વરાહ પુરાણ · અધ્યાય 100

અથ જલધેનુદાન વિધિઃ ॥
હોતોવાચ ॥
જલધેનું પ્રવક્ષ્યામિ પુણ્યેઽહ્નિ વિધિપૂર્વકમ્ ॥
ગોચર્મ્મમાત્રં ભૂભાગં ગોમયેનોપલેપયેત્

તત્ર મધ્યે તુ રાજેન્દ્ર પૂર્ણં કુમ્ભં ચ વિન્યસેત્ ॥
જલપૂર્ણં સુગન્ધાઢ્યં કર્પૂરાગુરુચન્દનૈઃ

વાસિતં ગન્ધતોયેન તાં ધેનું પરિકલ્પયેત્ ॥
વત્સં તથાપરં કલ્પ્ય જલેન પરિપૂરિતમ્

વર્દ્ધનીકં(વર્દ્ધનકિં) મહારાજ યન્ત્રપુષ્પૈઃ સમન્વિતમ્ ॥
દૂર્વાંકુરૈરુપસ્તીર્ય સ્રગ્ભિશ્ચૈવ વિભૂષિતમ્

પંચરત્નાનિ નિઃક્ષિપ્ય તસ્મિન્ કુમ્ભે નરાધિપ ॥
માંસીમુશીરં કુષ્ઠં ચ તથા શૈલેયબાલુકમ્

ધાત્રીફલં સર્ષપાશ્ચ સર્વધાન્યાનિ પાર્થિવ ॥
ચતુર્દિક્ષ્વપિ પાત્રાણિ ચત્વાર્યેવ પ્રકલ્પયેત્

એકં ઘૃતમયં પાત્રં દ્વિતીયં દધિપૂરિતમ્ ॥
તૃતીયં મધુનશ્ચૈવ ચતુર્થં શર્કરાવૃતમ્

સુવર્ણમુખચક્ષૂંષિ શૃંગં કૃષ્ણાંગરેષુ ચ ॥
પ્રશસ્તપત્રશ્રવણાં મુક્તાફલમયેક્ષણામ્

તામ્રપૃષ્ઠાં કાંસ્યદોહાં દર્ભરોમસમન્વિતામ્ ॥
પુચ્છં સૂત્રમયં કૃત્વા કૃષ્ણાભરણ ઘણ્ટિકામ્

કમ્બલે પુષ્પમાલાં ચ ગુડાસ્યાં શુક્તિદન્તિકામ્ ॥
જિહ્વાં શર્કરયા કૃત્વા નવનીતેન ચ સ્તનાન્

ઇક્ષુપાદાં તુ રાજેન્દ્ર ગન્ધપુષ્પોપશોભિતામ્ ॥
કૃષ્ણાજિનોપરિ સ્થાપ્ય વસ્ત્રેણાચ્છાદિતાં તુ તામ્

ગન્ધપુષ્પૈઃ સમભ્યર્ચ્ય વિપ્રાય વિનિવેદયેત્ ॥
એવં ધેનું તદા દત્ત્વા બ્રાહ્મણે વેદપારગે

સાધુવિપ્રાય રાજેન્દ્ર શ્રોત્રિયાયાહિતાગ્નયે ॥
તપોવૃદ્ધાય પાત્રાય દાતવ્યા ચ કુટુમ્બિને

યો દદાતિ નરો રાજન્ યઃ પશ્યતિ શૃણોતિ ચ ॥
પ્રતિગૃહ્ણાતિ યો વિપ્રઃ સર્વે મુચ્યન્તિ પાતકાત્

બ્રહ્મહા પિતૃહા ગોઘ્નઃ સુરાપો ગુરુતલ્પગઃ ॥
મુક્તાઃ સર્વપાપૈસ્તુ ગન્તારો વિષ્ણુમંદિરે

વિમુક્તઃ સર્વપાપૈસ્તુ વિષ્ણુલોકં સ ગચ્છતિ ॥
યોઽશ્વમેધેન યજતે સમાપ્તવરદક્ષિણઃ

જલધેનું ચ યો દદ્યાત્સમમેતન્નરાધિપ ॥
જલાહારસ્ત્વેકદિનં તિષ્ઠેચ્ચ જલધેનુદઃ

ગ્રાહકોઽપિ ત્રિરાત્રં વૈ તિષ્ઠેદેવં ન સંશયઃ ॥
યત્ર ક્ષીરવહા નદ્યો મધુપાયસકર્દમાઃ

યત્ર ચાપ્સરસાં ગીતં તત્ર યાન્તિ જલપ્રદાઃ ॥
દાતા ચ દાપકશ્ચૈવ પ્રતિગ્રાહી ચ યો દ્વિજઃ

સર્વપાપવિનિર્મુક્તઃ વિષ્ણુસાયુજ્યમાપ્નુયુઃ ॥
જલધેનુવિધાનં યઃ શૃણુયાત્કીર્ત્તયેદપિ

સર્વપાપવિનિર્મુક્તઃ સ્વર્ગમેતિ જિતેન્દ્રિયઃ

ઇતિ શ્રીવરાહપુરાણે શ્વેતવિનીતાશ્વોપાખ્યાને જલધેનુવિધિર્નામ શતતમોઽધ્યાયઃ