Varaha Purana · Chapter 116

atha sukhaduḥkhanirūpaṇam//
śrīvarāha uvāca //
mayā proktavidhānena yastu karmāṇi kārayet //
tacchṛṇuṣva mahābhāge yo sāphalyamāpnuyāt

ekacittaḥ samāsthāya ahaṅkāravivarjjitaḥ //
maccittasaṃhato nityaṃ kṣānto dāṃto jitendriyaḥ

phalamūlāni śākāni dvādaśyāṃ vā kadācana//
payovrataṃ ca tatkāle punareva nirāmiṣaḥ

ṣaṣṭhyaṣṭamī hyamāvāsyā tūbhayatra caturdaśī //
maithunaṃ nābhiseveta dvādvaśyāṃ ca tathā priye

evaṃ yogavidhānena karma kuryāddṛḍhavrataḥ //
pūtātmā dharmasaṃyukto viṣṇulokaṃ tu gacchati

na glānirna jarā tasya na moho roga eva ca //
bhujāṣṭādaśa jāyante dhanvī khaḍgī śarī gadī

teṣāṃ vyuṣṭiṃ pravakṣyāmi mama karmasamutthitām //
ṣaṣṭivarṣasahasrāṇi ṣaṣṭivarṣaśatāni ca

mamārcanavidhiṃ kṛtvā mama loke mahīyate //
duḥkhamevaṃ pravakṣyāmi tacchṛṇuṣva vasundhare

ucitenopacāreṇa duḥkhamokṣavināśanam //
ahaṅkārāvṛto nityaṃ naro mohena cāvṛtaḥ

yo māṃ naiva prapadyeta tato duḥkhataraṃ nu kim //
sarvāśī sarvavikretā namaskāravivarjitaḥ

yo na māṃ pratipadyeta tato duḥkhataraṃ nu kim //
prāptakāle vaiśvadeve dṛṣṭvā cātithimāgatam

adattvā tasya yo bhuṃkte tato duḥkhataraṃ nu kim //
sarvānnāni tu siddhāni pākabhedaṃ karoti yaḥ

tasya devā na cāśnanti tato duḥkhataraṃ nu kim //
asantuṣṭastu vaiṣamye paradārābhimarśakaḥ

paropatāpī mandātmā tato duḥkhataraṃ nu kim //
akṛtvā puṣkalaṃ karma gṛhe saṃvasate naraḥ

mṛtyukālavaśaṃ prāptastato duḥkhataraṃ nu kim //
hastyaśvarathayānāni gamyamānāni paśyati

dhāvantyasyāgrataḥ pṛṣṭhe tato duḥkhataraṃ nu kim //
aśnanti piśitaṃ kecitkecicchālisamanvitam

śuṣkānnaṃ kecidaśnanti tato duḥkhataraṃ nu kim //
varavastrāvṛtāṃ śayyāṃ samāsevati bhūṣitām

kecittṛṇeṣu śerante tato duḥkhataraṃ nu kim //
surūpo dṛśyate kaścitpuruṣaścātmakarmabhiḥ

kecidvirūpā dṛśyante tato duḥkhataraṃ nu kim //
vidvān kṛtī guṇajñaśca sarvaśāstraviśāradaḥ

kecinmūkāśca dṛśyante tato duḥkhataraṃ nu kim //
vidyamāne dhane kecitkṛpaṇā bhogavarjitāḥ

daridro jāyate dātā tato duḥkhataraṃ nu kim //
dvibhāryaḥ puruṣo yastu tayorekāṃ praśaṃsati

ekā tu durbhagā tatra tato duḥkhataraṃ nu kim //
brāhmaṇaḥ kṣatriyo vaiśyastrayo varṇāḥ sumadhyame

pāpakarmaratā hyāsantato duḥkhataraṃ nu kim //
labdhvā tu mānuṣīṃ saṃjñāṃ paṃcabhūta samanvitām

māmeva na prapadyante tato duḥkhataraṃ nu kim //
etatte kathitaṃ bhadre duḥkhakarmaviniścayam

sarvabhūtāhitaṃ pāpaṃ yattvayā paripṛcchitam //
yacca māṃ pṛcchate bhadre śubhaṃ kīdṛśamucyate

tacchṛṇuṣvānavadyāṅgi mama karmaviniścayam //
kṛtvā tu vipulaṃ karma madbhakteṣu nivedayet

yasya buddhirvijāyeta sa duḥkhāyopajāyate //
māṃ pūjayitvā naivedyaṃ viśiṣṭaṃ parikalpya ca

śeṣamannaṃ samaśnāti tataḥ saukhyataraṃ nu kim //
trikālaṃ ye prapadyante mayoktena vasundhare

kṛtvā sāyāhnikaṃ karma tataḥ saukhyataraṃ nu kim //
devatātithimarttyānāṃ tyaktvā cānnaṃ vasundhare

yaścātmā vai samaśnāti tataḥ saukhyataraṃ nu kim //
praviṣṭastvatithiryasya nirāśo yanna gacchati

yena kenaciddattena tataḥ saukhyataraṃ nu kim //
māsi māsyekadivasastvamāvāsyeti yocyate

pitaro yasya tṛpyanti tataḥ saukhyataraṃ nu kim //
bhojaneṣu prapanneṣu yavānnaṃ yaḥ prayacchati

abhinnamukharāgeṇa tataḥ saukhyataraṃ nu kim //
ubhayorapi bhāryāsu yasya buddhirna naśyati

samaṃ paśyati yo devi tataḥ saukhyataraṃ nu kim //
ahiṃsanaṃ tu kurvīta viśuddhenāntarātmanā

ahiṃsoparataḥ śuddhaḥ sa sukhāyopajāyate //
parabhāryāṃ surūpāṃ tu dṛṣṭvā dṛṣṭirna cālyate

yasya cittaṃ na gacchettu tataḥ saukhyataraṃ nu kim //
mauktikādīni ratnāni tathaiva kanakāni ca

loṣṭavatpaśyate yastu tataḥ saukhyataraṃ nu kim //
mudite vāśvanāgendre ubhe sainye pathi sthite

yastu prāṇānpramucyeta tataḥ saukhyataraṃ nu kim//
labdhena cāpyalabdhena kutsitaṃ karma garhayan

yastu jīvati saṃtuṣṭaḥ sa sukhāyopapadyate //
bhartustu vai vrataṃ strīṇāmevameva vasundhare

yā toṣayati bharttāraṃ tataḥ saukhyataraṃ nu kim //
vidyate vibhavenāpi puruṣo yastu paṇḍitaḥ

nigṛhītendriyaḥ paṃca tataḥ saukhyataraṃ nu kim //
sahate cāvamānaṃ tu vyasane na tu durmanāḥ

yasyedaṃ viditaṃ sarvaṃ tataḥ saukhyataraṃ nu kim //
akāmo vā sakāmo vā mama kṣetre vasuṃdhare

yastu prāṇānpramucyeta tataḥ saukhyataraṃ nu kim //
mātaraṃ pitaraṃ caiva yaḥ sadā pūjayennaraḥ

devateva sadā paśyettataḥ saukhyataraṃ nu kim //
ṛtukāle tu yo gacchenmāsemāse ca maithunam

ananyamānaso bhūtvā tataḥ saukhyataraṃ nu kim//
prayuktaḥ sarvadevānāṃ yo māmevaṃ prapūjayet

tasyāhaṃ na praṇaśyāmi sa ca me na praṇaśyati //
etatte kathitaṃ bhadre śubhanirdeśaniścayaḥ //
sarvalokahitārthāya yanmāṃ tvaṃ paripṛcchasi

iti śrīvarāhapurāṇe sukhaduḥkhanirūpaṇaṃ nāma ṣoḍaśādhikaśatatamo'dhyāyaḥ