Varaha Purana · Chapter 141

atha badarikāśramamāhātmyam //
śrīvarāha uvāca //
tasminhimavataḥ pṛṣṭhe paraṃ guhyamataḥ śṛṇu //
badarīti ca vikhyātā devānāmapi durllabhā

na tatprāpnoti manujaḥ kṛtvā karma suduṣkaram //
prāpnuvanti ca bhaktā ye badarīṃ viśvatāriṇīm

durllabhaṃ tanmama kṣetraṃ himakūṭaśilātale //
yastatprāpnoti hi kṣetraṃ kṛtakṛtyo bhavennaraḥ

brahmakuṇḍamiti khyātamāste tatra śiloccaye //
himasaṃsthaṃ tathātmānaṃ kṛtvā tiṣṭhāmi mādhavi

snānaṃ karoti yastatra trirātropoṣito naraḥ //
agniṣṭomasya yajñasya phalaṃ prāpnoti mānavaḥ

muñcetprāṇāṃstatra yadi vrataniṣṭho jitendriyaḥ //
satyalokamatikramya mama lokaṃ ca gacchati

agnisatyapadaṃ nāma tasminkṣetre paraṃ mama //
śṛṅgatrayātpatantyatra dhārā musalasannibhāḥ

yastatra kurute snānaṃ trirātropoṣito naraḥ //
satyavādī bhaveddakṣo mama karmaparāyaṇaḥ

yastatra muñcate prāṇānyadi kṛtvā jalāśayam //
satyalokamatikramya mama loke sa modate

indralokamiti khyāto badaryāṃ ca mamāśramaḥ //
tatrāhaṃ devi śakreṇa niṣkalaṃ paritoṣitaḥ

tatra caiva tu śṛṅgebhyaḥ sthūladhārā patetpunaḥ //
sthūle śilātale tatra mama dharmo vyavasthitaḥ

snānaṃ karoti yastatra ekarātroṣito naraḥ//
satyavādī śucirbhūtvā satyaloke mahīyate

athātra muñcate prāṇānkṛtvā cānāśakaṃ vratam//
satyalokamatikramya mama lokeṣu tiṣṭhati //१ ३//
asti pañcaśikhaṃ nāma badaryāśramatīrthakam //
yatra dhārāḥ patantyatra paṃcaśṛṅgasamāśritāḥ

yastatra kurute snānaṃ paṃcasrotasi mānavaḥ //
aśvamedhaphalaṃ prāpya devaiśca saha modate

yadyatra muñcate prāṇān kṛtvā karma suduṣkaram //
svargalokamatikramya mama loke mahīyate

catuḥsrota iti khyātaṃ tasminkṣetre pare mama //
caturdhārāḥ patantyatra catasro diśa āśritāḥ

yastatra kurute snānamekarātroṣito naraḥ //
modate nākapṛṣṭhe tu mama bhaktaśca jāyate

atha prāṇānparityajya kṛtvā karma suduṣkaram//
nākapṛṣṭhamatikramya mama lokaṃ prapadyate

vedadhāramiti khyātaṃ tasminkṣetre pare mama //
yatra brahmamukhādbhraṣṭā vedāścatvāra eva ca

tatraiva himavatpṛṣṭhe catuḥśṛṅgādbṛhattarāḥ //
caturdhārāḥ patantyatra viṣamāśca śiloccaye

yastatra kurute snānaṃ catūrātroṣito naraḥ //
caturṇāmapi vedānāṃ grahaṇe kāraṇaṃ bhavet

athātra muñcate prāṇānmama karmapathe sthitaḥ/
devalokamatikramya mama lokaṃ pratiṣṭhate

dvādaśādityakuṇḍeti tasminkṣetre pare mama //
yatra te dvādaśādityā devi saṃsthāpitā mayā

tatra parvataśṛṃge tu sthūlamūle śilātale //
dvādaśa patanti dhārā mama karmasukhāvahāḥ

yastatra kurute snānaṃ yāṃ kāñciddvādaśīṃ yadi//
yatra te dvādaśādityāstatra gacchenna saṃśayaḥ

athātra muñcate prāṇānmama karmaṇi saṃsthitaḥ //
samatikramya cādityān mama loke mahīyate

lokapālamiti khyātaṃ tasminkṣetre pare mama//
tatra te lokapālāstu mayā saṃsthāpitāḥ purā

tatra parvatamadhye tu sthalakuṇḍaṃ bṛhanmama //
bhitvā parvatamudgīrṇaṃ yatra somasamudbhavaḥ

tatra snānaṃ tu kurvīta jyeṣṭhamāsasya dvādaśīm //
modate lokapāleṣu mama bhaktaśca jāyate

athātra muñcate prāṇānmama karmasu tatparaḥ //
lokapālānatikramya mama lokaṃ prapadyate

asti merorvaraṃ nāma tasmin guhyaṃ paraṃ mama //
tatra sthitena vai bhūme meruḥ saṃsthāpitaḥ svayam

dhārāstisraḥ patantyatra suvarṇasadṛśaprabhāḥ //
patettu tajjalaṃ bhūmau vyaktiṃ naivopalabhyate

yastatra kurute snānaṃ trirātropoṣito naraḥ //
modate meruśṛṃgeṣu mama bhaktaśca jāyate

atha tatra mṛto devi tasmin guhye pare mama //
merupṛṣṭhamatikramya mama lokaṃ tu gacchati

mānasodbhedamiti ca tatrānyattīrthamuttamam //
pṛthvīmudbhidya madhye tu jalaṃ gacchati satvaram

devā api na jānanti taṃ deśaṃ tatra saṃsthitam //
mānuṣā hi vijānanti bhūmyāṃ patati tajjalam

yastatra kurute snānamahorātroṣito naraḥ //
modate mānase divye mama bhaktaśca jāyate

asti pañcaśiraṃ nāma tasminguhyaṃ paraṃ mama //
brahmaṇā cchidyate yatra śiraścaiva mahādyuti

tatra vai paṃca kuṇḍāni sthūlaśīrṣaśiloccaye //
pañcātra śirasaḥ sthāne bahudhārāsamanvitāḥ

yatra tanmadhyamaṃ kuṇḍaṃ chinnameva svayambhuvā //
tatra raktajalā bhūmirdṛśyate dhārasaṃkulā

yastatra kurute snānaṃ paṃcarātroṣito naraḥ //
modate brahmalokastho mama bhaktaśca jāyate

tathātra muñcate prāṇān guhye pañcaśire mama //
jalacāṃdrāyaṇaṃ kṛtvā mama karmasu niṣṭhitaḥ

buddhimānmatimāṃścaiva rāgamohavivarjitaḥ //
brahmalokamatikramya mama lokaṃ sa gacchati

asti somābhiṣeketi tīrthamanyatparaṃ mama/
rājatve brāhmaṇānāṃ tu mayā somo'bhiṣecitaḥ

tatrāhaṃ toṣitastena atriputreṇa mādhavi //
navapañcakakoṭyastu kṛtvā karma suduṣkaram

prāptaśca paramāṃ siddhiṃ matprasādādvasundhare //
tadāyattaṃ jagatsarvaṃ vrīhayaḥ paramauṣadhīḥ

jāyate'sminpralīyaṃte skandendrāḥ samarudgaṇāḥ //
bhūme somamayaṃ sarvaṃ mama saṃsthaṃ bhaviṣyati

tatra somagirirnāma yatra dhārā patedbhuvi //
kuṇḍe'raṇye viśāle tu etatte kathitaṃ mayā

yastatra kurute snānaṃ trirātropoṣito naraḥ //
modate somalokeṣu evametanna saṃśayaḥ

athātra mriyate devi kṛtvā karma suduṣkaram //
somalokamatikramya mama lokaṃ prapadyate

asti corvaśikuṇḍeti guhyaṃ kṣetre paraṃ mama //
yatra caivorvaśī bhittvā dakṣiṇorumajāyata

tatra tapyāmyahaṃ devi devānāmapi kāraṇāt //
na māṃ kaścidvijānāti svātmāno hi vijānate

tato me tapyamānasya bahuvarṣavyatikramāt //
devā api na jānanti vajribrahmamaheśvarāḥ

ekaikena phalenā'tra badaryāṃ tu suniścitam //
bahuvarṣasahasraṃ tu tapaścīrṇaṃ mayā bhuvi

tatrāhaṃ daśa koṭyastu daśavarṣaṃ daśārbudam //
daśa bhūme tathānyāni padmāni tapasi sthitaḥ

tataste māṃ na paśyanti devā guhyapathe sthitam //
vismayaṃ paramaṃ jagmurdevā duḥkhaparāyaṇāḥ

ahaṃ paśyāmi sarvaṃ vai tapaḥsaṃstho vasundhare //
na māṃ sarve prapaśyanti yogamāyāsamāvṛtāḥ

tatastā devatāḥ sarvāḥ pratyūcuśca pitāmaham //
viṣṇunā ca vinā loke śāntiṃ naiva labhāmahe

devānāṃ tu vacaḥ śrutvā brahmā lokāpitāmahaḥ //
yogamāyāpaṭacchannaṃ kathayāmāsa māṃ tadā

tato devāḥ sagandharvāḥ siddhāśca paramarṣayaḥ //
tatra jagmurmahābhāge tuṣyantaḥ paramaṃ mudā

vibhāvayanti māṃ tatra devā indrapurogamāḥ //
tvayā nātha parityaktā duḥkhitāḥ śramavarjitāḥ

trāyasva no hṛṣīkeśa paramānugraheṇa vai //
etatkṛtvā viśālākṣi devān praṇatipūrvakam

mayā vilokitāḥ sarve parāṃ nirvṛtimāgatāḥ //
etasminnurvaśīkuṇḍe ekarātroṣito naraḥ

yaḥ snāti sarvapāpebhyo mucyate nātra saṃśayaḥ //
urvaśīlokamāsādya krīḍate kālamakṣayam

yastatrotsṛjate prāṇānmama karmaparāyaṇaḥ //
puṇyapāpavinirmukto yāti mallīnatāṃ priye

śrībadaryāśramaṃ puṇyaṃ yatra yatra sthitaḥ smaret //
sa yāti vaiṣṇavaṃ sthānaṃ punarāvṛttivarjitaḥ

ya idaṃ śṛṇuyānnityaṃ madbhaktaḥ satataṃ paṭhet //
brahmacārī jitakrodhaḥ satyavādī jitendriyaḥ

dhyānayogarato nityaṃ sa muktiphalabhāgbhavet //
yasyaitadviditaṃ sarvaṃ dhyānayogaṃ vasundhare

yo'vagacchati cātmānaṃ sa gacchetparamāṃ gatim

iti śrīvarāhapurāṇe bhagavacchāstre badarikāśramamāhātmyavarṇanaṃ nāmaikacatvāriṃśadadhikaśatatamo'dhyāyaḥ