Varaha Purana · Chapter 130

atha rājānnabhoge prāyaścittam //
sūta uvāca //
evaṃ dīkṣāṃ tataḥ śrutvā nārāyaṇamukhānmahī //
viśuddhamānasā devī nārāyaṇamathābravīt

dharaṇyuvāca //
aho te dīkṣāmāhātmyaṃ yasya vai vyuṣṭiruttamā //
śrutvāhaṃ tu mahābhāga jātāsmi vimalā vibho

aho devasya māhātmyaṃ lokanāthasya tattvataḥ //
yena sā kāritā dīkṣā cāturvarṇyasukhāvahā

ekaṃ me paramaṃ guhyaṃ yadīśa hṛdi varttate //
bhava bhaktasukhārthāya tattvaṃ me vaktumarhasi

deva pūrvāparādhāste dvātriṃśadapi kīrtitāḥ //
evaṃ kṛtvāparādhāni manujā hyalpacetasaḥ

karmaṇā kena śuddhyanti aparādhasya kāriṇaḥ //
tanmamācakṣva tattvena mama prītyā ca mādhava

tadvai bhūmyā vacaḥ śrutvā hṛṣīkeśo mahāmanāḥ //
divyaṃ dhyānaṃ samādāya pratyuvāca vasundharām

śrīvarāha uvāca //
śuddhā bhāgavatā bhūtvā mama karmaparāyaṇāḥ //
ye tu bhuñjanti rājānnaṃ lobhena ca bhayena vā

āpadgatā hi bhuñjanti rājānnaṃ tu vasundhare //
daśavarṣasahasrāṇi pacyante narake narāḥ

bhagavadvacanaṃ śrutvā kampitā ca vasundharā //
dināni sapta daśa ca bhayaṃ tīvramajāyata

tato dīnamanā bhūtvā sā mahī saṃśitavratā //
uvāca madhuraṃ vākyaṃ sarvalokasukhāvaham

dharaṇyuvāca //
śṛṇu tattvena me deva hṛdaye hi vyavasthitam //
ko nu doṣo'sti rājñāṃ hi tanme tvaṃ vaktumarhasi

tato bhūmyā vacaḥ śrutvā sarvadharmavidāṃ varaḥ //
prāha nārāyaṇo vākyaṃ dharmakāmāṃ vasundharām

śrīvarāha uvāca //
śṛṇu sundari tattvena guhyametadanindite //
rājānnaṃ tu na bhoktavyaṃ śubhaibhārgavataiḥ sadā

yadyapyeṣa samatvena rājā loke pravarttate //
rājasaṃ tāmasaṃ vāpi kurvankarma sudāruṇam

api vā garhitaṃ tena rājānnaṃ tu vasundhare //
dharmasandhāraṇārthāya na tu me rocate bhuvi

tato yadyatpravakṣyāmi tacchṛṇuṣva vasundhare //
yathā rājñāṃ tu bhojyaṃ vai śuddhairbhāgavatairnaraiḥ

sthāpayitvā tu māṃ devi vidhidṛṣṭena karmaṇā //
dhanadhānyasamṛddhāni dattvā bhāgavatairapi

siddhaṃ bhāgavataiścānnaṃ mama prāpaṇaśeṣakam //
bhuñjānastu varārohe na sa pāpena lipyate

evaṃ viṣṇuvacaḥ śrutvā dharaṇī saṃśitavratā //
varāharūpiṇaṃ devaṃ pratyuvāca varānanā

dharaṇyuvāca //
rājānnaṃ tu naro bhuktvā śuddho bhāgavataḥ śuciḥ //
karmaṇā kena śuddhyeta tanme brūhi janārdana

śrīvarāha uvāca //
śṛṇu tattvena me devi yanmāṃ tvaṃ bhīru bhāṣase //
taranti puruṣā yena rājānnasyopabhuñjakāḥ

ekaṃ cāndrāyaṇaṃ kṛtvā taptakṛcchraṃ ca puṣkalam //
kuryātsāntapanaṃ caikaṃ śīghraṃ mucyanti kilbiṣāt

na tasya cāparādho'sti vasudhe vai vaco mama //
evameva na bhoktavyaṃ rājānnaṃ vai kadācana //
mamātra pūjākāmena yadīcchetparamāṃ gatim

iti śrīvarāhapurāṇe bhagavacchāstre rājānnaprāyaścittaṃ nāma triṃśadadhikaśatatamo'dhyāyaḥ