Varaha Purana · Chapter 102

guḍadhenumāhātmyam
hotovāca -
guḍadhenuṃ pravakṣyāmi sarvakāmārthasādhinīm /
anulipte mahīpṛṣṭhe kṛṣṇājinakuśāstṛte

tasyoparikṛtaṃ vastraṃ guḍamānīya puṣkalam /
kṛtvā guḍamayīṃ dhenuṃ savasāṅ‌kāsyadehinīm

sauvarṇe mukhaśṛṅge ca dantāśca maṇimauktikaiḥ /
grīvā ratnamayī tvasyā ghrāṇaṃ gandhamayantathā

śṛṅge tvagurukāṣṭhena pṛṣṭhaṃ tāmramayaṃ tathā /
pucchaṃ kṣaumamayaṃ tasyāḥ sarvābharaṇabhūṣitām

ikṣupādāṃ raupyakhurāṃ kambalaṃ paṭṭasūtrakam /
ācchādya paṭṭavastreṇa ghaṇṭācāmarabhūṣitām

praśastapatraśravaṇāṃ navanītastanīṃ budhaḥ /
phalairnānāvidhastasyā upaśobhāmprakalpayet

uttamā guḍadhenuḥ syātsadā dhāracatuṣṭayam /
bhāgārdhena tu taulyena caturthāṃśena vatsakam

madhyamā ca tadardhena bhāreṇaikena cādhamā /
vittahīno yathāśaktyā śatairaṣṭābhireva ca

ata ūrdhvantu kartavyā gṛhavittānusārataḥ /
gandhapuṣpādibhiḥ pūjya brāhmaṇāya nivedayet //
śrotriyāya pradātavyā sahasrakanakena tu /
tadardhena mahārāja tasyāpyardhena vā punaḥ

śatena vā śatārdhena yathāśaktyā nivedayet /
gandhapuṣpadibhiḥ pūjya mudrikākarṇapatrakaiḥ

chatrikāpāduke dattvā imaṃ mantramudīrayet /
guḍadheno mahāvīrye sarvasampatprade śubhe

dānādasmācca bhodevi bhakṣyabhojyaṃ prayaccha me /
prāṅ‌mukhovāpi dātā ca brāhmaṇāya nivedayet

vācā kṛtaṃ karmakṛtaṃ manasā yadvicintitam /
mānakūṭaṃ tulākūṭaṃ kanyāgo'rthe udāhṛtam

anṛtaṃ nāśamāyāti guḍadheno dvijārpitā /
dīyamānāṃ prapaśyanti te yānti paramāṃ gatim //
yatra kṣoravahā nadyo ghṛtapāyasakardamāḥ /
ṛṣayo munayaḥ siddhāstatra gacchanti dhenudāḥ

daśa pūrvāndaśa parānātbhānañcaikaviṃśatim /
viṣṇulokaṃ nayatyāśu guḍadhenoḥ prasādataḥ

ayane viṣuve puṇye vyatīpāte dinakṣaye /
sarvadaiva pradātavyā pātraṃ dṛṣṭ‍vā mahāmate

śraddhānvitena dātavyā bhuktimuktiphalapradā /
sarvakāmapradā nityaṃ sarvapāpaharāsmṛtā

guḍadhenoḥ prasādāttu saubhāgyamakhila bhavet /
vaiṣṇavaṃ padamāpnoti daurgatyantasya naśyati

daśadvādaśasāhasrā daśa cāṣṭau ca janmani /
na śokaduḥkhadaurgatyaṃ tasya sañjāyate kvacit

iti paṭhati śṛṇoti ceha samyak
matimapi dadāti yojanānām /
sa iha vibhavaiściraṃ vasitvā
vasati ciraṃ divi devatādipūjyaḥ

iti vārāhapurāṇe śvetopākhyāne guḍadhenumāhātmyaṃ
nāma dvyadhikaśatatamo'dhyāyaḥ //