Varaha Purana · Chapter 121

atha janmābhāvaḥ //
śrīvarāha uvāca //
yena garbhaṃ na gaccheta tacchṛṇuṣva vasundhare //
kathayiṣyāmi te hyevaṃ sarvadharmaviniścayam

kṛtvāpi vipulaṃ karma ātmānaṃ na praśaṃsati //
karoti bahukarmāṇi śuddhenaivāntarātmanā

kṛtvā tu mama karmāṇi samartho'nugrahe rataḥ //
kāryākārye vijānāti sarvadharmeṣu niṣṭhitaḥ

śītoṣṇavātavarṣādikṣutpipāsāsahaśca yaḥ //
yo daridro nirālasyaḥ satyavāganasūyakaḥ

svadāranirato nityaṃ paradāravivarjakaḥ //
satyavādī viśuddhātmā nityaṃ ca bhagavatpriyaḥ

saṃvibhājya viśeṣajño nityaṃ brāhmaṇavatsalaḥ //
priyabhāṣī dvijānāṃ ca mama karmaparāyaṇaḥ

kuyoniṃ tu na gaccheta mama lokaṃ sa gacchati //
anyacca te pravakṣyāmi tacchṛṇuṣva vasundhare

yo viyoniṃ na gaccheta mama karmaparāyaṇaḥ //
jīvahiṃsānivṛttastu sarvabhūtahitaḥ śuciḥ

sarvatra samatāyuktaḥ samaloṣṭhāśmakāṃcanaḥ //
bālye sthito'pi vayasi kṣānto dāntaḥ śubhe rataḥ

nityaṃ naiva vijānāti pareṇāpakṛtaṃ kvacit //
karttavyaṃ saṃsmaretsarvaṃ mama satyaṃ ca jalpati

vyalīkādvinivṛtto yastathyetikṛtaniścayaḥ //
nityaṃ ca vṛttimānkaścitparokṣe'pi na cākṣipet

ṛtukāle'pi gacchedyaḥ apatyārthe svakāṃ striyam //
īdṛśāstu narā bhadre mama karmaparāyaṇāḥ

te viyoniṃ na gacchanti mama gacchanti sundari //
punaranyatpravakṣyāmi tacchṛṇuṣva vasundhare

puruṣāṇāṃ prasannānāṃ yaśca dharmaḥ sanātanaḥ //
manunāpyanyathā dṛṣṭo hyanyathāṃgirasena ca

śukreṇa cānyathā dṛṣṭo gautamenāpi cānyathā //
somena cānyathā dṛṣṭo rudreṇāpyanyathā punaḥ

śaṅkhena cānyathā dṛṣṭo likhitenāpi cānyathā //
kaśyapenānyathā dṛṣṭo dharmeṇāpyanyathā dhare /

agninā vāyunā caiva dṛṣṭo dharmo'nyathā dhare //
yamena cānyathā dṛṣṭa indreṇa varuṇena ca

kubereṇānyathā dṛṣṭaḥ śāṇḍilyenāpi cānyathā //
pulastyenānyathā dṛṣṭa ādityenāpi cānyathā

pitṛbhiścānyathā dṛṣṭo hyanyathāpi svayambhuvā //
ātmanātmani dharmeṇa ye narā niścitavratāḥ

svakaṃ pālayate dharmaṃ svamatenaiva bhāṣitam //
paravādaṃ na kurvīta sarvadharmeṣu niścitam

na nindeddharmakāryāṇi ātmadharmapathe sthitaḥ //
ebhirguṇaiḥ samāyukto mama karmāṇi kārayet

viyoniṃ sa na gaccheta mama lokāya gacchati //
punaranyattu vakṣyāmi tacchṛṇuṣveha mādhavi

taranti puruṣā yena garbhasaṃsārasāgaram //
jitendriyā jitakrodhā lobhamohavivarjitāḥ

ātmopakārakā nityaṃ devātithigurupriyāḥ //
hiṃsādīni na kurvanti madhumāṃsavivarjakāḥ

manasā brāhmaṇīṃ caiva yo gacchenna kadācana //
viprāya kapilāṃ dadyādvṛdvaṃ sāntvena pālayet

sarveṣāṃ caiva putrāṇāṃ na viśeṣaṃ karoti yaḥ //
saṃkruddhaṃ brāhmaṇaṃ dṛṣṭvā yastu tatra prasādayet

yaḥ spṛśetkapilāṃ bhaktyā kumārīṃ na ca dūṣayet //
agniṃ na ca krametpadbhyāṃ na ca putreṇa bhāṣayet

jalena mehayedyastu gurubhakto na jalpakaḥ //
evaṃ dharmeṇa saṃyukto yo nu māṃ pratipadyate

sa ca garbhaṃ na gaccheta mama lokaṃ sa gacchati

iti śrīvarāhapurāṇe janmābhāvo nāmaikaviṃśatyadhikaśatatamo'dhyāyaḥ