વરાહ પુરાણ · અધ્યાય 131

અથ દન્તકાષ્ઠાચર્વણપ્રાયશ્ચિત્તમ્ ॥
શ્રીવરાહ ઉવાચ ॥
દન્તકાષ્ઠમચર્વિત્વા યો હિ મામુપસર્પતિ ॥
પૂર્વકાલકૃતં કર્મ તેન ચૈકેન નશ્યતિ

નારાયણવચઃ શ્રુત્વા પૃથિવી ધર્મસંશ્રિતઃ ॥
વિષ્ણુભક્તસુખાર્થાય હૃષીકેશમુવાચ હ

ધરણ્યુવાચ ॥
સર્વકાલકૃતં કર્મ ક્લેશેન મહતાઽનઘ ॥
કથમેકાપરાધેન સર્વમેવ પ્રણશ્યતિ

શ્રીવરાહ ઉવાચ ॥
શૃણુ સુન્દરિ તત્ત્વેન કથ્યમાનં મયાઽનઘે ॥
યેન ચૈકાપરાધેન પૂર્વકર્મ પ્રણશ્યતિ

મનુષ્યઃ કિલ્બિષી ભદ્રે કફપિત્તસમન્વિતઃ ॥
પૂયશોણિતસમ્પૂર્ણં દુર્ગન્ધિ મુખમસ્ય તત્

તત્સર્વબીજં નશ્યેત દન્તકાષ્ઠસ્ય ભક્ષણાત્ ॥
શુદ્ધિર્ભાગવતી ચૈવ આચારેણ વિવર્જિતા

ધરણ્યુવાચ ॥
દન્તકાષ્ઠમખાદિત્વા યઃ કર્માણિ કરોતિ તે ॥
પ્રાયશ્ચિત્તં ચ મે બ્રૂહિ યેન ધર્મો ન નશ્યતિ

શ્રીવરાહ ઉવાચ ॥
એવમેતન્મહાભાગે યન્માં ત્વં પરિપૃચ્છસિ ॥
કથયિષ્યામિ હીદં તે યથા શુદ્ધ્યન્તિ માનવાઃ

આકાશશયનં કૃત્વા દિનાનિ દ્વે ચ પંચ ચ ॥
અભુક્તદન્તકાષ્ઠાશ્ચ એવં શુધ્યન્તિ માનવાઃ

એવં તે કથિતં ભદ્રે દન્તકાષ્ઠસ્ય ભક્ષણમ્ ॥
ય એતેન વિધાનેન પ્રાયશ્ચિત્તં સમાચરેત્

કુતસ્તસ્યાપરાધોઽસ્તિ એવમેવ ન સંશયઃ

ઇતિ શ્રીવરાહપુરાણે દન્તકાષ્ઠાચર્વણપ્રાયશ્ચિત્તં નામૈકત્રિંશદધિકશતતમોઽધ્યાયઃ