Varaha Purana · Chapter 117

atha dvātriṃśadaparādhāḥ//
śrīvarāha uvāca//
śṛṇu bhadre mahāścaryamāhāravidhiniścayam //
āhāraṃ cāpyanāhāraṃ tacchṛṇuṣva vasundhare

bhuñjāno yāti cāśnāti mama yogāya mādhavi //
aśubhaṃ karma kṛtvāpi puruṣo dharmamāśritaḥ

āhāraṃ caiva dharmajña upabhuñjīta nityaśaḥ //
sarve cātraiva karmaṇyā vrīhayaḥ śālayastathā

akarmaṇyāni vakṣyāmi yena bhojyaṃti māṃ prati //
tena vai bhuktamārgeṇa aparādho mahaujasaḥ

prathamaṃ cāparādhānnaṃ na roceta mama priye //
bhuktvā tu parakīyānnaṃ tatparastannivarttanaḥ

dvitīyastvaparādho'yaṃ dharmavighnāya vai bhavet //
gatvā maithunasaṃyāgaṃ yo nu māṃ spṛśate naraḥ

tṛtīyamaparādhaṃ tu kalpayāmi vasuṃdhare //
dṛṣṭvā rajasvalāṃ nārīmasmākaṃ yaḥ prapadyate

caturthamaparādhaṃ tu dṛṣṭaṃ naiva kṣapāmyaham //
spṛṣṭvā tu mṛtakaṃ caiva asaṃskārakṛtaṃ tu vai

paṃcamaṃ cāparādhaṃ ca na kṣamāmi vasuṃdhare //
dṛṣṭvā tu mṛtakaṃ yastu nācamya spṛśate tu mām

ṣaṣṭhaṃ taṃ cāparādhaṃ vai na kṣamāmi vasuṃdhare //
mamārcanasya kāle tu purīṣaṃ yastu gacchati

saptamaṃ cāparādhaṃ tu kalpayāmi vasuṃdhare //
yastu nīlena vastreṇa prāvṛto māṃ prapadyate

aṣṭamaṃ cāparādhaṃ ca kalpayāmi vasundhare //
mamaivārccanakāle tu yastvasamaṃ prabhāṣate

navamaṃ cāparādhaṃ taṃ na rocāmi vasundhare //
avidhānaṃ tu yaḥ spṛśya māmeva pratipadyate

daśamaścāparādho'yaṃ mama cāpriyakārakaḥ //
kruddhastu yāni karmāṇi kurute karmakārakaḥ

ekādaśāparādhaṃ tu kalpayāmi vasuṃdhare //
akarmaṇyāni puṇyāni yastu māmupakalpayet

dvādaśaṃ cāparādhaṃ taṃ kalpayāmi vasuṃdhare //
yastu raktena vastreṇa kausumbhenopagacchati

trayodaśaṃ cāparādhaṃ kalpayāmi vasundhare //
andhakāre ca māṃ devi yaḥ spṛśeta kadācana

caturddaśāparādhaṃ tu kalpayāmi vasundhare //
yastu kṛṣṇena vastreṇa mama karmāṇi kārayet

aparādhaṃ paṃcadaśaṃ kalpayāmi vasuṃdhare //
adhautena tu vastreṇa yastu māmupakalpayet

ṣoḍaśaṃ tvaparādhānāṃ kalpayāmi varānane //
svayamannaṃ tu yo hyayādajñānādapi mādhavi

aparādhaṃ saptadaśaṃ kalpayāmi vasundhare //
yastu mātsyāni māṃsāni bhakṣayitvā prapadyate

aṣṭādaśāparādhaṃ ca kalpayāmi vasuṃdhare //
jālapādaṃ bhakṣayitvā yastu māmupasarpati

ekonaviṃśāparādhaṃ kalpayāmi vasuṃdhare //
yastu me dīpakaṃ spṛṣṭvā māmeva pratipadyate

viṃśakaṃ cāparādhaṃ taṃ kalpayāmi varānane //
śmaśānaṃ yastu vai gatvā māmeva pratipadyate

ekaviṃśāparādhaṃ taṃ kalpayāmi vasundhare //
piṇyākaṃ bhakṣayitvā tu yo māmevābhigacchati

dvāviṃśaṃ cāparādhaṃ taṃ kalpayāmi priye sadā //
yastu vārāha māṃsāni prāpaṇenopapādayet

aparādhaṃ trayoviṃśaṃ kalpayāmi vasundhare //
surāṃ pītvā tu yo martyaḥ kadācidupasarpati

aparādhaṃ caturviṃśaṃ kalpayāmi vasundhare //
yaḥ kusumbhaṃ ca me śākaṃ bhakṣayitvopacakrame

aparādhaṃ paṃcaviṃśaṃ kalpayāmi vasundhare //
paraprāvaraṇenaiva yastu māmupasarpati

aparādheṣu ṣaḍviṃśaṃ kalpayāmi vasundhare //
navānnaṃ yastu bhakṣeta na devānna pitṝnyajet

saptaviṃśaṃ cāparādhaṃ kalpayāmi guṇānvite //
upānahau ca prapade tathā vāpīṃ ca gacchati

aparādhaṃ tvaṣṭaviṃśaṃ kalpayāmi guṇānvite //
śarīraṃ marddayitvā tu yo māmāpnoti mādhavi

ekonaviṃśāparādho na sa svargeṣu gacchati //
ajīrṇena samāviṣṭo yastu māmupagacchati

triṃśakaṃ cāparādhaṃ taṃ kalpayāmi yaśasvini //
gandhapuṣpāṇyadattvā tu yastu dhūpaṃ prayacchate

ekatriṃśaṃ cāparādhaṃ kalpayāmi manasvini //
vinā bheryādiśabdena dvārasyoddhāṭanaṃ mama

mahāparādhaṃ janīyāddvātriṃśaṃ taṃ mama priye //
anyacca śṛṇu vakṣyāmi dṛḍhavratamanuttamam

kṛtvā cāvaśyakaṃ karma mama lokaṃ ca gacchati //
nityayuktaśca śāstrajño mama karmaparāyaṇaḥ

ahiṃsāparamaścaiva sarvabhūtadayāparaḥ //
sāmānyaśca śucirdakṣo mama nityaṃ pathi sthitaḥ

nigṛhya cendriyagrāmamaparādhavivarjitaḥ //
udāro dhārmikaścaiva svadāreṣu suniṣṭhitaḥ

śāstrajñaḥ kuśalaścaiva mama karmaparāyaṇaḥ//
cāturvarṇyasya me bhadre sanmārgeṣu vyavasthitaḥ

ācāryabhaktā deveṣu bhaktā bhartari vatsalā//
saṃsāreṣvapi varttantī gacchantī tvagrato yadi

mama lokasthitā sā vai bharttāraṃ prasamīkṣate//
puruṣo yadi madbhaktaḥ striyaṃ tyaktvā ca gacchati

sa tato'tra pratīkṣeta bhāryāṃ bharttari vatsalām//
anyacca te pravakṣyāmi karmaṇāṃ karma cottamam

ṛṣayo māṃ na paśyanti mama karmapathe sthitāḥ //
draṣṭavyā mama lokeṣu ṛṣayo'pi varānane

kiṃ punarmānuṣā ye ca mama karmavyavasthitāḥ //
anyadeveṣu ye bhaktā mūḍhā vai pāpacetasaḥ

mama māyāvimūḍhāstu na prapadyanti mādhavi //
māṃ tu ye vai prapadyante mokṣakāmā vasundhare

tānahaṃ bhāvasaṃsiddhānbuddhvā saṃvibhajāmi vai //
yena tvaṃ parayā śaktyā dhāritāsi mayā dhare

tenedaṃ kathitaṃ devi ākhyānaṃ dharmasaṃyutam //
piśunāya na dātavyaṃ na ca mūrkhāya mādhavi

tato na copadiṣṭāya na śaṭhāya pradāpayeta //
nādīkṣitāya dātavyaṃ nopasarpyāya yatnataḥ

śaṭhāya ca na dātavyaṃ nāstikāya na mādhavi //
varjayitvā bhāgavataṃ mama karmaparāyaṇam

etatte kathitaṃ devi mama dharmaṃ mahaujasam //
sarvalokahitārthāya kimanyatparipṛcchasi

iti śrīvarāhapurāṇe dvātriṃśadaparādhakathanaṃ nāma saptadaśādhikaśatatamo'dhyāyaḥ