Vāmanapurāṇa, Saromāhātmya · Chapter 20

iti śrīvāmanapurāṇe saromāhātmye ekonaviṃśo 'dhyāyaḥ
lomaharṣaṇa uvāca /
samudrāstatra catvāro darviṇā āha-tāḥ purā /
pratyekaṃ tu naraḥ snāto gosahasraphalaṃ labhet

yatkiñcit kriyate tasmiṃstapastīrthe dvijottamāḥ /
paripūrṇaṃ hi tatsarvamapi duṣkṛtakarmaṇaḥ

śatasāhasrikaṃ tīrthaṃ tathaiva śatikaṃ dvijāḥ /
ubhayorhi naraḥ snāto gosahasraphalaṃ labhet

somatīrthaṃ ca tatrāpi sarasvatyāstaṭe sthitam /
yasmin snātastu puruṣo rājasūyaphalaṃ labhet

reṇukāśramamāsādya śraddadhāno jitendriyaḥ /
mātṛbhaktyā ca yatpuṇyaṃ tatphalaṃ prāpnuyānnaraḥ

ṛṇairmukto bhavennityaṃ devarṣipitṛsaṃbhavaiḥ /
kumārasyābhiṣekaṃ ca ojasaṃ nāma viśrutam

tasmin snātastu puruṣo yaśasā ca samanvitaḥ /
kumārapuramāpnoti kṛtvā śrāddhaṃ tu mānavaḥ

caitraṣaṣṭhyāṃ site pakṣe yastu śrāddhaṃ kariṣyati /
gayāśrāddhe ca yatpuṇyaṃ tatpuṇyaṃ prāpnuyānnaraḥ

saṃnihityāṃ yathā śrāddhaṃ rāhugraste divākare /
tathā śrāddhaṃ tatra kṛtaṃ nātra kāryā vicāraṇā

ojase hyakṣayaṃ śrāddhaṃ vāyunā kathitaṃ purā /
tasmāt sarvaprayatnena śrāddhaṃ tatra samācaret

yastu snānaṃ śraddadhānaścaitraṣaṣṭhyāṃ kariṣyati /
akṣayyamudakaṃ tasya pitṝṇāmupajāyate

tatra pañcavaṭaṃ nāma tīrthaṃ trailokyaviśrutam /
mahādevaḥ sthito yatra yogamūrtidharaḥ svayam

tatra snātvār'cayitvā va devadevaṃ maheśvaram /
gāṇapatyamavāpnoti daivataiḥ saha modate

kurutīrthaṃ ca vikhyātaṃ kuruṇā yatra vai tapaḥ /
taptaṃ sughoraṃ kṣetrasya karṣaṇārthaṃ dvijottamāḥ

tasya ghoreṇa tapasā tuṣṭa indrobravīd vacaḥ /
rājarṣe parituṣṭo 'smi tapasānena suvrataḥ

yajñaṃ ye ca kurukṣetre kariṣyanti śatakratoḥ /
te gamiṣyanti sukṛtāṃllokān pāpavivarjitān

avahasya tataḥ śakro jagāma tridivaṃ prabhuḥ /
āgamyāgamya caivainaṃ bhūyo bhūyo 'vahasya ca

śatakraturanirviṇṇaḥ pṛṣṭvā pṛṣṭvā jagāma ha /
yadā tu tapasogreṇa cakarṣa dehamātmanaḥ /
tataḥ śakro 'bravīt prītya brūhi yatte cikīrṣitam

kururuvāca
ye śraddadhānāstīrthe 'smin mānavā nivasanti ha /
te prāpnuvantu sadanaṃ brahmaṇaḥ paramātmanaḥ

anyatra kṛtapāpā ye pañcapātakadūṣitāḥ /
asmistīrthe narāḥ snātvā muktā yāntu parāṃ gatim

kurukṣetre puṇyatamaṃ kurutīrthaṃ dvijottamāḥ /
te dṛṣṭvā pāpamuktastu paraṃ padamavāpnuyāt

kurutīrthe naraḥ snāto mukto bhavati kilviṣaiḥ /
kuruṇā samanujñātaḥ prāpnoti paramaṃ padam

svargadvāraṃ tato gacchet śivadvāre vyavasthitam /
tatra snātvā śivadvāre prāpnoti paramaṃ padam

tato gacchedanarakaṃ tīrthaṃ trailokyaviśrutam /
yatra pūrve sthito brahma dakṣiṇe tu maheśvaraḥ

rudrapatnī paścimataḥ padmanābhottare sthitaḥ /
madhye anarakaṃ tīrthaṃ trailokyasyāpi durlabham

yasmin snātastu mucyeta pātakairupapātakaiḥ /
vaiśākhe ca yadā ṣaṣṭhī maṅgalasya dinaṃ bhavet

tadā snānaṃ tatra kṛtvā mukto bhavati pātakaiḥ /
yaḥ prayaccheta karakāṃścaturo bhakṣyasaṃyutān

kalaśaṃ ca tathā dadyādapūpaiḥ pariśobhitam /
devatāḥ prīmayet pūrvaṃ karakairannasaṃyutaiḥ

tatastu kalaśaṃ dadyāt sarvapātakanāśanam /
anenaiva vidhānena yastu snānaṃ samācaret

sa muktāḥ kaluṣaiḥ sarvaiḥ prayāti paramaṃ padam /
anyatrāpi yadā ṣaṣṭhī maṅgalena bhaviṣyati

tatrāpi muktiphaladā kriyā tasmin bhaviṣyati /
tīrthe ca sarvatīrthānāṃ yasmin snāto dvijottamāḥ

sarvadevairanujñātaḥ paraṃ padamavāpnuyāt /
kāmyakaṃ ca vanaṃ puṇyaṃ sarvapātakanāśanam

yasmin praviṣṭamātrastu mukto bhavati kilbiṣaiḥ /
yamāśritya vanaṃ puṇyaṃ savitā prakaṭaḥ sthitaḥ

pūṣā nāma dvijaśreṣṭha darśanānmuktimāpnuyāt /
ādityasya dine prāpte tasmin snātastu mānavaḥ /
viśuddhadeho bhavati manasā cintitaṃ labhet