Varaha Purana · Chapter 143

atha mandāramahimanirūpaṇam //
śrīvarāha uvāca //
punaranyatpravakṣyāmi ekāntaṃ śṛṇu sundari //
sthānaṃ me paramaṃ guhyaṃ madbhaktānāṃ sukhāvaham

jāhnavyā dakṣiṇe kūle vindhyapṛṣṭhasamāśritam//
mandāreti ca vikhyātaṃ sarvabhāgavatapriyam

tatra tretāyuge bhūme rāmo nāma mahādyutiḥ //
bhaviṣyati na sandehaḥ sa ca māṃ sthāpayiṣyati

nārāyaṇamukhācchrutvā dharmakāmā vasundharā //
uvāca madhuraṃ vākyaṃ lokanāthaṃ janārdanam

dharaṇyuvāca //
devadeva mahādeva hare nārāyaṇa prabho //
mandāreti tvayā proktaṃ devadharmārthasaṃyutam

mandāre kāni karmāṇi kurvanti ca tato narāḥ //
kāṃśca lokānprapadyante tatra karmakṛto narāḥ

mandāre kāni guhyāni rahasyaṃ kiṃca tatra vai //
vaktumarhasyaśeṣeṇa paraṃ kautūhalaṃ mama

śrīvarāha uvāca //
śṛṇu sundari yatnena yanmāṃ tvaṃ paripṛcchasi //
kathayiṣyāmi te guhyāṃ mandārasya mahākriyām

krīḍamāno'smahaṃ tatra mandāre puṣpite tadā //
mandārapuṣpamādāya manojñaṃ nyasya vai hṛdi

tato mamābhavaccintā mandāre parvatasthite //
tatraikādaśakuṇḍāni nissṛtāni girau dhare

vindhye ca matprabhāveṇa mandāraśca mahādrumaḥ //
sthito'haṃ tatra subhage bhaktānugrahakāmyā

darśanīyatamaṃ sthānaṃ manojñaṃ ca śilātalam //
yatra tiṣṭhāmyahaṃ devi mandāradrumamāśritaḥ

vismayaṃ śṛṇu suśroṇi mandāre'sminmahādrume //
dvādaśyāṃ ca caturdaśyāṃ sa puṣpati mahādrumaḥ

tatra madhyāhnavelāyāṃ vīkṣyamāṇo janaistataḥ //
tato'nyadinamāsādya dṛśyate na kadācana

tasminmaṃdārakuṇḍe tu ekabhaktoṣito naraḥ //
snānaṃ karoti śuddhātmā sa gacchetparamāṃ gatim

atha prāṇānpramucyeta kuṇḍe mandārasaṃsthite //
tapaḥ kṛtvā varārohe mama lokaṃ sa gacchati

tasya cottarapārśve ca prāpaṇaṃ nāma vai giriḥ //
tisro dhārāḥ patantyatra dakṣiṇāṃ diśamāśritāḥ

snānakuṇḍamiti khyātaṃ tasminkṣetre paraṃ mama //
dakṣiṇe patate dhārā sravate cottarāmukham

tatra snāto varārohe ekarātroṣito naraḥ //
modanaṃ dakṣiṇe śṛṃge tasminmerau śiloccaye

tatrātha muṃcate prāṇānmama karmaparāyaṇaḥ //
sarvasaṃgaṃ parityajya mama lokaṃ sa gacchati

tasya pūrvottare pārśve guhyaṃ vaikuṇṭhakāraṇam //
yatra dhārā patatyekā haridrāvarṇasannibhā

yastatra kurute snānamaikarātroṣito naraḥ //
nākapṛṣṭhaṃ samāsādya modate saha daivataiḥ

tathā'tra muṃcate prāṇānkṛtakṛtyaḥ suniścitaḥ //
tārayitvā kulaṃ sarvaṃ mama lokaṃ prapadyate

tasya dakṣiṇapūrveṇa samasroto varāṃgaṇe //
patate vindhyaśṛṃgeṣu agādhaśca mahāhradaḥ

tatra snānaṃ tu kurvīta ekabhaktoṣito naraḥ //
modate pūrvapārśve tu tasminmerau śiloccaye

athātra muṃcate prāṇānmama cittavyavasthitaḥ //
chitvā vai sarvasaṃsāraṃ mama lokaṃ sa gacchati

mandārasya tu pūrveṇa guhyaṃ koṭarasaṃsthitam //
yatra dhārā patatyekā musalākṛtikā śubhā

tatra snānaṃ prakurvīta paṃcabhaktoṣito naraḥ //
modate pūrvapārśve ca merau tasmiñchiloccaye

athātra muṃcate prāṇān kṛtvā karma suduṣkaram //
meruśṛṅgaṃ samutsṛjya mama lokaṃ ca gacchati

tasya dakṣiṇapārśve tu guhyaṃ vindhyaviniḥsṛtam //
paṃca dhārāḥ patantyatra musalākṛtikāḥ śubhāḥ

tatra snānaṃ prakurvīta ahorātroṣito naraḥ //
modate dakṣiṇe śṛṅge mahāmerau śiloccaye

athātra muṃcate prāṇānkṛtvā karma suduṣkaram //
meruśṛṅgaṃ parityajya mama lokaṃ prapadyate

dakṣiṇe paścime bhāge mandārasya yaśasvini //
atra dhārā patatyekā ādityasamatejasā

tatra snānaṃ prakurvīta ahorātroṣito naraḥ //
modate paścime bhāge dhruvo yatra pravartate

athātra muṃcate prāṇānmama karmavyavasthitaḥ //
sarvapāpavinirmukto mama loke ca modate

tasya paścimapārśve tu guhyaṃ devasamanvitam //
cakrāvarttamiti khyātamagādhaśca mahāhradaḥ

snānaṃ karoti yastatra paṃcabhaktoṣito naraḥ //
modate meruśṛṅgeṣu svacchandagamanālayaḥ

atha vai muṃcate prāṇāṃścakravartī mahāyaśāḥ //
śṛṃgānsarvānparityajya modate mama sannidhau

diśaṃ vāyavyamāśritya tasminvindhyaśiloccaye //
tisro dhārāḥ patantyatra musalākṛtayaḥ śubhāḥ

tatra snānaṃ prakurvīta mama cittavyavasthitaḥ //
modate sarvaśṛṃgeṣu caikacittaṃ samāśritaḥ

athātra muñcate prāṇān tasminguhye yaśasvini //
sarvasaṃgaṃ parityajya mama lokaṃ sa gacchati

tasya vikrośamātreṇa dakṣiṇāṃ diśamāśritaḥ //
guhyo gabhīrako nāma agādhaśca mahāhradaḥ

tatra snānaṃ prakurvīta aṣṭarātroṣito naraḥ //
modate sarvadvīpeṣu svacchandagamanālayaḥ

atha vai muñcate prāṇānmama karmavyavasthitaḥ //
sarvadvīpān parityajya mama lokaṃ prapadyate

tasya paścimapārśve tu guhyaṃ vai paramaṃ mahat //
sapta dhārāḥ patantyatra agādhaśca mahāhradaḥ

tatra snānaṃ prakurvīta ahorātroṣito naraḥ //
modate śakraloke tu svacchandagamanālayaḥ

atha vai muñcate prāṇānsvakarmapariniṣṭhitaḥ //
sarvasaṃgaṃ parityajya mama lokaṃ prapadyate

kṣetrasya maṇḍalaṃ tasya kathyamānaṃ mayā śṛṇu //
syamantapañcakaṃ caiva mandārasya girau mama

tatra tiṣṭhāmi suśroṇi vindhyasya girimūrddhani //
mandāre paramaṃ guhyaṃ tasminguhyaśiloccaye

dakṣiṇe saṃsthitaṃ cakraṃ vāme sthāne ca vai gadā //
ya etacchṛṇuyānnityaṃ guhyaṃ mandārasaṃsthitam

lāṃgale musalaṃ caiva śaṃkhastiṣṭhati cāgrataḥ //
tava caiva priyārthāya mama bhaktasukhāvaham

etanna jānate kecinmama māyā vimohitāḥ //
mucya bhāgavatāñchuddhānye ca vārāhamāśritāḥ

iti śrīvarāhapurāṇe bhagavacchāstre mandāramahimānirūpaṇaṃ nāma trayaścatvāriṃśadadhikaśatatamodhyāyaḥ