Vairāgyaśatakam · Verses 81-100

atigambhīramanāvilamakṣobhyamadṛṣṭapāramavilaṅghyam /
aviralataraṅgasaṃkulamaikṣiṣi vijñānasāgaraṃ mahatām

ghoraṃ bhavamapahātuṃ kecidaghoraṃ prapadyante /
saṃsaraṇakātarāṇāṃ saṃśaraṇaṃ śāṃbhavī śaktiḥ

pāśo yadi moktavyaḥ paśupatirevopasartavyaḥ /
na khalu vyatimucyante paśavaḥ pāśena saṃbaddhāḥ

alamalamanubhūtābhirmātṛbhiralamastu pitṛbhiśca /
bhavitavyaṃ yadi nityavadarthaṃ mātuḥ pituścāstu

dhanyāste bahudevāḥ svāmini yeṣāṃ na durbhikṣam /
jātu na jānīmo vayamekaṃ taṃ svāminaṃ pūrṇam

santu bṛhanto devāḥ kiṃ tu na tānnantumīhate cetaḥ /
āḍhyavadānyanyāyādantakajitameva cintayenmanasi

nidhyāyasi viṣayasukhaṃ na dhyāyasi viṣamamasya paripākam /
bandhuṃ tameva cintaya baddhuṃ moktuṃ ca yaḥ kṣamate

sadanaṃ gurūpasadanaṃ śaraṇaṃ pañcākṣarīpuraścaraṇam /
dhanamabhilāṣanirodhanamantyāśramavartināṃ puṃsām

kau pitarau kaḥ putraḥ kaḥ svāmī yaḥ prapañcasya /
pratyastamite bhede kimidaṃ kimidamiti vipraśnaḥ

sa vidhiryatte vidadhati sa pratiṣedho yato nivartante /
sopaniṣadyadbruvate śaivāśravamartino dhīrāḥ

tyaja saṃsāramasāraṃ bhaja śaraṇaṃ pārvatīramaṇam /
viśvasihi śrutiśikharaṃ viśvamidaṃ tava nideśakaram

bhavyamabhavyaṃ vā naḥ pralikhatu vedhāḥ sudurmedhāḥ /
savyamasavyaṃ vā naḥ śaraṇaṃ caraṇaṃ maheśasya

vedhāḥ kathaṃ hariḥ kathamiti tu praśne vayaṃ mūkāḥ /
śivamekaṃ jānīmo na śivādanyaṃ vijānīmaḥ

dāruṇamasipattravanaṃ dāruṇatamamandhatāmisram /
kā vā tataḥ kṣatirnaḥ śaivā vayamā caturvadanāt

kṛtadīkṣo ghoramakhe kulakūṭastho bharadvājaḥ /
vidyeśvareṣu kaścana pitāmaho na iti visrambhaḥ

kalahaḥ kadāpi māstviti kalitaśarīraikyayoḥ śivayoḥ /
ahamasmyahamasmīti prāptaḥ kalaho mama trāṇe

narakāyāpi na bhogānnarādhamāyāpi nānyasurān /
manyante katicidamī māheśvaramāśritā yogam

jñātuṃ hātuṃ viṣayaṃ śrotuṃ mantuṃ gṛhītumātmānam /
vatsā yadi na hi ghaṭate tatsādhayatāvimuktāya

sāṃkhyaṃ yogaṃ nigamā bhaktiḥ karma pratītiriti /
ekatra sakalametatkevalamavimuktamekatra

baddhaḥ kaste vakṣyati mukto muktiṃ vijānāti /
yāsyasi cedavimuktaṃ jñāsyasi viśveśvarasya mukhāt