Varaha Purana · Chapter 101

atha rasa dhenudānamāhātmyam //
hotovāca //
rasadhenuvidhānaṃ te kathayāmi samāsataḥ //
anulipte mahīpṛṣṭhe kṛṣṇājinakuśāstare

rasasya tu ghaṭaṃ rājan sampūrṇaṃ tvaikṣavasya tu //
tadvatsaṅkalpayetprājñaścaturthāṃśena vatsakam

turīyāṃśena vatsaṃ tu tatpārśve sthāpayetsudhīḥ //
ikṣudaṇḍamayāḥ pādā rajatasya khurairyutāḥ

evaṃ kāryā rasairdhenurikṣupādasamanvitā

suvarṇaśṛṃgābharaṇā vastrapucchā ghṛtastanī //
puṣpakambalasaṃyuktā śarkarāmukhajihvakā

dantāḥ phalamayāstasyāḥ pṛṣṭhaṃ tāmramayaṃ śubham //
puṣparomāṃ tu rājendra muktāphalakṛtekṣaṇām

saptavrīhisamāyuktāṃ caturdikṣu ca dīpitām //
sarvopaskarasaṃyuktāṃ sarvagandhādivāsitām

catvāri tilapātrāṇi caturdikṣu niveśayet //
sarvalakṣaṇayuktāya śrotriyāya kuṭumbine

rasadhenuḥ pradātavyā svargakāmena nityadā //
dātā svargamavāpnoti sarvapāpavivarjitaḥ

dātā ca grāhakaścaiva ekakālamabhojanaḥ //
somapānaphalaṃ tasya sarvatra tu phalaṃ bhavet

dīyamānāṃ tu paśyanti te ca yānti parāṃ gatim //
dhenuṃ ca pūjayitvāgre gandhadhūpasragādibhiḥ

pūrvoktaireva mantraistu tatastāṃ prārthayetsudhīḥ //
prārthanāpūrvakaṃ bhaktyā dvijāgryāya nivedayet

daśapūrvānparāṃścaiva ātmānaṃ caikaviṃśakam //
prāpayetparamaṃ sthānaṃ svargānnāvarttate punaḥ

eṣā te kathitā rājanrasadhenuranuttamā //
dadasva ca mahārāja paraṃ sthānamavāpnuhi

ya idaṃ paṭhate nityaṃ śṛṇuyādatha bhaktitaḥ //
sarvapāpavinirmukto viṣṇuloke mahīyate

iti śrīvarāhapurāṇe śvetavinītāśvopākhyāne rasadhenudānamāhātmyaṃ nāma ekādhikaśatatamo'dhyāyaḥ