Varaha Purana · Chapter 142

atha guhyakarmamāhātmyam //
sūta uvāca //
tato devavacaḥ śrutvā dharmakāmā vasundharā //
kṛtāñjalipuṭā bhūtvā prasādayati mādhavam

dharaṇyuvāca //
dāsyāṃ me praṇayaṃ kṛtvā vijñāpyaṃ śṛṇu mādhava //
mṛdunā ca svabhāvena vakṣyāmi tvāṃ janārdana

alpaprāṇabalā nāryo yattvayā paribhāṣitam //
aśaktāḥ sahituṃ hyetāḥ kṣudhātvanaśane'balāḥ

bhuñjamānā narā hyatra rajasā yāṃti śaṃ param //
annaṃ hyanugrahaṃ deva yena te karma saṃśritāḥ

tasyāstadvacanaṃ śrutvā mādhavyāḥ sa tu mādhavaḥ //
prahasya bhāvaśuddhātmā tata evamabhāṣata

śrīvarāha uvāca //
sādhu devi varārohe mama karmavyavasthite //
pṛṣṭo'haṃ paramaṃ guhyaṃ mama bhaktasukhāvaham

spṛṣṭā yā rajasā devi mama karmaparāyaṇā //
māṃ saṃspṛśantu tatrasthaṃ yatra tiṣṭhāmi sundari

yadi bhāvastadā kaścidbhojane kāyasādhane //
cittaṃ nyasya mayi kṣoṇi bhoktavyaṃ ca na saṃśayaḥ

na sā lipyati doṣeṇa bhuñjamānā rajasvalā//
añjaliṃ śirasā kṛtvā mayoktaṃ mantramuttamam

( anādimadhyāntamajaṃ purāṇaṃ rajasvalā devavaraṃ namāmi //)
tata etena mantreṇa bhuktvā devi rajasvalā //
karoti yāni karmāṇi na tairduṣyeta karhicit

snātvā sā tu mahābhāge paṃcamāttu dinātpunaḥ

yathārhaṃ kurute karma maccittā matparāyaṇā //
prāpnuyātpuruṣatvaṃ ca nyastasaṃsāracintanāt

dharaṇyuvāca //
puruṣā vā striyo vāpi na pumāṃso na vā striyaḥ //
kathaṃ doṣeṇa mucyante janmasaṃsārabandhanāt

śrīvarāha uvāca //
indriyāṇi nigṛhyātha cittamapyanuveśya ca //
mayi saṃnyāsayogena mama karmaparāyaṇaḥ

mama yogeṣu saṃnyāsamekacitto dṛḍhavrataḥ //
evaṃ kurvanmahābhāge striyo vā punnapuṃsakam

jñānasaṃnyāsayogaṃ vā yadīcchetparamāṃ gatim //
anyacca te pravakṣyāmi tacchṛṇuṣva vasundhare

mano buddhiśca cittaṃ ca te hyanīśāḥ śarīriṇām //
ekacittaṃ manaḥ kṛtvā jñānena pṛdhulocane

samacittaṃ prapadyante na te lipyanti mānavāḥ //
sarvabhakṣyāṇi bhakṣantaḥ peyāpeyāṃstathaiva ca

samaṃ cittaṃ mayi yadi tadā tasya na ca kriyā //
cittaṃ manaśca buddhiśca matsaṃsthaṃ ca samaṃ yadi

yatkiṃcitkurvataḥ karma padmapatramivāṃbhasi //
saṃyogānna ca lipyeta samatvādeva nānyathā

rātrindivaṃ muhūrtaṃ vā kṣaṇaṃ vā yadi vā kalā//
nimeṣaṃ vā truṭiṃ vātha devi cittaṃ samaṃ kuru

sadā divāniśoścaiva kurvantaḥ karmasaṅkaram //
te'pi yānti parāṃ siddhiṃ yadi cittaṃ vyavasthitam

jāgrataḥ svapato vāpi śṛṇvataḥ paśyato'pi vā //
yo māṃ citte ciṃtayati maccintasya ca kiṃ bhayam

durvṛttamapi cāṇḍālaṃ brāhmaṇaṃ cā'pathi sthitam //
taṃ tu devi praśaṃsāmi nānyacittaṃ kadācana

yajantaḥ sarvadharmajñā jñānasaṃskārasaṃskṛtāḥ //
mayi cittaṃ samādhāya mama karmaparāyaṇāḥ

ye matkarmāṇi kurvanti mayā hṛdi samāśritāḥ //
sukhaṃ nidrāṃ samādhāya svapantaḥ karmasaṃsthitāḥ

yeṣāṃ praśāṃtaṃ cittaṃ vai te'pi devi mama priyāḥ //
sarvamātmani karma svaṃ śubhaṃ vā yadi vā'śubham

prāpnuvanti ca duḥkhāni bhramaccittā narādhamāḥ //
cittaṃ nāśo hi lokasya cittaṃ mokṣasya kāraṇam

/
tasmāccittaṃ samādāya māṃ prapadyasva medini //
nyasya jñānaṃ ca yogaṃ ca ekacittā bhajasva mām

maccittaḥ satataṃ yo māṃ bhajeta niyatavrataḥ //
matpārśvaṃ prāpya paramaṃ madbhāvāyopapadyate

mayā caiva purā sṛṣṭaṃ prajārthena vasundhare //
māse māse tu gantavyamṛtukāle vyavasthitam

ekacittaṃ samādāya yadīcchettu mama priyam //
na gacchedyadi māse tu ṛtukālavyavasthitam

pitarastasya hanyante daśa pūrvā daśāparāḥ //
na tatra kāmalobhena mohena ca vasundhare

tyaktvānaṅgaṃ ca mohaṃ ca pitrarthāya striyaṃ vrajet //
dvitīyāṃ na spṛśennārīṃ lobhamohātkathaṃcana

na saṃspṛśettṛtīyāṃ tu caturthī na kadācana //
kṛte saṃbhogadharme tu kṛtakautukasaṃsthitaḥ

śayane na striyaṃ paśyedyadīcchecchuddhimuttamām //
kautuke kṛtakṛtye tu mama karmaparāyaṇaḥ

jalasnānaṃ tataḥ kuryādanyavastraparigraham //
apūrṇe ṛtukāle tu yo'bhigacchedrajasvalām

retaḥpāḥ pitarastasya evametanna saṃśayaḥ //
ekāṃ tu puruṣo yāti dvitīyāṃ kāmamohitaḥ

tṛtīyāṃ vā caturthīṃ vā tadā sa puruṣo'dhamaḥ //
sarvasyaiva tu lokasya samayo'yaṃ hi matkṛtaḥ

ṛtukāle tu sarvāsāṃ pitrarthaṃ bhoga iṣyate //
ṛtukālābhigāmī yo brahmacāryeva saṃmataḥ

na gacchati ca yaḥ krodhānmohādvā puruṣādhamaḥ //
ṛtau ṛtau bhrūṇahatyāṃ prāpnoti puruṣaścaran

anyacca te pravakṣyāmi tacchṛṇuṣva vasundhare//
jñānaṃ tu cittayogasya karmayogasya yatkriyā

karmaṇā yānti matsthānaṃ yānti madgānaniṣṭhitāḥ //
yānti yogavidaḥ sthānaṃ nāsti cānyā parā gatiḥ

jñānaṃ yogaṃ ca sāṃkhyaṃ ca nāsti cittavyapāśritam //
labhante puṣkalāṃ siddhiṃ mama mārgānusāriṇaḥ

yastu bhāgavato bhūtvā ṛtukāle vyavasthitaḥ //
vāyubhakṣastatastiṣṭhedbhūme trīṇi dināni ca

atha tatra caturthe tu dine prāpte vasundhare //
kṛtvā vai siddhikarmmāṇi na gacchatyaparāṇi ca

tataḥ snānena kurvīta śiraso malaśodhanam //
śuklāṃbaradharo bhūtvā cittaṃ kṛtvā samāhitam

tato buddhiṃ manaścaiva samaṃ kṛtvā vasundhare //
paścātkurvanti karmāṇi sadā te me hṛdi sthitāḥ

mama prāpaṇakaṃ kṛtvā tataḥ kurvanti bhojanam //
añjaliṃ śirasā kṛtvā mayoktaṃ karma sasmitam

tatra mantraḥ –
ādirbhavānguptamanantamadhyo rajasvalā deva vayaṃ namāmaḥ //
upoṣitāstrīṇi dināni caivaṃ muktau rataṃ vāsudevaṃ namāmaḥ

tata etena mantreṇa śuddhā bhūme rajasvalāḥ //
ye tu kurvanti karmāṇi snātāsnātāni bhāgaśaḥ

evaṃ duṣyati no devi nārī vā puruṣo'pi vā //
kurvanti mama karmāṇi te yathāvanmama priyāḥ

sarvāṇyanudinaṃ bhadre mama cittānusāriṇaḥ //
prāpnuyātpuruṣaḥ strī vā rajasā dūṣitā api

ekacittastato bhūtvā bhūme cendriyanigrahāt //
mama yogeṣṭasaṃnyāsaṃ yadīcchetparamāṃ gatim

evaṃ kurvanti ye nityaṃ striyaḥ puṃso napuṃsakam //
jñāne satyapyayogānāṃ mama karmasu karmaṇām

adyāpi māṃ na jānanti narāḥ saṃsārasaṃśritāḥ //
te vai bhūme vijānanti ye tadbhaktyā vyavasthitāḥ

mātāpitṛsahasrāṇi putradāraśatāni ca //
cakravatparivartante yanmohānmāṃ na jānate

ajñānenāvṛto loko mohena ca vaśīkṛtaḥ //
saṅgaiśca bahubhirbaddhastena cittaṃ na saṃnyaset

gacchatyanyatra mātā vai pitā cānyatra gacchati //
putrāścānyatra gacchanti dāsaścānyatra gacchati

jāyante cātmanaḥ sthāne svasvakarmasamudbhave //
jñānamūḍhā varārohe narāḥ saṃsāramohitāḥ

alpakālaparaṃ caiva māsasaṃvatsareti ca //
bhaviṣyanti punaḥ kṛtvā na me mūrtyā sahāsate

yasyaitadviditaṃ sarvaṃ nyāsayogaṃ vasundhare //
yoge nyasya sadātmānaṃ mucyate na ca saṃśayaḥ

ya etacchṛṇuyānnityaṃ kalyamutthāya mānavaḥ //
puṣkalāṃ labhate siddhiṃ mama lokaṃ ca gacchati

etatte kathitaṃ bhadre rahasyaṃ paramaṃ mahat//
tvayā pṛṣṭaṃ ca yaddevi mama bhaktasukhāvaham

iti śrīvarāhapurāṇe bhagavacchāstre guhyakarmamāhātmyavarṇanaṃ nāma dvācatvāriṃśadadhikaśatatamo'dhyāyaḥ