Varaha Purana · Chapter 103

tryadhikaśatatamo'dhyāyaḥ
hotovāca
tadvacca śarkarādhenuṃ śṛṇu rājan yathārthataḥ /
anulipte mahīpṛṣṭhe kṛṣṇājinakuśottare

dhenuṃ śarkarayā rājankṛtvā bhāracatuṣṭayam /
uttamā kathyate sadbhiścaturthāṃśena vatsakam

tadardhaṃ madhyamā proktā kaniṣṭhā bhārakeṇa tu /
tadvadvatsaṃ prakurvīta caturthāṃśena tattvataḥ

atha kuryādaṣṭaśatairūrdhvaṃ nṛpatisattama /
svaśaktyā kārayed‌dhenuṃ tathātmānaṃ pīḍayet

sarvabījāni saṃsthāpya caturdikṣu samantataḥ /
suvarṇasya mukhaṃ śṛṅge mauktikairnayane tathā

guḍena tu mukha kāye jihvā piṣṭamayī tathā /
kambalaṃ paṭṭasūtreṇa kaṇṭhābharaṇabhūṣitām

ikṣupādāṃ raupyakhurāṃ tavanītastanīṃ tathā /
praśastapatraśravaṇāṃ sitacāmarapabhūṣitām

pañcaratnasamāyuktāṃ vastreṇācchāditāṃ tathā /
gandhapuṣpairalaṃkṛtya brāhmaṇāya nivedayet

śrotriyāya daridrāya sādhuvṛttāya dhīmate /
vedavedāṅ‌gaviduṣe sāgnikāya kuṭumbine /
aduṣṭāya pradātavyā na tu matsariṇe dvije

ayane viṣuve puṇye vyatīpāte dinakṣaye /
eṣu puṇyeṣu kāleṣu thathāvibhavaśaktitaḥ

satpātrañca dvijaṃ dṛṣṭ‍vā āgataṃ śrotriyaṃ gṛhe /
tādṛśāya pradātavyā pucchadeśe vimṛṣya ca

pūrvābhimukhamāsthāya athavā sa udaṅmukhaḥ /
gāṃ pūrvābhimukhīṃ kṛtvā vatsamuttarato nyaset

dānakāle tu ye mantrāstānpaṭhitvā samarpayet /
sampūjya vidhivadvipraṃ mudrikākarṇabhūṣaṇaiḥ

svaśaktyā dakṣiṇā deyā vittaśāṭhyavivarjjitaḥ /
haste tu dakṣiṇāṃ dattvā gandhapuṣpasacandanām /
dhenuṃ samarpayettasya mukhañca ca vilokayet

ekāhaṃ śarkarāhāro brāhmaṇastridinaṃ vaset /
sarvapāpaharā dhenuḥ sarvakāmapradāyinī

sarvakāmasamṛddhastu jāyate nātra saṃśayaḥ /
dīyamānaṃ prapaśyanti te yānti paramāṃ gatim

ya idaṃ śṛṇuyād bhaktyā paṭhate vāpi mānavaḥ /
mucyate sarvapāpebhyo viṣṇulokaṃ sa gacchati

iti vārāhapurāṇe śarkarādhenumāhātmyaṃ
nāma tryadhikaśatatamo'dhyāyaḥ /