Varaha Purana · Chapter 120

atha trisandhyāmantropasthānam //
śrīvarāha uvāca //
śṛṇuṣva paramaṃ guhyaṃ pūrvaṃ pṛṣṭaṃ tvayā dhare //
devi sarvaṃ pravakṣyāmi saṃsārataraṇaṃ mahat

snānaṃ kṛtvā yathānyāyaṃ mama karmaparāyaṇāḥ//
upasarpanti ye bhaktyā kadannāśā jitendriyāḥ

yaścaivamucyate bhadre mama rūpaṃ sanātanam //
ahameva varārohe sarvabhūtasanātanam

adhaścordhvaṃ ca tiryak ca ahameva vyavasthitaḥ //
diśāṃ ca vidiśāṃ caiva uparyupari bhāmini

sarvathā vandanīyāste mama bhaktena sarvadā //
kriyāsamūha yuktena yadīcchetparamāṃ gatim

anyacca te pravakṣyāmi guhyaṃ loke mahadyaśaḥ //
yathā vai vandanīyāste mama mārgānusāriṇaḥ

kṛtvāpi paramaṃ karma buddhimādāya tadvidhām //
tataḥ pūrvamukho bhūtvā punargṛhya jalāñjalim

oṃ namo nārāyaṇetyuktvā imaṃ mantramudīrayet

yajāmahe dharmaparāyaṇodbhavaṃ nārāyaṇaṃ sarvalokapradhānam //
īśānamādyaṃ puruṣaṃ purāṇaṃ saṃsāramokṣāya kṛpākaraṃ tam

tataḥ paścānmukho bhūtvā punargṛhya jalāṃjalim //
dvādaśākṣaramuccārya imaṃ mantramudīrayet / 120.१० //
mantrā ūcuḥ //
yathā tu devaḥ prathamādikarttā purāṇa kalpaśca yathā vibhūtiḥ //
tathā sthitaṃ cādimanantarūpamamoghasaṃkalpamanantamīḍe

tatastenaiva kālena punargṛhya jalāṃjalim //
tenaiva cāsya yogena bhūtvā caivottarāmukhaḥ //
namo nārāyaṇetyuktvā imaṃ maṃtramudīrayet

yajāmahe divyaṃ paraṃ purāṇamanādimadhyāntamanantarūpam //
bhavodbhavaṃ viśvakaraṃ praśāntaṃ saṃsāramokṣāvahamadvitīyam // १ ३//
tatastenaiva kālena bhūtvā vai dakṣiṇāmukhaḥ //
namaḥ puruṣottamāyetyuktvā imaṃ mantramudīrayet

yajāmahe yajñamaho rūpaṃ tu satyaṃ ṛtaṃ ca kālādimarūpamādyam//
ananyarūpaṃ ca mahānubhāvaṃ saṃsāramākṣoya kṛtāvatāram

kāṣṭhakṛtyastato bhūtvā kṛtvā cendriyanigraham//
acyute tu manaḥ kṛtvā imaṃ maṃtramudāharet

yajāmahe somapaṃ bhavantaṃ te somārkanetraṃ śatapatranetram//
jagatpradhānaṃ nanu lokanāthaṃ mṛtyutrisaṃsāravimokṣaṇaṃ ca

triṣu sandhyāsvanenaiva vidhinā kuryānmama ca karma tat//
buddhyā yuktyā ca matyā ca yadīcchetparamāṃ gatim

guhyānāṃ paramaṃ guhyaṃ yogānāṃ paramo nidhiḥ //
sāṃkhyānāṃ paramaṃ sāṃkhyaṃ karmaṇāṃ karma cottamam

etanna dadyānmūrkhāya piśunāya śaṭhāya ca //
dīkṣitāyaiva dātavyaṃ suśiṣyāya dṛḍhāya ca

etanmaraṇakāle'pi guhyaṃ viṣṇuprabhāṣitam //
buddhyā dhārayitavyaṃ na vismarttavyaṃ kadācana

ya etatpaṭhate nityaṃ kalpocchrāyī dṛḍhavrataḥ //
mamāpi hṛdaye nityaṃ sa tiṣṭhati na saṃśayaḥ

ya etena vidhānena trisandhyaṃ karma kārayet //
tiryagyonivinirmukto mama lokaṃ sa gacchati

iti śrīvarāhapurāṇe bhagavacchāstre trisandhyāmantropasthānakaraṇaṃ nāma viṃśatyadhikaśatatamo'dhyāyaḥ