Vāmanapurāṇa, Saromāhātmya · Chapter 17

iti kṣīvāmanurāṇe saromāhātmye ṣoḍaśo 'dhyāyaḥ
ṛṣaya ūcuḥ /
kathaṃ maṅkaṇakaḥ siddhaḥ kasmājjāto mahānṛṣiḥ /
nṛtyamānastu devena kimarthaṃ sa nivāritaḥ

lomaharṣaṇa uvāca
kaśyapasya suto jajñe mānaso maṅkaṇomuniḥ /
snānaṃ kartuṃ vyavasito gṛhītvā valkalaṃ dvijaḥ

tatra gatā hyapsaraso rambhādyāḥ priyadarśanāḥ /
snāyanti rucirāḥ snigdhāstena sārdhamaninditāḥ

tato munestadā kṣobhādretaḥ skannaṃ yadambhasi /
tadretaḥ sa tu jagrāha kalaśe vai mahātapāḥ

saptadhā pravibhāgaṃ tu kalaśasthaṃ jagāma ha /
tatrarṣayaḥ spata jātā viduryān marutāṃ gaṇān /
17.5 vāyuvego vāyubalo vāyuhā vāyumaṇḍalaḥ /
vāyujvalo vāyureto vāyucakraśca vīryavān

ete hyapatyāstasyarṣerdhārayanti carācaram /
purā maṅkaṇakaḥ siddhaḥ kuśāgreṇeti me śrutam

kṣataḥ kila kare viprāstasya śākaraso 'sravat /
sa vai śākarasaṃ dṛṣṭvā harṣāviṣṭaḥ pranuttavān

tataḥ sarvaṃ pranṛttaṃ ca sathāvaraṃ jaṅmaṃ ca yat /
pranuttaṃ ca jagad dṛṣṭvā tejasā tasya mohitam

brahmādibhiḥ suraistatra ṛṣibhiśca tapodhanaiḥ /
vijñapto vai mahādevo munerarthe dvijottamāḥ

nāya nṛtyed yathā deva tathā tvaṃ kartumarhasi /
tato devo muniṃ dṛṣṭvā harṣāviṣṭamatīva hi

suraṇāṃ hitakāmārthaṃ mahādevo 'bhyabhāṣata /
harṣasthānaṃ kimarthaṃ ca tavedaṃ munisattama /
tapasvino dharmapathe sthitasya dvijasattama

kiṃ na paśyasi me brahman karācchākarasaṃ srutam /
yaṃ dṛṣṭvāhaṃ pranutto vai harṣeṇa mahatānvitaḥ

taṃ prahasyābravīd devo muniṃ rāgema mohitam /
ahaṃ na vismayaṃ vipra gacchāmīha prapaśyatām

evamuktvā muniśreṣṭhaṃ devadevo mahādyutiḥ /
aṅgulyagreṇa viprendrāḥ svāṅguṣṭhaṃ tāḍayad bhavaḥ

tato bhasma kṣatāt tasmānnirgataṃ himasannibham /
tad dṛṣṭvā vrīḍitovipraḥ pādayoḥ patito 'bravīt

nānyaṃ devādahaṃ manye śūlapāṇermahātmanaḥ /
carācarasya jagato varastvamasi śūladhṛk

tvadāśrayāśca dṛśyante surā brahmādayo 'nagha /
pūrvastvamasi devānāṃ kartā kārayitā mahat

tvatprasādāt surāḥ sarve modante hyakulobhayāḥ /
evaṃ stutvā mahādevamṛṣiḥ sa praṇato 'bravīt

bhagavaṃstvaprasādāddhi tapo me na kṣayaṃ vrajet /
tato devaḥ prasānnātmā tamṛṣiṃ vākyamabravīt

īśvara uvāca
tapaste varddhatāṃ vipra matprasādāt sahasradhā /
āśrame ceha vatsyāmi tvayā sārddhamahaṃ sadā

saptasārasvate snātvā yo mamarciṣyate naraḥ /
na tasya durlabhaṃ kiñcidiha loke paratra ca

sārasvataṃ ca taṃ lokaṃ gamiṣyati na saṃśayaḥ /
śivasya ca prasādena pāpnoti paramaṃ padam