Varaha Purana · Chapter 104

atha madhudhenudānamāhātmyam//
hotovāca//
madhudhenuṃ pravakṣyāmi sarvapātakanāśinīm //
anulipte mahīpṛṣṭhe kṛṣṇājinakuśottare

dhenuṃ madhumayīṃ kṛtvā sampūrṇaghaṭaṣoḍaśām//
caturthena tathāṃśena vatsakaṃ parikalpayet

sauvarṇaṃ tu mukhaṃ kṛtvā śṛṅgāṇyagurucaṃdanaiḥ//
pṛṣṭhaṃ tāmramayaṃ kṛtvā sāsrāṃ paṭamayīṃ tathā

pādānikṣumayānkṛtvā sitakambalasaṃvṛtān//
mukhaṃ guḍamayaṃ kṛtvā jihvāṃ śarkarayā tathā

oṣṭhau puṣpamayau tasyā dantāḥ phalamayāḥ smṛtāḥ //
darbharomamayī devī khurairaupyaiśca bhūṣitā

praśastapatraśravaṇā pramāṇātparitastatā //
sarvalakṣaṇasaṃyuktā saptadhānyānvitā tathā

catvāri tilapātrāṇi caturdikṣu prakalpayet//
chāditāṃ vastrayugmena kaṇṭhābharaṇabhūṣitām

kāṃsyopadohinīṃ kṛtvā gandhapuṣpaistu pūjitām //
ayane viṣuve puṇye vyatīpāte dinakṣaye

saṃkrāṃtyāmuparāge ca sarvakāle yadṛcchayā //
dravyabrāhmaṇasampattiṃ dṛṣṭvā tāṃ pratipādayet

brāhmaṇāya daridrāya śrotriyāyāhitāgnaye //
āryāvartte samutpanne vedavedāṅgapārage

tādṛśāya pradātavyā madhu dhenurnarottame //
pucchadeśe vimṛśyātha jalapūrṇāṃ sadakṣiṇām

dadyādviprāya dhenuṃ tāṃ mantrapūrvāṃ vicakṣaṇaḥ //
pucchadeśopaviṣṭastu gandhadhūpādipūjitā //
ācchādya vastrayugmena mudrikāvarṇamātrakaiḥ //
svaśaktyā dakṣiṇāṃ dattvā vittaśāṭhyavivarjitaḥ //
jalapūrvaṃ tu karttavyaṃ paścādyānaṃ samarpayet //
rasajñā sarvadevānāṃ sarvabhūtahite ratā

prīyantāṃ pitaro devā madhudheno namo'stu te//
evamuccārya tāṃ dhenuṃ brāhmaṇāya nivedayet

ahaṃ gṛhṇāmi tvāṃ devi kuṭumbārthe viśeṣataḥ //
kāmaṃ kāmadughe kāmānmadhudheno namo'stu te

madhuvāteti mantreṇa dadyādāśucikena tu //
dattvā dhenuṃ mahārāja chatrikopānahau tathā

evaṃ yaḥ kurute bhaktyā madhudhenuṃ narādhipa //
dattvā dānaṃ pāyasena madhunā ca dinaṃ nayet

brāhmaṇaśca trirātraṃ tu madhupāyasasaṃyutam //
evaṃ kṛte tu yatpuṇyaṃ tannibodha narādhipa

yatra nadyo madhuvahā yatra pāyasakardamāḥ //
ṛṣayo munayaḥ siddhāstatra gacchanti dhenudāḥ

tatra bhogānatho bhuṅkte brahmalokaṃ sa gacchati //
krīḍitvā suciraṃ kālaṃ punarmartyamupāgataḥ

sa bhuktvā vipulānbhogānviṣṇulokaṃ sa gacchati//
daśa pūrvāndaśa parānātmānaṃ caikatriṃśakam

nayate viṣṇusāyujyaṃ madhudhenupradānataḥ //
ya idaṃ śṛṇuyādbhaktyā śrāvayedvāpi mānavaḥ //
sarvapāpavinirmukto viṣṇulokaṃ sa gacchati

iti śrīvarāhapurāṇe śvetavinītāśvopākhyāne madhudhenumāhātmyaṃ nāma caturadhikaśatatamo'dhyāyaḥ