Vairāgyaśatakam · Verses 61-80

kopo maitrāvaruṇeḥ śāpo vā tārkikasya muneḥ /
saṃsmaryate yadi sakṛcchatrorapi māstu śakrapadam

gacchatyamarāvatyāṃ gacchatu caturānanasya vā nagare /
punarāgantavyaṃ yadi puṃsā kiṃ sādhitaṃ bhavati

bhuktā bahavo dārā labdhāḥ putrāśca pautrāśca /
nītaṃ śatamapyāyuḥ satyaṃ vada martumasti manaḥ

viśleṣaṇasvabhāvānpaśyanviṣayānkaroti ko mamatām /
naśyadavasthāpannaṃ kaḥ krīṇīte dhanairaśvam

annābhāve mṛtyuḥ śālibhirannāni śālayo vṛṣṭyā /
vṛṣṭistapaseti vadannamṛtyave tattapaścaratu

kiṃ na nigṛhṇanti manaḥ kiṃ na bhajante janāḥ śivaṃ śaraṇam /
abhisaṃdhibhedamātrānmokṣopāye na badhyante

bhogāya pāmarāṇāṃ yogāya vivekināṃ śarīramidam /
bhogāya ca yogāya ca na kalpate durvidagdhānām

brāhmaṇacaṇḍālā ityāha muniryanmahāpathikān /
bhavamārgamahāpathikānadhikṛtyaiva pravartitaṃ caitat

ekadvāḥ kṣitipatiṣu dvitrā deveṣu pañcaṣā druhiṇe /
etāvanto jagati brahmānandārṇavasya kaṇāḥ

ajñānenāpihite vijñāne karma kiṃ kurute /
vikale cakṣuṣi tamasā vyādāya mukhaṃ kimīkṣeta

atikaluṣamāśunaśvaramāpātasphuraṇamanabhilāṣakaram /
api hṛṣyanti janāḥ kathamavalambya jñānakhadyotam

ayutaṃ niyutaṃ vāpi pradiśantu prākṛtāya bhogāya /
krīṇanti na bilvadalaiḥ kaivalyaṃ pañcaṣairmūḍhāḥ

yāvatkila ceṣṭante tāvatpāśe nibadhyate granthiḥ /
nibhṛtaṃ yadi vartante kālena sraṃsate pāśaḥ

uparundhanti śvāsānmunayo nāśnanti na pibanti /
stūyante sujanaiḥ kiṃ kaṇṭhe kurvanti kanakapāśamime

kāmaṃ janāḥ smayante kailāsavilāsavarṇanāvasare /
sādhanakathanāvasare sācīkurvanti vaktrāṇi

vaṅgāḥ kathamaṅgāḥ kathamityanuyuṅkte vṛthā deśān /
kīdṛkkṛtāntapuramiti ko 'pi na jijñāsate lokaḥ

tyaktavyo mamakārastyaktuṃ yadi śakyate nāsau /
kartavyo mamakāraḥ kiṃ tu sa sarvatra kartavyaḥ

putrā iti dārā iti poṣyānmūrkho janānbrūte /
andhe tamasi nimajjannātmā poṣya iti nāvaiti

yaccintitamadhigarbhaṃ yacca ciraṃ cintitaṃ narake /
viṣayānilasaṃsargānmamṛje tatsarvamekapade

bāhyagatāgataśīlā prāṇasya śvāsalakṣaṇā vṛttiḥ /
karṣati manaso vṛttiṃ kulaṭeva kulastriyaṃ mugdhām