વરાહ પુરાણ · અધ્યાય 120

અથ ત્રિસન્ધ્યામન્ત્રોપસ્થાનમ્ ॥
શ્રીવરાહ ઉવાચ ॥
શૃણુષ્વ પરમં ગુહ્યં પૂર્વં પૃષ્ટં ત્વયા ધરે ॥
દેવિ સર્વં પ્રવક્ષ્યામિ સંસારતરણં મહત્

સ્નાનં કૃત્વા યથાન્યાયં મમ કર્મપરાયણાઃ॥
ઉપસર્પન્તિ યે ભક્ત્યા કદન્નાશા જિતેન્દ્રિયાઃ

યશ્ચૈવમુચ્યતે ભદ્રે મમ રૂપં સનાતનમ્ ॥
અહમેવ વરારોહે સર્વભૂતસનાતનમ્

અધશ્ચોર્ધ્વં ચ તિર્યક્ ચ અહમેવ વ્યવસ્થિતઃ ॥
દિશાં ચ વિદિશાં ચૈવ ઉપર્યુપરિ ભામિનિ

સર્વથા વન્દનીયાસ્તે મમ ભક્તેન સર્વદા ॥
ક્રિયાસમૂહ યુક્તેન યદીચ્છેત્પરમાં ગતિમ્

અન્યચ્ચ તે પ્રવક્ષ્યામિ ગુહ્યં લોકે મહદ્યશઃ ॥
યથા વૈ વન્દનીયાસ્તે મમ માર્ગાનુસારિણઃ

કૃત્વાપિ પરમં કર્મ બુદ્ધિમાદાય તદ્વિધામ્ ॥
તતઃ પૂર્વમુખો ભૂત્વા પુનર્ગૃહ્ય જલાઞ્જલિમ્

ઓં નમો નારાયણેત્યુક્ત્વા ઇમં મન્ત્રમુદીરયેત્

યજામહે ધર્મપરાયણોદ્ભવં નારાયણં સર્વલોકપ્રધાનમ્ ॥
ઈશાનમાદ્યં પુરુષં પુરાણં સંસારમોક્ષાય કૃપાકરં તમ્

તતઃ પશ્ચાન્મુખો ભૂત્વા પુનર્ગૃહ્ય જલાંજલિમ્ ॥
દ્વાદશાક્ષરમુચ્ચાર્ય ઇમં મન્ત્રમુદીરયેત્ । 120.૧૦ ॥
મન્ત્રા ઊચુઃ ॥
યથા તુ દેવઃ પ્રથમાદિકર્ત્તા પુરાણ કલ્પશ્ચ યથા વિભૂતિઃ ॥
તથા સ્થિતં ચાદિમનન્તરૂપમમોઘસંકલ્પમનન્તમીડે

તતસ્તેનૈવ કાલેન પુનર્ગૃહ્ય જલાંજલિમ્ ॥
તેનૈવ ચાસ્ય યોગેન ભૂત્વા ચૈવોત્તરામુખઃ ॥
નમો નારાયણેત્યુક્ત્વા ઇમં મંત્રમુદીરયેત્

યજામહે દિવ્યં પરં પુરાણમનાદિમધ્યાન્તમનન્તરૂપમ્ ॥
ભવોદ્ભવં વિશ્વકરં પ્રશાન્તં સંસારમોક્ષાવહમદ્વિતીયમ્ ॥ ૧ ૩॥
તતસ્તેનૈવ કાલેન ભૂત્વા વૈ દક્ષિણામુખઃ ॥
નમઃ પુરુષોત્તમાયેત્યુક્ત્વા ઇમં મન્ત્રમુદીરયેત્

યજામહે યજ્ઞમહો રૂપં તુ સત્યં ઋતં ચ કાલાદિમરૂપમાદ્યમ્॥
અનન્યરૂપં ચ મહાનુભાવં સંસારમાક્ષોય કૃતાવતારમ્

કાષ્ઠકૃત્યસ્તતો ભૂત્વા કૃત્વા ચેન્દ્રિયનિગ્રહમ્॥
અચ્યુતે તુ મનઃ કૃત્વા ઇમં મંત્રમુદાહરેત્

યજામહે સોમપં ભવન્તં તે સોમાર્કનેત્રં શતપત્રનેત્રમ્॥
જગત્પ્રધાનં નનુ લોકનાથં મૃત્યુત્રિસંસારવિમોક્ષણં ચ

ત્રિષુ સન્ધ્યાસ્વનેનૈવ વિધિના કુર્યાન્મમ ચ કર્મ તત્॥
બુદ્ધ્યા યુક્ત્યા ચ મત્યા ચ યદીચ્છેત્પરમાં ગતિમ્

ગુહ્યાનાં પરમં ગુહ્યં યોગાનાં પરમો નિધિઃ ॥
સાંખ્યાનાં પરમં સાંખ્યં કર્મણાં કર્મ ચોત્તમમ્

એતન્ન દદ્યાન્મૂર્ખાય પિશુનાય શઠાય ચ ॥
દીક્ષિતાયૈવ દાતવ્યં સુશિષ્યાય દૃઢાય ચ

એતન્મરણકાલેઽપિ ગુહ્યં વિષ્ણુપ્રભાષિતમ્ ॥
બુદ્ધ્યા ધારયિતવ્યં ન વિસ્મર્ત્તવ્યં કદાચન

ય એતત્પઠતે નિત્યં કલ્પોચ્છ્રાયી દૃઢવ્રતઃ ॥
મમાપિ હૃદયે નિત્યં સ તિષ્ઠતિ ન સંશયઃ

ય એતેન વિધાનેન ત્રિસન્ધ્યં કર્મ કારયેત્ ॥
તિર્યગ્યોનિવિનિર્મુક્તો મમ લોકં સ ગચ્છતિ

ઇતિ શ્રીવરાહપુરાણે ભગવચ્છાસ્ત્રે ત્રિસન્ધ્યામન્ત્રોપસ્થાનકરણં નામ વિંશત્યધિકશતતમોઽધ્યાયઃ