Varaha Purana · Chapter 131

atha dantakāṣṭhācarvaṇaprāyaścittam //
śrīvarāha uvāca //
dantakāṣṭhamacarvitvā yo hi māmupasarpati //
pūrvakālakṛtaṃ karma tena caikena naśyati

nārāyaṇavacaḥ śrutvā pṛthivī dharmasaṃśritaḥ //
viṣṇubhaktasukhārthāya hṛṣīkeśamuvāca ha

dharaṇyuvāca //
sarvakālakṛtaṃ karma kleśena mahatā'nagha //
kathamekāparādhena sarvameva praṇaśyati

śrīvarāha uvāca //
śṛṇu sundari tattvena kathyamānaṃ mayā'naghe //
yena caikāparādhena pūrvakarma praṇaśyati

manuṣyaḥ kilbiṣī bhadre kaphapittasamanvitaḥ //
pūyaśoṇitasampūrṇaṃ durgandhi mukhamasya tat

tatsarvabījaṃ naśyeta dantakāṣṭhasya bhakṣaṇāt //
śuddhirbhāgavatī caiva ācāreṇa vivarjitā

dharaṇyuvāca //
dantakāṣṭhamakhāditvā yaḥ karmāṇi karoti te //
prāyaścittaṃ ca me brūhi yena dharmo na naśyati

śrīvarāha uvāca //
evametanmahābhāge yanmāṃ tvaṃ paripṛcchasi //
kathayiṣyāmi hīdaṃ te yathā śuddhyanti mānavāḥ

ākāśaśayanaṃ kṛtvā dināni dve ca paṃca ca //
abhuktadantakāṣṭhāśca evaṃ śudhyanti mānavāḥ

evaṃ te kathitaṃ bhadre dantakāṣṭhasya bhakṣaṇam //
ya etena vidhānena prāyaścittaṃ samācaret

kutastasyāparādho'sti evameva na saṃśayaḥ

iti śrīvarāhapurāṇe dantakāṣṭhācarvaṇaprāyaścittaṃ nāmaikatriṃśadadhikaśatatamo'dhyāyaḥ