Vāmanapurāṇa, Saromāhātmya · Chapter 27

iti śrīvāmanapurāṇe saromāhātmye ṣaḍviṃśo 'dhyāyaḥ
sanatkumāra uvacā /
athainamabravīd devastrailokyādhipatirbhavaḥ /
āśvāsanakaraṃ cāsya vākyavid vākyamuttamam

aho tuṣṭo 'smi te rājan stavenānena suvrata /
bahunātra kimuktena matsamīpe vasiṣyasi

uṣitvā suciraṃ kālaṃ mama gātrodbhavaḥ punaḥ /
asuro hyandhako nāma bhaviṣyasi surāntakṛt

hiraṇyākṣagṛhe janma prāpya vṛddhiṃ gamiṣyasi /
pūrvādharmeṇa ghoreṇa vedanindākṛtena ca

sābhilāṣo jaganmāturbhaviṣyasi yadā tadā /
dehaṃ śulena hatvāhaṃ pāvayiṣyāmi samārbudam

tatrāpyakalmaṣo bhūtvā stutvā māṃ bhaktitaḥ punaḥ /
khyātogaṇādhipo bhūtvā nāmnā bhṛṅgiriṭiḥ smṛtaḥ

matsannidhāne sthitvā tvaṃ tataḥ siddhiṃ gamiṣyasi /
venaproktaṃ stavamimaṃ kīrtayed yaḥ śṛṇoti ca

nāśubhaṃ prāpnuyāt kiñcid dīrghamāyuravāpnuyāt /
yathā sarveṣu deveṣu viśiṣṭo bhagavāñśivaḥ

tathā stavo variṣṭho 'yaṃ stavānāṃ venanirmitaḥ /
yaśorājyasukhaiśvaryadhanamānāya kīrtitaḥ

śrotavyo bhaktimāsthāya vidyākāmaiśca yatnataḥ /
vyādhito duḥkhito dīnaścaurarājabhayānvitaḥ

rājakāryavimukto vā mucyate mahato bhayāt /
anenaiva tu dehena gaṇānāṃ śreṣṭhatāṃ vrajet

tejasā yaśasā caiva yukto bhavati nirmalaḥ /
na rākṣasāḥ piśācā vā na bhūtā na vināyakāḥ

vighnaṃ kuryurgṛhe tatra yatrāyaṃ paṭhyate stavaḥ /
śruṇuyād yā stavaṃ nārī anujñāṃ prāpya bhartṛtaḥ

mātṛpakṣe pituḥ pakṣe pūjyā bhavati devavat /
śruṇuyād yaḥ stavaṃ divyaṃ kīrtayed vā samāhitaḥ

tasya sarvāṇi kāryāṇa siddhiṃ gacchanti nityaśaḥ /
manasā cintitaṃ yacca yacca vācānukīrtitam

sarvaṃ saṃpadyate tasya stavanasyānukīrtanāt /
manasā karmaṇā vācā kṛtameno vinaśyati /
varaṃ varaya bhadraṃ te yattvayā manasepsitam

vena uvāca
asya liṅgasya māhātmyāt tathā liṅgasya darśanāt /
mukto 'haṃ pātakaiḥ sarvaistava darśanataḥ kila

yadi tuṣṭo 'si me deva yadi deyo varo mama /
devasvabhakṣaṇāñjātaṃ śvayonau tava sevakam

etasyāpi prasādaṃ tvaṃ kartumarhasi śaṅkara /
etasyāpi bhayānmadhye saraso 'haṃ nimañjitaḥ

devairnivāritaḥ pūrvaṃ tīrthe 'smin snānakāraṇāt /
ayaṃ kṛtopakāraśca etadarthe vṛṇomyaham

tasyaitad vacanaṃ śrutvā tuṣṭaḥ provāca śaṅkaraḥ /
eṣo 'pi pāpinirmukto bhaviṣyati na saṃśayaḥ

prasādānme mahābāho śivalokaṃ gamiṣyati /
tathā stavamimaṃ śrutvā mucyate sarvapātakaiḥ

kurukṣetrasya māhātmyaṃ saraso 'sya mahīpate /
mama liṅgasya cotpattiṃ śrutvā pāpaiḥ pramucyate

sanatkumāra uvāca
ityevamuktvā bhagavān sarvalokanamaskṛtaḥ /
paśyatāṃ sarvalokānāṃ tatraivāntaradhīyata

sa ca śvā tatkṣaṇādeva smṛtvā janma purātanam /
divyamūrtidharo bhūtvā taṃ rājānamupasthitaḥ

kṛtvā snānaṃ tato vainyaḥ pitṛdarśanalālasaḥ /
sthāṇatīrthe kuṭīṃ śūnyāṃ dṛṣṭvā śokasamanvitaḥ

dṛṣṭvā veno 'bravīd vākyaṃ harṣeṇa mahatānvitaḥ /
satputreṇa tvayā vatsa trāto 'haṃ narakārmavāt

tvayābhiṣiñcito nityaṃ tīrthasthapuline sthitaḥ /
asya sādhoḥ prasādena sthāṇordevasya darśanāt

muktāpāpaśca svarlokaṃ yāsye yatra śivaḥ sthitaḥ /
ityevamuktvā rājānaṃ pratiṣṭhāpya maheśvaram

sthāṇutīrthe yayau siddhiṃ tena putreṇa tāritaḥ /
sa ca śvā paramāṃ siddhiṃ sthāṇutīrthaprabhāvataḥ

vimuktaḥ kaluṣaiḥ sarvairjagāma bhavamandiram /
rājā pitṛṛṇairmuktaḥ paripālya vasundharām

putrānutpādya dharmeṇa kṛtvā yajñaṃ nirargalam /
dattvākāmāṃścaviprebhyo bhuktvā bhogān pṛthagvidhān

suhṛdo 'tha ṛṇairmuktvā kāmaiḥ saṃtarpya ca striyaḥ /
abhiṣicya sutaṃ rājye kurukṣetraṃ yayau nṛpaḥ

tatra taptvā tapo ghoraṃ pūjayitvā ca śaṅkaram /
ātmecchayā tanuṃ tyaktvā prayātaḥ paramaṃ padam

etatprabhāvaṃ tīrthasya sthāṇoryaḥ śṛṇuyānnaraḥ /
sarvapāpavinirmuktaḥ prayāti paramāṃ gatim