Vāmanapurāṇa, Saromāhātmya · Chapter 16

iti śrīvāmanapurāṇe saromāhātmne pañcadaśo 'dhyāyaḥ
lomaharṣaṇa uvāca /
pavanasya hrade snātvā dṛṣṭvā devaṃ maheśvaram /
vimuktaḥ kaluṣaiḥ sarvaiḥ śaivaṃ padamavāpnuyāt

putraśokena pavano yasmillīno babhūva ha /
tataḥ sabrahmakairdevaiḥ prasādya prakaṭīkṛtaḥ

ato gaccheta amṛtaṃ sthānaṃ tacchūlapāṇinaḥ /
yatra devaiḥ sagandharvaiḥ hanumān prakaṭīkṛtaḥ

tatra tīrthe naraḥ snātvā amṛtatvamavāpnuyāt /
kulottāraṇamāsādya tīrthasevī dvijottamaḥ

kulāni tārayet sarvān mātāmahapitāmahān /
śālihotrasya rājarṣestīrthaṃ trailokyaviśrutam

tatra snātvā vimuktastu kaluṣairdaihasaṃbhavaiḥ /
śrīkuñjaṃ tu sarasvatyāṃ tīrthaṃ trailokyaviśrutam

tatra snātvā naro bhaktyā agniṣṭomaphalaṃ labhet /
tato naimiṣakuñjaṃ tu samāsādya naraḥ śuciḥ

naimiṣasya ca snānena yat puṇyaṃ tat samāpnuyāt /
tatra tīrthaṃ mahākhyātaṃ vedavatyā niṣevitam

rāvaṇena gṛhītāyāḥ keśeṣu dvijasattamāḥ /
tadvadhāya ca sā prāṇān mumuce śokakarśitā

tato jātā gṛhe rājño najakasya mahātmanaḥ /
sītā nāmeti vikhyātā rāmapatnī pativratā

sā hṛtā rāvaṇeneha vināśāyātmanaḥ svayam /
rāmeṇa rāvaṇaṃ hatvā abhiṣicya vibhiṣaṇam

samānītā gṛhaṃ sītā kīrtirātmavatā yathā /
tasyāstīrthe naraḥ snātvā kanyāyajñaphalaṃ labhet

vimuktaḥ kaluṣaiḥ sarvaiḥ prāpnoti paramaṃ padam /
tato gaccheta sumahad brahmaṇaḥ sthānamuttamama

yatra varṇāvaraḥ snātvā brāhmaṇyaṃ labhate naraḥ /
brāhmaṇaśca viśuddhatmā paraṃ padamavāpnuyāt

tato gaccheta somasya tīrthaṃ trailokyadurlabham /
yatra somastapastaptvā dvijarājyamavāpnuyāt

tatra snātvār'cayitvā ca svapitṝn daivatāni ca /
nirmalaḥ svargamāyāti kārtikyāṃ candramā yathā / /
16.16 saptasārasvataṃ tīrthaṃ trailokyasyāpi durlabham /
yatra sapta sarasvatya ekībhūtā vahanti ca

suprabhā kāñcanākṣī ca viśālā mānasahradā /
sarasvatyoghanāmā ca suveṇurvimalodakā

pitāmahasya yajataḥ puṣkareṣu sthitasya ha /
abruvan ṛṣayaḥ sarve nāyaṃ yajño mahāphalaḥ

na dṛśyate saricchreṣṭhā yasmādiha sarasvatī /
tachrutvā bhagavān prītaḥ sasmārātha sarasvatīm

pitāmahena yajatā āhūtā puṣkareṣu vai /
suprabhā nāma sā devī tatra khyātā sarasvatī

tāṃ dṛṣṭvā munayaḥ prītā vegayuktāṃ sarasvatīm /
pitāmahaṃ mānayantīṃ te tu tāṃ bahu menire

evameṣā saricchreṣṭhā puṣkarasthā sarasvatī /
samānītā surukṣetre maṅkaṇena mahātmanā

naimiṣe munayaḥ sthitvā śaunakādyāstapodhanāḥ /
te pṛcchanti mahātmānaṃ paurāṇaṃ lomaharṣaṇam

kathaṃ yajñaphalo 'smākaṃ vartatāṃ satpathe bhavet /
tato 'brevīnmahābhāgāḥ praṇamya śirasā ṛtīn

sarasvatī sthitā yatra tatra yajñaphalaṃ mahat /
etacchrutvā tu manuyo nānāsvādhyāyavedinaḥ

samāgamya tataḥ sarve sasmaruste sarasvatīm /
sā tu dhyātā tatastatra ṛṣibhiḥ satrayājibhiḥ

samāgatā plāvanārthaṃ yajñe teṣāṃ mahātmanām /
naimiṣe kāñcanākṣī tu smṛtā maṅkaṇakena sā

samāgatā kurukṣetraṃ puṇyatoya sarasvatī /
gayasya yajamānasya gayeṣveva mahākratum

āhūtā ca saricchreṣṭhā gayayajñe sarasvatī /
viśālāṃ nāma tāṃ prāhurṛṣayaḥ saṃśitavratāḥ

sarit sā hi samāhūtā maṅkaṇena mahātmanā /
kurukṣetraṃ samāyātā praviṣṭā ca mahānadī

uttare kośalābhāge puṇye devarṣisevite /
uddālakena muninā tatra dhyātā sarasvatī

ājagāma saricchreṣṭhā taṃ deśaṃ munikāraṇāt /
pūjyamānā munigaṇairvalkalājinasaṃvṛtaiḥ

manohareti vikhyātā sarvapāpakṣayāvahā /
āhūtā sā kurukṣetre maṅkaṇena mahātmanā /
ṛṣeḥ saṃmānanārthāya praviṣṭā tīrthamuttamam

suveṇuriti vikhyātā kedāre yā sarasvatī /
sarvapāpākṣayā jñeyā ṛṣisiddhiniṣevitā

sāpi teneha muninā ārādhya parameśvaram /
ṛṣīṇāmupakārārthaṃ kurukṣetraṃ praveśitā

dakṣeṇa yajatā sāpi gaṅgādvāre sarasvatī /
vimalodā bhagavatī dakṣeṇa prakaṭīkṛtā

samāhūtā yayau tatra maṅkaṇena mahātmanā /
kurukṣetre tu kuruṇā yajitā ca sarasvatī

saromadhye samānītā mārkaṇḍeyena dhīmatā /
abhiṣṭūya mahābhāgāṃ puṇyatoyāṃ sarasvatīm

yatra maṅkaṇakaḥ siddhaḥ saptasārasvate sthitaḥ /
nṛtyamānaśca devena śaṅkareṇa nivāritaḥ