Vamana Purana · Chapter 27

iti śrīvāmanapurāṇe ṣaḍviṃśo 'dhyāyaḥ
pulastya uvāca /
samāgatān surān dṛṣṭvā nandirākhyātavān vibhoḥ /
athotthāya hariṃ bhaktyā pariṣvajya nyapīḍayat

brahmaṇāṃ śirasā natvā samābhāṣya śatakratum /
ālokyānyān suragaṇān saṃbhāvayat sa śaṅkaraḥ

gaṇāśca jaya deveti vīrabhadrapurogamāḥ /
śaivāḥ pāśupatādyāśca viviśurmandarālam

tatastasmānmahāśailaṃ kailāsaṃ saha daivataiḥ /
jagāma bhagavān śarvaḥ kartuṃ vaivāhikaṃ vidhim

tatastasmin mahāśaile devamātāditiḥ śubhā /
surabhiḥ surasā cānyāścakrarmaṇḍanamākulāḥ

mahāsthiśekharī cārurocanālikalo haraḥ /
siṃhājinī cālinīlabhujaṅgakṛtakuṇḍalaḥ

mahāhiratnavalayo hārakeyūranūpuraḥ /
samunnātajaṭābhāro vṛṣabhastho virājate

tasyāgrato gaṇāḥ svaiḥ svairārūḍhā yānti vāhanaiḥ /
devāśca pṛṣṭhato jagmurhutāśanapurogamāḥ

vainateyaṃ samārūḍhaḥ saha lakṣmyā janārdanaḥ /
prayāti devapārśvastho haṃsena ca pitāmahaḥ

gajādhirūḍho devendraśchatraṃ śuklapaṭaṃ vibhuḥ /
dhārayāmāsa vitataṃ śacyā saha sahasradṛk

yamunā saritāṃ śreṣṭhā bālavyajanamuttamam /
śvetaṃ pragṛhya hastena kacchape saṃsthitā yayau

haṃsakundandusaṃkāśaṃ bālavyājanamuttamam /
sarasvatī saricchreṣṭhā gajārūḍhā samādadhe

ṛtavaḥ ṣaṭ samādāya kusumaṃ gandhasaṃyutam /
pañcavarṇaṃ maheśānaṃ jagmuste kāmacāriṇaḥ

mattamairāvaṇanibhaṃ gajamāruhya vegavān /
anulepanamādāya yayau tatra pṛthūdakaḥ

gandharvāstumbarumukhā gāyanto madhurasvaram /
anujagmurmahādevaṃ vādayantaś ca kinnarāḥ

nṛtyantyo 'psaraścaiva stuvanto munayaśca tam /
gandharvā yānti deveśaṃ trinetraṃ śūlapāṇinam

ekādaśa tathā koṭyo rudrāṇāṃ tatra vai yayuḥ /
dvādaśaivāditeyānāmaṣṭau koṭyo vasunapi

saptaṣaṣṭistathā koṭyo gaṇānāmṛṣisattama /
caturviśat tathā jagmurṛṣīṇāmūrdhvaretasām

asaṃkhyātāni yūthāni yakṣakinnararakṣasām /
anujagmurmaheśānaṃ vivāhāya samākulāḥ

tataḥ kṣaṇena deveśaḥ kṣmādharādhipatestalam /
saṃprāptāstvāgaman śailāḥ kuñjarasthāḥ samantataḥ

tato nanāma bhagavāṃstrinetraḥ sthāvarādhipam /
śailāḥ praṇemurīśānaṃ tato 'sau mudito 'bhavat

samaṃ suraiḥ pārṣadaiśca viveśa vṛṣaketanaḥ /
nandinā darśite mārge śailarājapuraṃ mahat

jīmūtaketurāyāta ityevaṃ nagarastriyaḥ /
nijaṃ karma parityajya darśanavyāpṛtābhavan

mālyārddhamanyā cādāya kareṇaikena bhāminī /
keśapāśaṃ dvitīyena śaṅkarābhimukhī gatā

anyālaktakarāgāḍhyaṃ pādaṃ kṛtvākulekṣaṇā /
analaktakamekaṃ hi haraṃ draṣṭumupāgatā

ekenākṣṇāñjitenaiva śrutvā bhīmamupāgatam /
sāñjanāṃ ca pragṛhyānyā śalākāṃ suṣṭhu dhāvati

anyā sarasanaṃ vāsaḥ pāṇinādāya sundarī /
unmattevāgamannagnā haradarśanalālāsā

anyātikrāntamīśānaṃ śrutvā stanabharālasā /
anindata ruṣā bālā yauvanaṃ svaṃ kṛśodarī

itthaṃ sa nagarastrīṇāṃ kṣobhaṃ saṃjanayan haraḥ /
jagāma vṛṣabhārūḍho divyaṃ śvaśuramandiram

tataḥ praviṣṭaṃ prasamīkṣya śaṃbhuṃ śailendraveśmanyabalā bruvanti /
sthāne tapo duścaramambikāyāścīrṇaṃ mahāneṣa surastu śaṃbhuḥ

sa eṣa yenāṅgamānaṅgatāṃ kṛtaṃ kandarpanāmnaḥ kusumāyudhasya /
kratoḥ kṣayī dakṣavināśakartā bhagākṣihā śūladharaḥ pinākī

namo namaḥ śaṅkara śūlapāṇe mṛgāricarmāmbara kālaśatro /
mahāhihārāṅkitakuṇḍalāya namo namaḥ pārvativallabhāya

itthaṃ saṃstūyamānaḥ surāpatividhṛtenātapatreṇa śaṃbhuḥ siddhairvandyaḥ sayakṣairahikṛtavalayī cārubhasmopaliphtaḥ /
agrasthenāgrajena pramuditamanasā viṣṇunā cānugena vaivāhīṃ maṅgalāḍhyāṃ hutavahamuditāmārurohātha vedīm

āyāte tripurāntake sahacaraiḥ sārdhaṃ ca spatarṣibhirvyagro 'bhūd girirājaveśmanijanaḥ kālyāḥ samālaṅkṛtau /
vyākulyaṃ samupāgatāśca girayaḥ pūjādinā devatāḥ prāyovyākulitā bhavanti suhṛdaḥ kanyāvivāhotsukāḥ

prasādhya devīṃ girijāṃ tataḥ strayo dukūlaśuklābhivṛtāṅgayaṣcikām /
bhrātrā sunābena tadotsave kṛte sā śaṅkarābhyāśamathopapāditā

tataḥ śubhe harmyatale hiraṇmaye sthitāḥ surāḥ saṃkarakāliceṣṭitam /
pasyanti devo 'pi samaṃ kuśāṅgyā lokānujuṣṭaṃ padamāsasāda

yatra krīḍā vicitrāḥ sakusumataravo vāriṇo bindupātairgandhāḍhyairgandhacūrṇaiḥ praviralamavanau guṇḍitau guṇḍikāyām /
muktādāmaiḥ prakāmaṃ haragiritanayā krīḍanārthaṃ tadāghyanat paścātsindūrapuñjairaviratavitataiś cakratuḥ kṣmāṃ suraktām

evaṃ krīḍāṃ haraḥ kṛtvā samaṃ ca girikanyayā /
āgacchad dakṣiṇāṃ vedimṛṣibhiḥ sevitāṃ dṛḍhām

athājagāma himavān śuklalāmbaradharaḥ śuciḥ /
pavitrapāṇirādāya madhuparkamathojjvalam

upaviṣṭastrinetrastu śākrīṃ diśamapaśyata /
saptarṣikāṃśca śailandraḥ sūpaviṣṭo 'valokayan

sukhāsīnāsya śarvasya kṛtāñja0lipuṭo giriḥ /
provāca vacanaṃ śrīmān dharmasādhanamātmanaḥ

himavānuvāca /
matputrīṃ bhagavan kālīṃ pautrīṃ ca pulahāgraje /
pitṝṇāmapi dauhitrīṃ pratīcchemāṃ mayodyatām

pulastya uvāca /
ityevamuktvā śailendro hastaṃ hastena yojayan /
prādāt pratīccha bhagavan idamuccairudīrayan

hi uvāca /
na me 'sti mātā na pitā tathaiva na jñātayo vāpi ca bānadhavāśca /
nirāśrayo 'haṃ kiriśṛṅgavāsī sutāṃ pratīcchāsi tavādrirāja

ityevamuktvā varado 'vapīḍayat karaṃ kareṇādrikumārikāyāḥ /
sā cāpi saṃsparśamavāpya śaṃbhoḥ parāṃ mudaṃ labdhavatī surarṣe

tathādhirūḍho varado 'tha vediṃ sahādriputryā madhuparkamaśnana /
dattvā ca lājān kalamasya śuklāṃstato viriñco girijāmuvāca

kāli pasyasva vadanaṃ bhartuḥ śaśadharaprabham /
samadṛṣṭiḥ sthirā bhūtvā kuruṣvāgneḥ pradakṣiṇam

tato 'mbikā haramukhe dṛṣṭe śaityamupāgatā /
yathārkaraśmisaṃtaptā prāpya vṛṣṭimivāvaniḥ

bhūyaḥ prāha vibhorvaktramīkṣasveti pitāmahaḥ /
lajjayā sāpi dṛṣṭeti śanairbrahmāṇamabravīt

samaṃ girijayā tena hutāśastriḥpradakṣiṇam /
kṛto lājāśca haviṣā samaṃ kṣiptā hutāśane

tato harāṅghrirmālinyā gṛhīto hāyakāraṇāt /
kiṃ yācasi ca dāsyāmi muñcasveti haro 'bravīt

mālinī śaṅkaraṃ prāha matsakhyā dehi śaṅkara /
saubhāgyaṃ nijagotrīyaṃ tato mokṣamavāpsyasi

athovāca mahādevo dattaṃ mālini muñca mām /
saubhāgyaṃ nijagotrīyaṃ yo 'syāstaṃ śṛṇu vacmi te

yo 'sau pītāmbaradharaḥ śaṅkhadhṛk madhusūdanaḥ /
etadīyo hi saubhāgyo datto 'smadgotrameva hi

ityevamukte vacane pramumoca vṛṣadhvajam /
mālinī nijagotrasya śubhacāritramālinī

yadā haro hi mālinyā gṛhītaścaraṇe śubhe /
tadā kālīmukhaṃ brahma dadarśa śaśino 'dhikam

tad dṛṣṭvā kṣobhamagamat śukracyutimavāpa ca /
tacchukraṃ bālukāyāṃ ca khilīcakre sasādhvasaḥ

tato 'bravīdvaro brahman na dvijān hantumarhasi /
amī maharṣayo dhanyā vālakhilyāḥ pitāmaha

tato maheśavākyānte samuttasthustapasvinaḥ /
aṣṭāśītisahasrāṇi vālakhilyā iti smṛtāḥ

tato vivāhe nirvṛtte praviṣṭaḥ kautukaṃ haraḥ /
reme sahomayā rātriṃ prabhāte punarutthitaḥ

tato 'draputrīṃ samavāpya śaṃbhuḥ saraiḥ samaṃ bhūtagaṇaiś ca hṛṣṭaḥ /
saṃpūjitaḥ parvatapārthivena sa mandaraṃ śīghramupādajagāma

tataḥ surān brahmaharīndramukhyān praṇamya saṃpūjya yathāvibhāgam /
visarjya bhūtaiḥ sahito mahīdhramadhyāvasanmandaramaṣṭamūrtiḥ