Vāmanapurāṇa, Saromāhātmya · Chapter 26

iti śrīvāmanapurāṇe saromāhātmye pañcaviśo 'dhyāyaḥ
mārkaṇḍeya uvāca
sthāṇutīrthaprabhāvaṃ tu śrotumicchāmyahaṃ mune /
kena siddhiratha prāptā sarvapāpabhayāpahā

sanatkumāra uvāca/
śṛṇu sarvamaśeṣeṇa sthāṇumāhātmyamuttamam /
yacchrutvā sarvapāpebhyo mukto bhavati mānavaḥ

ekārṇave jagatyasmin naṣṭe sthāvarajaṅgame /
viṣṇornābhisamudbhūtaṃ padmamavyaktajanmanaḥ /
tasmin brahma samudbhūtaṃ sarvalokapitāmahaḥ

tasmānmarīcirabhavanmarīceḥ kaśyapaḥ sutaḥ /
kaśyapādabhavad bhāsvāṃstamānmanurajāyata

manostu kṣuvataḥ putra utpanno mukhasaṃbhavaḥ /
pṛthivyāṃ caturantāyāṃ rājāsīd dharmarakṣitā

tasya patnī babhūvātha bhayā nāma bhayāvahā /
mṛtyoḥ sakāśādutpannā kālasya duhitā tadā

tasyāṃ samabhavad veno durātmā vedanindakaḥ /
sa dṛṣṭvā putravadanaṃ kruddho rājā vanaṃ yayau

tatra kṛtvā tapo ghoraṃ dharmeṇāvṛtya rodasī /
prāptavān brahmasadanaṃ puranāvṛttidurvabham

veno rājā samabhavat samaste kṣitimaṇḍale /
sa mātāmahadoṣeṇa tena kālātmajātmajaḥ

ghoṣayāmasa nagare durātmā vedanindakaḥ /
na dātavyaṃ na yaṣṭavyaṃ na hotavyaṃ kadācana

ahameko 'tra vai vandyaḥ pūjyo 'haṃ bhavatāṃ sadā /
mayā hi pālitā yūyaṃ nivasadhvaṃ yathāsukham

tanmatto 'nyo na devo 'sti yuṣmākaṃ yaḥ parāyaṇam /
etacchratvā tu vacanamṛṣayaḥ sarva eva te

parasparaṃ samāgamya rājānaṃ vākyamabravan /
śrutiḥ pramāṇaṃ dharmasya tato yajñaḥ pratiṣṭhitaḥ

yajñairvinā no prīyante devāḥ svarganivāsinaḥ /
aprītā na prayacchanti vṛṣṭiṃ sasyasya vṛddhaye

tasmād yajñaiśca devaiśca dhāryate sacarācaram /
etacchrutvā krodhadṛṣṭirvenaḥ prāha punaḥ punaḥ

na yaṣṭavyaṃ na dātavyamityāha krodhamūrcchitaḥ /
tataḥ krodhasamāviṣṭā ṛṣayaḥ sarva eva te

nijaghnurmantrapūtaiste kuśairvajrasamanvitaiḥ /
tatastvarājake loke tamasā saṃvṛte tadā

dasyubhiḥ pīḍyamānāstān ṛṣīṃste śaraṇaṃ yayuḥ /
tataste ṛṣayaḥ sarve mamanthustasya vai karam

savyaṃ tasmāt samuttasthau puruṣo hrasvadarśanaḥ /
tamūcurṛṣayaḥ sarve niṣīdatu bhavāniti

tasmānniṣādā utpannā venakalmaṣasaṃbhavāḥ /
tataste ṛṣayaḥ sarve manmathurdakṣiṇaṃ karam

mathyamāne kare tasmin utpannaḥ puruṣo 'paraḥ /
bṛhatsālapratīkāśo divyalakṣaṇalakṣitaḥ

dhanurbāṇāṅkitakaraścaścakradhvasamanvitaḥ /
tamutpannaṃ tadā dṛṣṭvā sarve devāḥ savāsavāḥ

abhyaṣiñcan pṛthivyāṃ taṃ rājānaṃ bhūmipālakam /
tataḥ sa rañjayāmāsa dharmeṇa pṛthivīṃ tadā

pitrāḥ'parañjitā tasya tena sā paripālitā /
tatra rājetiśabdo 'sya pṛthivyā rañjanādabhūt

sa rājyaṃ pāpya tebhyastu cintayāmāsa pārthivaḥ /
pitā mama adharmiṣṭho yajñavyucchittikārakaḥ

kathaṃ tasya kriyā kāryā paralokasukhāvahā /
ityevaṃ cintayānasya nārado 'bhyājagāma ha

tasmai sa cāsanaṃ dattvā praṇipatya ca pṛṣṭavān /
bhagavan sarvalokasya jānāsi tvaṃ śubhāśubham

pitā mama durācāro devabrāhmaṇanindakaḥ /
svakarmarahito vipra paralokamavāptavān

tato 'bravīnnāradastaṃ jñātvā divyena cakṣuṣā /
mlecchamaghye samutpannaṃ kṣayakuṣṭhasamanvitam

tacchrutvā vacanaṃ tasya nāradasya mahātmanaḥ /
cintayāmāsa dukhārtaḥ kathaṃ kāryaṃ mayā bhavet

ityevaṃ cintayānasya matirjātā mahātmanaḥ /
putraḥ sa kathyate loke yaḥ pitṝṃstrāyate bhayāt

evaṃ saṃcintya sa tadā nāradaṃ pṛṣṭavān munim /
tāraṇaṃ matpitustasya mayā kāryaṃ kathaṃ mune

nārada uvāca
gaccha tvaṃ tasya taṃ dehaṃ tīrtheṣu kuru nirmalam /
yatra sthāṇormahattīrthaṃ saraḥ saṃnihitaṃ prati

etacchratvā tu vacanaṃ nāradasya mahātmanaḥ /
sacive rājyamādhāya rājā sa tu jagāma ha

sa gatvā cottarāṃ bhūmiṃ mlecchamadhye dadarśa ha /
kuṣṭharogeṇa mahātā kṣayeṇa ca samanvitam

tataḥ śokena mahatā saṃtapto vākyamabravīt /
ha mlecchā naumi puruṣaṃ svagṛhaṃ ca nayāmyaham

tatrāhamenaṃ nirujaṃ kariṣye yadi manyatha /
tatheti sarve te mlecchāḥ puruṣaṃ taṃ dayāparam

ūcuḥ praṇatasarvāṅgā yathā jānāsi tatkuru /
tata ānīya puruṣān śivikāvāhanocitān

dattvā śulkaṃ ca dviguṇaṃ sukhena nayata dvijam /
tataḥ śrutvā tu vacanaṃ tasya rājño dayāvataḥ /
26.39 gṛhītvā śivikāṃ kṣipraṃ kurukṣetreṇa yānti te /
tatra nītvā sthāṇutīrthe avatārya ca te gatāḥ

tataḥ sa rājā madhyāhne taṃ snāpayati vai tadā /
tato vāyurantarikṣe idaṃ vacanamabravīt

mā tāta sāhasaṃ kārṣistīrtha rakṣa prayatnataḥ /
ayaṃ pāpena ghorema atīva pariveṣṭitaḥ

vedanindā mahatpāpaṃ yasyānto naiva labhyate /
so 'yaṃ snānānmahattīrthaṃ nāśayiṣyati tatkṣaṇāt

etad voyarbacaḥ śrutvāduḥkhena mahatānvitaḥ /
uvāca śokasaṃtaptastasya duḥkhena duḥkhitaḥ /
eṣa ghoreṇa pāpena atīva pariveṣṭitaḥ

prāyaścittaṃ kariṣye 'haṃ yadvadiṣyanti devatāḥ /
tatastā devatāḥ sarvā idaṃ vacanamabruvan

snātvā snātvā ca tīrtheṣu abhiṣiñcasva vāriṇā /
ojasā culukaṃ yāvat pratikūle sarasvatīm

snātvā muktimavāpnoti puruṣaḥ śraddhayānvitaḥ /
eṣa svapoṣaṇaparo devadūṣaṇatatparaḥ

brāhmaṇaiśca parityakto naiṣa śuddhyati karhicit /
tasmādenaṃ samuddiśya snātvā tīrtheṣu bhaktitaḥ

abhiṣiñcasva toyena tataḥ pūto bhaviṣyati /
ityetadvacanaṃ śrutvā kṛtvā tasyāśramaṃ tataḥ

tīrthayātrāṃ yayau rājā uddiśya janakaṃ svakam /
sa teṣu plāvanaṃ kurvastīrtheṣu ca dine dine

abhyaṣiḍhcat svapitaraṃ tīrthatoyena nityaśaḥ /
etasminneva kāle tu sārameyo jagāma ha

sthāṇormaṭhe kaulapatirdevadravyasya rakṣitā /
parigrahasya dravyasya paripālayitā sadā

priyaśca sarvasokeṣu devakāryaparāyaṇaḥ /
tasyaivaṃ vartamānasya dharmamārge sthitasya ca

kālena calitā buddhirdevadravyasya nāśene /
tenādharmeṇa yuktasya paralokagatasya ca / /
26.54 dṛṣṭvā yamo 'bravīd vākyaṃ śvayoniṃ va3ja mā ciram /
tadvākyānantaraṃ jātaḥ śva vai saugandhike vane

tataḥ kālena mahatā śvayūthaparivāritaḥ /
paribhūtaḥ saramayā duḥkhena mahatā vṛtaḥ

tyaktvā dvaitavanaṃ puṇyaṃ sānnihatyaṃ yayau saraḥ /
tasmin praviṣṭamātrastu sthāṇoreva prasādataḥ

atīva tṛṣayā yuktaḥ sarasvatyāṃ mamañja ha /
tatra saṃplutadehastu vimuktaḥ sarvākilbiṣaiḥ

āhāralobhena tadā praviveśa kuṭīrakam /
praviśantaṃ tadā dṛṣṭvā śvānaṃ bhayasamanvitaḥ

sa taṃ pasparśa śanakaiḥ sthāṇutīrthe mamañja ha /
patataḥ pūrvatīrtheṣu vipruṣaiḥ pariṣiñcataḥ

śuno 'sya gātrasaṃbhūtairabbindubhiḥ sa siñcitaḥ /
viraktadṛṣṭiśca śunaḥ kṣepeṇa ca tataḥ param

sthāṇutīrthasya māhātmyāt sa putreṇa ca tāritaḥ /
niyatastatkṣaṇāñjāto stutiṃ kartuṃ pracakrame

vena uvāca
prapadye devamīśānaṃ tvāmajaṃ candrabhūṣaṇam /
mahādevaṃ mahātmānaṃ viśvasya jagataḥ patim

namaste devadeveśa sarvaśatruniṣūdana /
deveśa baliviṣṭambhadevadaityaiśca pūjita

virūpākṣa sahasrākṣa tryakṣa yakṣeśvarapriya /
sarvataḥ pāṇipādānta sarvato 'kṣiśiromukha

sarvataḥ śrutimalloke sarvamāvṛtya tiṣṭhasi /
śaṅkukarṇa mahākarma kumbhakarṇārṇavālaya

gajendrakarṇa gokarṇa pāṇikarṇa namo 'stu te /
śatajihva śatāvarta śatodara śatānana

gāyanti tvāṃ gāyatriṇo hyarcayantyarkkamarciṇaḥ /
brahmāṇaṃ tvā śatakrato udvaṃśamiva menire

mūrtau hi te mahāmūrte samudrāmbudharāstathā /
devatāḥ sarva evātra goṣṭhe gāva ivāsate

śarīre tava paśyāmi somamagniṃ jaleśvaram /
nārāyaṇaṃ tathā sūryaṃ brahmāṇaṃ ca bṛhaspatim

bhagavān kāraṇaṃ kāryaṃ kriyākāraṇameva tat /
prabhavaḥ pralayaścaiva sadasaccāpi daivatam

namo bhavāya śarvāya varadāyograrūpiṇe /
andhakāsurahantre ca paśūnāṃ pataye namaḥ

trijaṭāya triśīrṣāya triśulāsakkapāṇaye /
tryambakāya trinetrāya tripuraghra namo 'stu te

namo muṇḍāya caṇḍāya aṇḍāyotpattihetave /
ḍiṇḍimāsaktahastāya ḍiṇḍimuṇḍāya te namaḥ

namordhvakeśadaṃṣṭrāya śuṣkāya vikṛtāya ca /
dhūmralohitakṛṣṇāya nīlagrīvāya te namaḥ

namo 'stvapratirūpāya virupāya śivāya ca /
sūryamālāya sūryāya svarūpadhvajamāline

namo mānātimānāya namaḥ paṭutarāya te /
namo gaṇendranāthāya vṛṣaskandhāya dhanvine

saṃkrandanāya caṇḍāya parṇadhārapuṭāya ca /
namo hiraṇyavarṇāya namaḥ kanakavarcase

namaḥ stutāya stutyāya stutisthāya namo 'stu te /
sarvāya sarvabhakṣāya sarvabhūtaśarīriṇe

namo hotre ca hantre ca sitodagrapatākine /
namo namyāya namrāya namaḥ kaṭakaṭāya ca

namo 'stu kṛśanāśāya śayitāyotthitāya ca /
sthitāya dhāvamānāya muṇḍāya kuṭilāya ca

namo nartanaśīlāya layavāditraśāline /
nāṭyopahāralubdhāya mukhavāditraśāline

namo jyoṣṭhāya śreṣṭhāya balatibalaghātine /
kālanāśāya kālāya saṃsārakṣayarūpiṇe

himavadduhituḥ kānta bhairavāya namo 'stu te /
ugrāya ca namo nityaṃ namo 'stu daśabāhave

citibhasmapriyāyaiva kapālāsaktapāṇaye /
vibhīṣaṇāya bhīṣmāya bhīmavratadharāya ca

namo vikṛtavaktrāya namaḥ pūtogradṛṣṭaye /
pakvāmamāṃsalubdhāya tambivīṇāpriyāya ca

namo vṛṣāṅkavṛkṣāya govṛṣābhirute namaḥ /
kaṭaṅkaṭāya bhīmāya namaḥ paraparāya ca

namaḥ sarvavariṣṭhāya varāya varadāyine /
namo viraktaraktāya bhāvanāyākṣamāline

vibhedabhedabhinnāya chāyāyai tapanāya ca /
aghoraghorarūpāya ghoraghoratarāya ca

namaḥ śivāya śāntāya namaḥ śāntatamāya ca /
bahunetrakapālāya ekamūrte namo 'stu te

namaḥ kṣudrāya lubdhāya yajñabhāgapriyāya ca /
pañcālāya sitāṅgāya namo yamaniyāmine

namaścitrorughaṇṭāya ghaṇṭāghaṇṭanighaṇṭine /
sahasraśataghaṇṭāya ghaṇṭāmālavibhūṣiṇe

praṇasaṃghaṭṭagarvāya namaḥ kilikilipriye /
huṃhuṅkārāya pārāya huṃhuṅkārapriyāya ca

namaḥ samasame nityaṃ gṛhavṛkṣaniketine /
garbhamāṃsaśṛgālāya tārakāya tarāya ca

namo yajñāya yajine hutāya prahutāya ca /
yajñavāhāya havyāya tapyāya tapanāya ca

namastu payase tubhyaṃ tuṇḍānāṃ pataye namaḥ /
annadāyānnapataye namo nānānnabhojine

namaḥ sahasraśīrṣāya sahasracaraṇāya ca /
sahasrodyataśūlāya sahasrābharaṇāya ca

bālanucaragoptre ca bālalīlāvilāsine /
namo bālāya vṛddhāya kṣubdhāya kṣobhaṇāya ca

gaṅgālulitakeśāya muñjakeśāya vai namaḥ /
namaḥ ṣaṭkarmatuṣṭāya trikarmaniratāya ca

nagnaprāṇāya caṇḍāya kṛśāya sphoṭanāya ca /
dharmārthakāmamokṣāṇāṃ kathyāya kathanāya ca

sāṅkhyāya sāṅkhyamukhyāya sāṅkhyayogamukhāya ca /
namo viratharathyāya catuṣpatharathāya ca

kuṣṇājinottarīyāya vyālayajñopavītine /
vaktrasaṃdhānakeśāya harikeśa namo 'stu te /
tryambikāmbikanāthāyavyaktavyaktāya vedhase

kāmakāmadakāmaghna tṛptātṛptavicāriṇe /
namaḥ sarvada pāpaghna kalpasaṃkhyāvicāriṇe

mahāsattva mahābāho mahābala namo 'stu te /
mahāmegha mahāprakhya mahākāla mahādhyute

meghāvarta yugāvarta candrārkapataye namaḥ /
tvamannamannabhoktā ca pakvabhuk pāvanottama

jarāyujāṇḍajāścaiva svedajodbhidajāśca ye /
tvameva devadeveśa bhūtagrāmaścaturvidhaḥ

sraṣṭā carācarasyāsya pātā hantā tathaiva ca /
tvāmāhurbrahya vidvāṃso brahma brahmavidāṃ gatim

manasaḥ paramajyotistvaṃ vāyurjyotiṣāmapi /
haṃhavṛkṣe madhukaramāhustvaṃ brahmavādinaḥ

yajurmayo ṛṅmayastvāmāhuḥ sāmamayastathā /
paṭhyase stutibhirnityaṃ vedopaniṣadāṃ gaṇaiḥ

brāhmaṇāḥ kṣatriyā vaiśyāḥ śūdrā varṇāvarāśca ye /
tvameva meghasaṃghāśca vidyuto 'sanigarjitam

saṃvatsarastvamṛtavo māso māsārdhameva ca /
yugā nimeṣāḥ kāṣṭhāśca nakṣatrāṇi grahāḥ kalāḥ

vṛkṣāṇāṃ kakubho 'si tvaṃ girīṇāṃ himavān giriḥ /
vyāghro mṛgāṇāṃ patatāṃ tārkṣyo 'nantaśca bhoginām

kṣirodo 'syudadhīnāṃ ca yantrāṇāṃ dhanureva ca /
vajraṃ praharaṇānāṃ ca vratānāṃ satyameva ca

tvameva dveṣa icchā ca rāgo mohaḥ kṣamākṣame /
vyavasāyo dhṛtirlobhaḥ kāmakrodhau jayājayau

tvaṃ śarī tvaṃ gadī cāpi khaṭvāṅgī ca śarāsanī /
chettā mettā prahartāsi mantā netā sanātanaḥ

daśalakṣaṇasaṃyukto dharmor'thaḥ kāma eva ca /
samudrāḥ sarito gaṅgā parvatāśca sarāṃsi ca

latāvallyastṛṇauṣadhyaḥ paśavo mṛgapakṣiṇaḥ /
dravyakarmaguṇārambhaḥ kālapuṣpaphalapradaḥ

ādiścantaśca vedānāṃ gāyatrī praṇavastathā /
lohito harito nīlaḥ kuṣṇaḥ pītaḥ sitastathā

kadruśca kapilaścaiva kapoto mecakastathā /
savarṇaścāpyavarṇāśca kartā hartā tvameva hi

tvamindraśca yamaścaiva varuṇo dhanado 'nilaḥ /
upaplavaścitrabhānuḥ svarbhānureva ca

śikṣāhaitraṃ trisauparṇaṃ yajuṣāṃ śatarudriyam /
pavitraṃ ca pavitrāṇāṃ maṅgalānāṃ ca maṅgalam

tinduko girijo vṛkṣe mudgaṃ cākhilajīvanam /
prāṇāḥ sattvaṃ rajaścaiva tamaśca pratipatpitiḥ

prāṇo 'pānaḥ masānaśca udāno vyāna eva ca /
unmeṣaśca nimeṣaśca kṣutaṃ jṛmbhitameva ca

lohitāntargato dṛṣṭirmahāvaktro mahodaraḥ /
śuciromā hariśmaśrurūrdhvakeśaścalācalaḥ

gītavāditranṛtyajño gītavāditrakapriyaḥ /
matsyo jālo jalaukāśca kālaḥ kelikalā kaliḥ

akālaśca vikālaśca duṣkālaḥ kāla eva ca /
mṛtyuśca mṛtyukartā ca yakṣo yakṣabhayaṅkaraḥ

saṃvartako 'ntakaścaiva saṃvartakabalāhakaḥ /
ghaṇṭo ghaṇṭī māhaghaṇṭī cirī mālī ca mātaliḥ

brahmakālayamāgnīnāṃ daṇḍī muṇḍī trimuṇḍadhṛk /
caturyugaścaturvedaścāturhetrapravartakaḥ

cāturāśramyanetā ca cāturvarṇyakarastathā /
nityamakṣapriyo dhūrto gaṇādhyakṣo gaṇādhipaḥ

raktamālyāmbaradharo giriko girikapriyaḥ /
śilpaṃ ca śilpināṃ śreṣṭhaḥ sarvaśilpapravartakaḥ

bhaganetrāṅkuśaścaṇḍaḥ pūṣṇo dantavināśanaḥ /
svāhā svadhā vaṣaṭkāro namaskāro namo namaḥ

gūḍhavrato guhyatapāstārakāstārakāmayaḥ /
dhātā vidhātā saṃdhātā pṛthivyā dharaṇo 'paraḥ

brahma tapaśca satyaṃ ca vratacarya mathārjavam /
bhūtātmā bhūtakṛd bhūtirbhūtabhavyabhavodbhavaḥ

bhūrbhuvaḥ svarṛtaṃ caiva dhruvo dānto maheśvaraḥ /
dīkṣito 'dīkṣitaḥ kānto durdānto dāntasaṃbhavaḥ

candrāvarto yugāvartaḥ saṃvartakapravartakaḥ /
binduḥ kāmo hyaṇuḥ sthūlaḥ karṇikārasrajapriyaḥ

nandīmukho bhīmamukaḥ sumuko durmukhastathā /
hiraṇyagarbhaḥ śakunirmahoragapatirvirāṭ / /
26.136 adharmahā mahādevo daṇḍadhāro gaṇotkaṭaḥ /
gonarde gopratāraśca govṛṣeśvaravāhanaḥ

trailokyagoptā govindo gomārgo mārga eva ca /
sthiraḥ śreṣṭhaśca sthāṇuśca vikrośaḥ krośa eva ca

durvāraṇo durviṣaho duḥsaho duratikramaḥ /
durddharṣo duṣprakāśaśca durdurśo durjayo jayaḥ

śaśāṅkānalaśītoṣṇaḥ kṣuttṛṣṇā ca nirāmayaḥ /
ādhayo vyādhayaścaiva vyādhihā vyādhināśanaḥ

samūhaśca samūhasya hantā devaḥ sanātanaḥ /
śikhaṇḍī puṇḍarīkākṣaḥ puṇḍarīkavanālayaḥ

tryambako daṇḍadhāraśca ugradaṃṣṭraḥ kulāntakaḥ /
viṣāpahaḥ suraśreṣṭhaḥ somapāstvaṃ marutpate /
amṛtāśī jagannāto devadeva gaṇeśvaraḥ

madhuścyutānāṃ madhupo brahmavāk tvaṃ ghṛtacyutaḥ /
sarvalokasya bhoktā tvaṃ sarvalokapitāmahaḥ

hiraṇyaretāḥ puruṣastvamekaḥ tvaṃ strī pumāṃstvaṃ hi napuṃsakaṃ ca /
bālo yuvā sthaviro devadaṃṣṭrā tvanno girirviśvakṛd viśvahartā

tvaṃ vai dhātā viśvakṛtāṃ vareṇyas tvāṃ pūjayanti praṇatāḥ sadaiva /
candrādityau cakṣuṣī te bhavān hi tvameva cāgniḥ prapitāmahaśca /
ārādhya tvāṃ sarakhatīṃ vāglabhante ahorātre nimiṣonmeṣakartā

na brahmā na ca govindaḥ paurāṇā ṛṣayo na te /
māhātmyaṃ vedituṃ śaktā yātātathyena śaṅkara

puṃsāṃ śatasahasrāṇi yatsamāvṛtya tiṣṭhati /
mahatastamasaḥ pāre goptā mantā bhavān sadā

yaṃ vinidrā jitaśvāsāḥ sattvasthāḥ saṃyatendriyāḥ /
jyotiḥ paśyanti yuñjānāstasmai yogātmane namaḥ

yā mūrtayaśca sūkṣmāste na śakyā yā nidarśitum /
tābhirmāṃ satataṃ rakṣa pitā putramivaurasam

rakṣa māṃ rakṣaṇīyo 'haṃ tavānagha namo 'stu te /
bhaktānukampī bhagavān bhaktaścāhaṃ sadā tvayi

jaṭine daṇḍine nityaṃ lambodaraśārīriṇe /
kamaṇḍaluniṣaṅgāya tasmai rudrātmane namaḥ

yasya keśeṣu jīmūtā nadyāḥ sarvāṅgasandhiṣu /
kukṣau samudraścatvārastasmai toyātmane namaḥ

saṃbhakṣya sarvabhūtāni yugānte paryupasthite /
yaḥ śete jalamadhyasthastaṃ prapadye 'mbuśāyinam

praviśya vadanaṃ rāhoryaḥ somaṃ pibate niśi /
grasatyarkaṃ ca kharbhānū rakṣitastava tejasā

ye cātra patitā garbhā rudragandhasya rakṣeṇa /
namaste 'stu khadhā khāhā prāpnuvanti tadadbhute

ye 'ṅguṣṭhamātrāḥ puruṣā dehasthāḥ sarvadehinām /
rakṣantu te hi māṃ nityaṃ te māmāpyāyayantu vai

ye nadīṣu samudreṣu parvateṣu guhāsu ca /
vṛbhamūleṣu goṣṭheṣu kāntāragahaneṣu ca

catuṣpatheṣu rathyāsu catvareṣu sabhāsu ca /
hastyaśvarathaśālāsu jīrṇodyānālayeṣu ca

ye ca pañcasu bhūteṣu diśāsu vidiśāsu ca /
candrārkayormadhyāgatā ye ca candrārkaraśmiṣu

rasātalagatā ye ca ye ca tasmāt paraṃ gatāḥ /
namastebhyo namastebhyo namastebhyaśca nityaśaḥ

yeṣāṃ na vidyate saṃkhyā pramāṇaṃ rūpameva ca /
asaṃkhyeyagaṇā rudrā namastebhyo 'stu nityaśaḥ

prasīda mama bhadraṃ te tava bhāvagatasya ca /
tvayi me hṛdayaṃ deva tvayi buddhirmatistvayi

stutvaivaṃ sa mahādevaṃ virarāma dvijottmaḥ