Varaha Purana · Chapter 148

atha stutasvāmimāhātmyam //
sūta uvāca //
goniṣkramaṇamāhātmyaṃ śrutvā guhyamanuttamam //
vismayaṃ paramaṃ gatvā sarvaratnavibhūṣitā

dharaṇyuvāca //
aho gavāṃ hi māhātmyaṃ tava caivaṃ śrutaṃ mayā //
yacchrutvā'haṃ jagannātha jātāsmi parinirvṛtā

evameva paraṃ guhyaṃ brūhi nārāyaṇa prabho //
asmātkṣetrātparaṃ deva yadi kṣetraṃ viśiṣyate

śrīvarāha uvāca //
ahaṃ nārāyaṇo devaḥ sarvadharmavyapāśrayaḥ //
mātsaryaṃ caiva me nāsti tenāhaṃ paramaḥ prabhuḥ

etacchāstraṃ mahābhāge prayuktaṃ līlayā mayā //
varāharūpamādāya sarvabhāgavatapriyam

dharaṇyuvāca //
yathā yathā bhāṣasi dharmakāraṇamidaṃ vaco dharmaviniścayaṃ mahat //
tathā tathā deva varā'prameyaṃ hṛdyaṃ mano bhāvayase janārdana

tato mahīvacaḥ śrutvā dharmaśreṣṭhī mahāmanāḥ //
varāharūpī bhagavānpratyuvāca vasundharām

śrīvarāha uvāca //
sādhu bhūme mahābhāge mama karmavyavasthite //
kathayiṣyāmyahaṃ hyevaṃ guhyaṃ lokasukhāvaham

stutasvāmīti vikhyātaṃ guhyaṃ kṣetraṃ paraṃ mama //
hyaparaṃ yugamāsādya tatra sthāsyāmi sundari

putro'haṃ vasudevasya devakyā garbhasambhavaḥ//
vāsudeva iti khyātaḥ sarvadānavasūdanaḥ

pañca tasya suśiṣyāśca bhaviṣyanti vicakṣaṇāḥ //
ṛṣayo dharmasaṃyuktā matprasādādbalāśritāḥ

te māṃ saṃsthāpayiṣpanti dharmamūrttiṃ mahīṃ gatam //
śāṇḍilyo jājaliścaiva kapilaścopasāyakaḥ

bhṛguścaiva mahābhāge mama māgārnusāriṇaḥ //
te ca prasannamanasa ātmadṛṣṭāntadarśinaḥ

svayaṃ jñānaprabhāveṇa bhāsayiṣyanti māṃ sadā//
saṅkarṣaṇo vāsudevo pradyumno hyaniruddhakaḥ

gacchatā bahukālena mama karmaparāyaṇaḥ //
tato dīrgheṇa kālena ijyāpūrvasthitena ca

varaṃ teṣāṃ pradāsyāmi yo yasya hṛdi saṃsthitaḥ //
te pravakṣyanti māṃ devi ātmaśāstravyavasthitāḥ

ātmaśāstraṃ pratiṣṭheta yatra dharmaḥ suniṣṭhitaḥ //
bhavatvetanniścayena na tu mithyā kadācana

tava deva prasādena ihalokaḥ pravartatām //
tānapyevaṃ vadiṣyāmi śiṣyāya bhavatāṃ priyam

bhaviṣyati na saṃdeho yato yūyaṃ mama priyāḥ //
suśiṣyā bāḍhamityevaṃ bhaviṣyanti na saṃśayaḥ

tadete pravadiṣyanti sarvabhāgavatapriyam //
yathā ca mathyamānādvai dadhnaścoddhriyate ghṛtam

evaṃ sarveṣu śāstreṣu vārāhaṃ ghṛtasammitam //
vārāhaṃ jñānamutsṛjya mahābhāgaṃ mahaujasam

evaṃ samaṃ mayā caiva hyātmanā paribhāṣitam //
te praṇāmaṃ kariṣyanti siddhiṃ prāpsyanti vai parām

mahājñānamidaṃ sūkṣmaṃ bhūme bhakteṣu dṛśyate //
śāstrāṇāṃ paramaṃ śāstraṃ sarvasaṃsāramokṣaṇam

kiñcidanyatpravakṣyāmi tacchṛṇuṣva vasundhare //
śāstrametanmahābhāge sdhūlakarma mahaujasam

kecittaranti jñānena kecitkarmaṇi niṣṭhitāḥ //
kecidyatheṣṭaṃ suśroṇi keciddānena karmaṇā

kecidyogabalaṃ bhuktā paśyanti mama saṃsthitam //
vidhipūrvaṃ tu me kiñcinnarāḥ paśyanti niṣṭhitāḥ

sarvadharmakarāḥ kecitsarvāśāḥ sarvavikrayāḥ //
te māṃ paśyanti vai bhūme ekacitta vyavasthitāḥ

evametanmahāśāstraṃ devi saṃsāramokṣaṇam //
mama bhaktavyavasthāyai prayuktaṃ paramaṃ priyam

te tathā ca pravakṣyanti yacca yasyābhirocate //
anyathānyasya dṛṣṭānāmṛṣibhiryatprayojitam

tadyugasya prabhāveṇa bhūme kurvanti mānavāḥ //
taiḥ svaśiṣyaiḥ samaṃ devi ye śāstraviniyojitāḥ

matprasādena te sarve siddhiṃ yāsyanti matparām //
mama śiṣyeṣu yeṣāṃ ca mātsaryopahatātmanām

macchāstre ca bhaveddoṣasteṣāmatra punarbhavaḥ //
mātsaryaṃ ye ca kurvanti maddharmaparame jane

teṣāṃ nāyaṃ paro loko mātsaryopahatātmanām //
anyacca te pravakṣyāmi tacchṛṇuṣva vasundhare

mama mārgānusāreṇa paraṃ guhyaṃ mama priye //
śāstravanto vinītāśca bahudoṣavivarvitāḥ

te tu mātsaryardoṣeṇa naṣṭācārāḥ patantyadhaḥ //
mātsaryaṃ sarvanāśāya mātsaryaṃ dharmanāśakam

yastu mātsaryasaṃyukto na sa paśyati māṃ kvacit //
bahukarmasamāyuktā dānādhyayananiṣṭhitāḥ

tapasā jñānayuktā vā nityaṃ karmasu codyatāḥ //
anena hi svabhāvena mātsaryaṃ caiva kurvate

na te paśyanti māṃ bhūme māyayā paridūṣitāḥ //
na karttavyaṃ tataḥ sarvairmātsaryaṃ dharmaghātakam //
mama śāstrapareṇeha yadīcchetparamāṃ gatim

etadguhyaṃ mahābhāge na jānanti manīṣiṇaḥ //
mātsaryasya tu doṣeṇa bahavo nidhanaṃ gatāḥ

etacchāstraṃ mahābhāge prayuktaṃ vidhinā mayā //
varāharūpamādāya sarvabhāgavatapriyam

tatrāścaryaṃ mahābhāge śṛṇu bhūtagirau mama //
āyasī pratimā tatra hyabhedyā caiva dṛśyate

bruvanti kecitkāṃsyeti āyasītyapare'bruvan //
pāṣāṇītyapare kecidanye vajramayīti ca

ūrddhvaṃ vā yadi vā'dho vā ye kurvanti mamārcanam //
tathāpi māṃ saṃspṛśanti śiromadhye tu sundari

ye tu paśyanti māṃ bhūme maṇipūragirau sthitam //
stuvantyācāryavantaśca matprasādatsu saṃyatāḥ

ācāryāṇāṃ guṇānbhuktvā mama karmapathe sthitāḥ //
sarvakilbiṣamuktāśca yānti te paramāṃ gatim

tasminkṣetre mahābhāge asti guhyaṃ paraṃ mama //
paṃcārumeti vikhyātamuttarāṃ diśamāśritam

tatra snānaṃ prakurvīta paṃcakāloṣito naraḥ //
modate nandane divye hyapsarobhiḥ samākule

athātra muṃcate prāṇānkṛtakṛtyo bhavennaraḥ //
nandanaṃ vanamutsṛtya mama lokaṃ ca gacchati

bhṛgukuṇḍeti vikhyātamatra guhyaṃ paraṃ mama //
mama dakṣiṇapārśve tu adūrādardhayojanāt

tatra snānaṃ tu kurvīta mama mārgānusārakaḥ //
bhūpṛṣṭhe na tu jāyeta kālena vijitendriyaḥ

dhruvo yatra tu tiṣṭheta meruśṛṃge śiloccaye //
tatra modati suśroṇi apsarobhiryathāsukham

athātra muṃcate prāṇān mama karmapathe sthitaḥ //
dhruvalokaṃ parityajya mama loke mahīyate

maṇikuṇḍeti vikhyātaṃ tatra guhyaṃ paraṃ mama //
maṇayo yatra dṛśyante anekālayasaṃsthitāḥ

agādhaṃ taṃ hṛdaṃ bhadre devānāmapi durlabham //
vismayaṃ kiṃ punastatra malayaścaṃcalaḥ sthitaḥ

tatra snānaṃ prakurvīta paṃcakāloṣito naraḥ //
ratnabhāgī bhavedvīro rājalakṣaṇasaṃyutaḥ

athātra muṃcate prāṇānmama karmapathe sthitaḥ //
chittvā vai sarvasaṃsāraṃ mama lokaṃ prapadyate

suguhyaṃ pūrvapārśvena mama kṣetrasya sundari //
adūratastrikośena parimāṇaṃ vidhīyate

tatra snānaṃ tu kurvīta mama lokaṃ sa gacchati //
dhūtapāpeti vikhyātaṃ tatra guhyaṃ paraṃ mama

paṃcakrośādadūrādvai mama kṣetrasya paścime //
tatra kuṇḍaṃ mahābhāge mama tadrocate jalam

suvarṇābhaṃ mārakatamagādhaṃ nirmitaṃ mayā //
tatra snānaṃ prakurvīta paṃcabhaktoṣito naraḥ

dhunvāno duṣkaraṃ karma paṃcabhūtātmaniṣṭhitam //
kṛtodakastatra bhadre dhūtapāpo yaśasvini

gatvendralokaṃ suśroṇi devaiḥ saha sa modate //
athātra muṃcate prāṇānmama karmaparāyaṇaḥ

indralokaṃ parityajya mama lokaṃ prapadyate //
tatrāścaryaṃ mahābhāge dhūtapāpe śṛṇuṣva me

varttate ca viśālākṣi maṇipūre girau mama //
tāvanna patate dhārā yāvatpāpaṃ na dhūyate

dhūte pāpe ca suśroṇi dhārā ca patati kṣitau //
evaṃ tatra viśālākṣi vṛkṣamaśvatthamiśritam

dhūtapāpaṃ na praviśetpraviśatyamale nare //
tasminkṣetre varārohe samantātpaṃcayojane

yatra tiṣṭhāmyahaṃ devi paścimāṃ diśamāśritaḥ //
tatra cāmalakaṃ bhadre adūrādarddhayojanāt

mama caiva prabhāveṇa sarvakālaphalodayam //
tatra kaścinna jānāti pāpakarmā narādhamaḥ

bhaktaṃ bhāgavataṃ śuddhaṃ mama karmavyavasthitam //
upoṣya ca trirātrāṇi śraddadhāno jitendriyaḥ

tatra gatvā varārohe udite ca divākare //
atha madhyāhnavelāyāṃ yadi vā'staṃgate'pi vā

ekacittena gantavyaṃ dhṛtiṃ kṛtvā supuṣkalām //
yattatra labhate bhadre phalamāmalakaṃ śubham

paṃcarātreṇa labhate tasminbhūtagirau mama //
tato harivacaḥ śrutvā sā mahī saṃśitavratā

punarnārāyaṇaṃ tatra provāca vinayānvitā //
stutasvāmī śruto'si tvaṃ tattra sthānāni yāni ca

etannāmaniruktiṃ tvaṃ vaktumarhasi sāmpratam

śrīvarāha uvāca //
bhūme hitvā tu saṃsārānye cānye devakaṇṭakāḥ //
dvāpare yugamāsādya yatra sthāsyāmi sundari

tato'maraiśca brahmādyairbahubhirmantravādibhiḥ //
stutiṃ karttuṃ samārabdhaṃ maṇipūrāśritasya me

tato māṃ nārado devi asito devalastathā //
parvataśca mahābhāge mama bhaktyā vyavasthitaḥ

nāma kurvanti me tatra maṇipūragirau tataḥ //
stutasvāmīti vikhyātaṃ mama karmavyapāśritam

etatte kathitaṃ bhadre niruktikaraṇaṃ mayā //
tvayā pṛṣṭaṃ hi yadbhadre sarvabhāgavatapriyam

etatstutagirerdevi māhātmyaṃ kathitaṃ mayā //
dvāparaṃ yugamāsādya yatra sthāsyāmi sundari

etāni bhūme guhyāni tatra bhūtagirau mama //
śraddhadhānena marttyena śrotavyaṃ nātra saṃśayaḥ

etatte kathitaṃ bhadre sarvadharmavyapāśrayam //
śrīstutasvāmimāhātmyaṃ kimanyatparipṛcchasi

iti śrīvarāhapurāṇe bhagavacchāstre stutasvāmimāhātmyaṃ nāmāṣṭacatvāriṃśadadhikaśatatamo'dhyāyaḥ