Varaha Purana · Chapter 100

atha jaladhenudāna vidhiḥ //
hotovāca //
jaladhenuṃ pravakṣyāmi puṇye'hni vidhipūrvakam //
gocarmmamātraṃ bhūbhāgaṃ gomayenopalepayet

tatra madhye tu rājendra pūrṇaṃ kumbhaṃ ca vinyaset //
jalapūrṇaṃ sugandhāḍhyaṃ karpūrāgurucandanaiḥ

vāsitaṃ gandhatoyena tāṃ dhenuṃ parikalpayet //
vatsaṃ tathāparaṃ kalpya jalena paripūritam

varddhanīkaṃ(varddhanakiṃ) mahārāja yantrapuṣpaiḥ samanvitam //
dūrvāṃkurairupastīrya sragbhiścaiva vibhūṣitam

paṃcaratnāni niḥkṣipya tasmin kumbhe narādhipa //
māṃsīmuśīraṃ kuṣṭhaṃ ca tathā śaileyabālukam

dhātrīphalaṃ sarṣapāśca sarvadhānyāni pārthiva //
caturdikṣvapi pātrāṇi catvāryeva prakalpayet

ekaṃ ghṛtamayaṃ pātraṃ dvitīyaṃ dadhipūritam //
tṛtīyaṃ madhunaścaiva caturthaṃ śarkarāvṛtam

suvarṇamukhacakṣūṃṣi śṛṃgaṃ kṛṣṇāṃgareṣu ca //
praśastapatraśravaṇāṃ muktāphalamayekṣaṇām

tāmrapṛṣṭhāṃ kāṃsyadohāṃ darbharomasamanvitām //
pucchaṃ sūtramayaṃ kṛtvā kṛṣṇābharaṇa ghaṇṭikām

kambale puṣpamālāṃ ca guḍāsyāṃ śuktidantikām //
jihvāṃ śarkarayā kṛtvā navanītena ca stanān

ikṣupādāṃ tu rājendra gandhapuṣpopaśobhitām //
kṛṣṇājinopari sthāpya vastreṇācchāditāṃ tu tām

gandhapuṣpaiḥ samabhyarcya viprāya vinivedayet //
evaṃ dhenuṃ tadā dattvā brāhmaṇe vedapārage

sādhuviprāya rājendra śrotriyāyāhitāgnaye //
tapovṛddhāya pātrāya dātavyā ca kuṭumbine

yo dadāti naro rājan yaḥ paśyati śṛṇoti ca //
pratigṛhṇāti yo vipraḥ sarve mucyanti pātakāt

brahmahā pitṛhā goghnaḥ surāpo gurutalpagaḥ //
muktāḥ sarvapāpaistu gantāro viṣṇumaṃdire

vimuktaḥ sarvapāpaistu viṣṇulokaṃ sa gacchati //
yo'śvamedhena yajate samāptavaradakṣiṇaḥ

jaladhenuṃ ca yo dadyātsamametannarādhipa //
jalāhārastvekadinaṃ tiṣṭhecca jaladhenudaḥ

grāhako'pi trirātraṃ vai tiṣṭhedevaṃ na saṃśayaḥ //
yatra kṣīravahā nadyo madhupāyasakardamāḥ

yatra cāpsarasāṃ gītaṃ tatra yānti jalapradāḥ //
dātā ca dāpakaścaiva pratigrāhī ca yo dvijaḥ

sarvapāpavinirmuktaḥ viṣṇusāyujyamāpnuyuḥ //
jaladhenuvidhānaṃ yaḥ śṛṇuyātkīrttayedapi

sarvapāpavinirmuktaḥ svargameti jitendriyaḥ

iti śrīvarāhapurāṇe śvetavinītāśvopākhyāne jaladhenuvidhirnāma śatatamo'dhyāyaḥ