Varaha Purana · Chapter 119

atha bhojyaniyamavidhiḥ //
dharaṇyuvāca //
evaṃ karmavidhiṃ śrutvā sarva saṃsāramokṣaṇam //
prasannavadanaṃ devaṃ punarvākyamuvāca ha

evaṃ mahaujasaṃ karma tava mārgānusārataḥ //
tvattastu prāpaṇavidhistava prītyā mayā śrutaḥ

kena dravyeṇa saṃyuktaṃ tanmamācakṣva mādhava //
vasudhāyā vacaḥ śrutvā varāhaḥ prītamānasaḥ

uvāca dharmasaṃyuktaṃ dharmajño vākyakovidaḥ //
śrīvarāha uvāca //
yena mantreṇa saṃyukto mama prāpaṇakaṃ nayet

sapta vrīhīṃstato gṛhya payasā saha saṃyutam //
paramaṃ tasya śākāni madhūkodumbaraṃ tathā

ete cānye ca bahavaḥ śataśo'tha sahasraśaḥ //
karmaṇyāśca ta eteṣāṃ ye mayā parikīrttitāḥ

vrīhīṇāṃ ca pravakṣyāmi upayogyāni mādhavi //
ekāgraṃ mānasaṃ kṛtvā prāpaṇaṃ śṛṇu sundari

dharmacillikaśākaṃ ca sugandhaṃ raktamālikau //
dīrghaśālimahāśālī varakuṅkumamākṣikau

āmodā śivasundaryau śirīkākulaśālikāḥ //
vividhaṃ yāvakānnaṃ ca jñeyānyetāni karmaṇi

karmaṇyā mudgamāṣā vai tilakaṅgukulitthakāḥ //
gavedhukaṃ mahāmohaṃ makuṣṭhamathavāhijām

śyāmākamiti coktāni karmaṇyāni vasundhare //
karmaṇyāni ca śākāni vijānīhi vasundhare/

etāni pratigṛhṇāmi yacca bhāgavataṃ priyam//
mārgamāṃsaṃ varaṃ chāgaṃ śāsaṃ samanuyujyate

etāni prāpaṇe dadyānmama caitatpriyāvaham//
yuñjāno vitate yajñe brāhmaṇe vedapārage

bhāgo mamāsti tatrāpi paśūnāṃ chāgalasya ca//
māhiṣaṃ varjayenmahyaṃ kṣīraṃ dadhi ghṛtaṃ tataḥ

varjayettatra māṃsāni yajuṣā vaiṣṇavo'śnute //
paraṃ pāyasamapi varjyāni tanmāṃsaṃ cetakaḥ khure

pakṣiṇāṃ ca pravakṣyāmi ye prayojyā vasundhare //
ye caiva mama kṣetreṣu upayujyanti nityaśaḥ

lāvakaṃ vārttikaṃ caiva praśastaṃ ca kapiñjalam //
ete cānye ca bahavaḥ śataśo'tha sahasraśaḥ

mama karmaṇi yogyā ye te mayā parikīrttitāḥ //
yastvetattu vijānīyātkarmakartā tathaiva ca

nāparādhnoti sa naro mama coktaṃ vacaḥ priye //
te ca bhojyāśca maṅgalyā mama bhaktasukhāvahāḥ

tato yaṣṭavyamevaṃ hi ya icchet siddhimuttamām //
ya etena vidhānena yajiṣyati vasundhare

prāpnuvanti parāṃ siddhiṃ mamaiva kṛtakarmiṇaḥ //
iti śrīvarāhapurāṇe bhagavacchāstre prāpaṇadravya karmaṇya bhojyaniyamavidhirnāmonaviṃśatyadhikaśatatamo'dhyāyaḥ