Vairāgyaśatakam · Verses 21-40

anadhigate kāmasukhe kālena yathā pravartate taruṇaḥ /
evaṃ brahmasukhe 'pi pravartate ko 'pi bhāgyavaśāt

putraguṇāḥ svātantrye dāraguṇāścādhivedanāvasare /
bhrātṛguṇā dāyavidhau draṣṭavyā mokṣyamāṇena

kā me gatiriti pṛcchati caramaśvāse 'pi yaḥ svārtham /
tasya janasyāpi kṛte pāpāḥ pāpāni kurvanti

pitṛbhiḥ kalahāyante putrānadhyāpayanti pitṛbhaktim /
paradārānupayantaḥ paṭhanti śāstrāṇi dāreṣu

śāntiralabhyāduparatirapātrabhāvaḥ pratigrahanivṛttiḥ /
kṣāntirdurbalateti ca nivṛttidharmāḥ kalāvete

nītijñā niyatijñā vedajñā api bhavanti śāstrajñāḥ /
brahmajñā api labhyāḥ svājñānajñānino viralāḥ

kalikaluṣe manasi sve kathamiva jagadārjavaṃ labhate /
cakṣurdoṣe jāgrati candradvitvaṃ kuto yātu

viṣayānanukūlayituṃ viṣayiṇi hṛdaye vidhīyatāṃ yatnaḥ /
dṛśi deyamauṣadhaṃ ko dṛśye dattvā sukhī bhavati

dārāḥ putreṣu ratāḥ putrāḥ pitṛdhanaparigrahavyagrāḥ /
rodanaśaraṇā jananī paralokagatasya ko bandhuḥ

paśyanti mriyamāṇānmariṣyato 'numimate smaranti mṛtān /
kathayante caivamasacceṣṭante nityavattu param

kalahāyante mūḍhāḥ kaḥ pratibhūḥ śvaḥ prabhāta iti /
tasyāmeva rajanyāṃ kaḥ pratibhūḥ svasya sattāyām

kulyāḥ kṛtā viśālāḥ kuḍyānyupalairnibaddhāni /
krītā balino mahipāḥ kṛtakṛtyāḥ sma iti manyante

ā prapadamā śiraskaṃ cāntaḥ kalimalamalīmase vapuṣi /
viphalaṃ gaṅgājalamapi madyaghaṭe darbhamuṣṭiriva

daṇḍyaṃ yatsukhahetoḥ puṣṇanti janāḥ kathaṃ tadeva vapuḥ /
nahi śarkarābhilāṣibhirikṣoḥ kāṇḍāni pūjyante

prāyo muhyati cetaḥ prāṇabhṛtaḥ prāṇanirgamāvasare /
puṇyena yadi na muhyati putrāneva smaranmriyate

śamayitumaudaramagniṃ saṃsārākhyāmbudhau nimajjanti /
tuhinavyathānivṛttyai nahi veśmani pāvako deyaḥ

āhṛtya parityaktā janayantyarthāḥ sukhābhāsam /
atyantaparityaktāḥ paramānandāya kalpante

arthānāmadhikānāṃ rājñā caureṇa vā nāśaḥ /
anne khalvatimukte vamanaṃ vā syādvireko vā

praṇamati parisāntvayati[praṇi]patati sadā paribhramati /
āviṣṭa iva piśācyā puruṣastṛṣṇāvaśaṃ yātaḥ

jananādṛṣṭātpitarau putrā jāmātaro 'pyayādṛṣṭāt /
kalahādṛṣṭājjñātaya iti nirṇīte kimeṣṭavyam