhārāḥ patantyatra mūle mūlavaṭasya hi

tatra snānaṃ prakurvīta paṃcarātroṣito naraḥ //
paṃcānāmapi yajñānāṃ phalamāpnoti mānavaḥ

athātra muñcate prāṇānkṛtvā karma suduṣkaram //
paṃcayajñaphalaṃ bhuktvā mama lokaṃ prapadyate

asti paṃcapadaṃ nāma tasminkṣetre paraṃ mama//
mama pūrveṇa pārśveṇa dṛḍhāḥ paṃca mahāśilāḥ

matpūrvāṃ diśamāśritya tatra brahmapadadvayam //
madhye tu tasya kuṇḍasya śilā vistīrṇasaṃśritā

ūrddhvaṃ nālaparīṇāhaṃ tatra viṣṇupadaṃ mama //
tatra snānaṃ tu kurvīta paṃcarātroṣito naraḥ

yāṃti śuddhāṃstu lokāṃste ye ca bhāgavatapriyāḥ //
athātra muñcate prāṇānyuktaḥ pañcapade naraḥ

vimuktaḥ sarvasaṃsārānmama lokaṃ ca gacchati //
tato brahmapadaṃ nāma kṣetraṃ guhyaṃ paraṃ mama

yatra dhārā patatyekā paścimāṃ diśamāśritā //
tatra snānaṃ tu kurvīta ekarātroṣito naraḥ

brahmalokamavāpnoti brahmaṇā saha modate //
kaumudasya tu māsasya śuklapakṣasya dvādaśī

yajñānāṃ vājapeyānāṃ phalaṃ prāpnoti mānavaḥ //
athātra muṃcate prāṇānmama karmasu niṣṭhitaḥ

vājapeyaphalaṃ bhuktvā mama lokaṃ prapadyate //
asti koṭivaṭaṃ nāma tasmin kṣetre paraṃ mama

paṃcakrośaṃ tato gatvā vāyavyāṃ diśi saṃsthitaḥ //
tatra snānaṃ tu kurvīta ṣaṣṭhakāloṣito naraḥ

bahuyajñasya koṭīnāṃ phalaṃ prāpnoti niṣkalam //
athātra muṃcate prāṇānbhūme koṭivaṭe śubhe

yajñakoṭiphalaṃ bhuktvā mama koṭiṃ prapadyate //
asti viṣṇusaro nāma tasmin kṣetre paraṃ mama

pūrvottareṇa pārśvena paṃcakrośaṃ na saṃśayaḥ //
matsaraḥ padmapatrākṣi āgādhaṃ parisaṃsthitam

paṃcakrośaśca vistāraḥ parvataḥ parimaṇḍalaḥ //
tatra bhramati yo bhadre kuryāccaiva pradakṣiṇam

upavāsaṃ trirātraṃ tu kṛtvā karma suduṣkaram //
yāvanti bhramamāṇasya padāni nanu sundari

tāvadvarṣasahasrāṇi brahmaloke mahīyate //
athā'tra muṃcate prāṇānsvakarmapariniṣṭhitaḥ

brahmalokaṃ samutsṛjya mama loke mahīyate //
tasmin kṣetre mahābhāge āścaryaṃ śṛṇu sundari

gavāṃ vai śrūyate śabdo mama karmasukhāvahaḥ //
athātra jyeṣṭhamāsasya śuklapakṣasya dvādaśī

śrūyate sumahāñchabdaḥ svayametanna saṃśayaḥ //
evaṃ gosthalake puṇye mahābhāgavataḥ śuciḥ

karoti śubhakarmāṇi śīghraṃ mucyeta kilbiṣāt //
evaṃ tena mahābhāge īśvareṇa yaśasvini

śāpadāho vinirmuktaḥ sarvaiḥ saha marudgaṇaiḥ//
etadgosthalakaṃ nāma sarvaśāntikaraṃ param

kathitaṃ devi kārtsnyena tavānugrahakāmyayā//
eṣo'dhyāyo mahābhāge sarvamaṅgalakārakaḥ

mama mārgānusārāṇāṃ mama ca prītivarddhanaḥ //
śreṣṭhānāṃ paramaṃ śreṣṭhaṃ maṅgalānāṃ ca maṅgalam

lābhānāṃ paramo lābho dharmāṇāṃ dharma uttamaḥ //
labhante paṭhamānā vai mama mārgānusāriṇaḥ

tejaḥ śriyaṃ ca lakṣmīṃ ca sarvakāmānyaśasvini //
yāvanti cākṣarāṇi syuratrādhyāye manasvini

tāvadvarṣasahasrāṇi mama loke mahīyate //
patanaṃ ca na vidyeta paṭhamāno dine dine

tāritāni kulānyebhiḥ sapta sapta ca sapta ca //
piśunāya na dātavyaṃ na mūrkhāya śaṭhāya ca

deyaṃ putrāya śiṣyāya yaśca jānāti sevitum //
etanmaraṇakāle tu na kadācittu vismaret

ślokaṃ vā yadi vā pādaṃ yadīcchetparamāṃ gatim //
tatkṣetraṃ tu mahābhāge paṃcayojanamaṇḍalam

tiṣṭhāmi parayā prītyā diśaṃ pūrvāmupāśritaḥ //
paścimena vahedgaṅgāṃ niṣkāmena vasundhare

evaṃ rahasyaṃ guhyaṃ ca sarvakarmasukhāvaham //
etatte paramaṃ bhadre guhyaṃ dharmasamanvitam

mama kṣetraṃ mahābhāge yattvayā paripṛcchitam

iti śrīvarāhapurāṇe bhagavacchāstre goniṣkramaṇa māhātmyaṃ nāma saptacatvāriṃśadadhikaśatatamo'dhyāyaḥ