Scripture Library

Sushruta Samhita · Chapter 6.16

6.16.1

athātaḥ pakṣmakopapratiṣedhaṃ vyākhyāsyāmaḥ//

6.16.2

yathovāca bhagavān dhanvantariḥ//

6.16.3

yāpyastu yo vartmabhavo vikāraḥ pakṣmaprakopo'bhihitaḥ purastāt/
tatropaviṣṭasya narasya carma vartmopariṣṭādanutiryageva//

6.16.4

bhruvoradhastāt parimucya bhāgau pakṣmāśritaṃ caikamato'vakṛntet/
kanīnakāpāṅgasamaṃ samantādyavākṛti snigdhatanornarasya//

6.16.5

utkṛtya śastreṇa yavapramāṇaṃ bālena sīvyodbhiṣagapramattaḥ/
dattvā ca sarpirmadhunāvaśeṣaṃ kuryādvidhānaṃ vihitaṃ vraṇe yat//

6.16.6

lalāṭadeśe ca nibaddhapaṭṭaṃ prāksyūtamatrāpyaparaṃ ca baddhvā/
sthairyaṃ gate cāpyatha śastramārge bālān vimuñcet kuśalo'bhivīkṣya//

6.16.7

evaṃ na cecchāmyati tasya vartma nirbhujya doṣopahatāṃ valiṃ ca/
tato'gninā vā pratisārayettāṃ kṣāreṇa vā samyagavekṣya dhīraḥ//

6.16.8

chittvā samaṃ vāpyupapakṣmamālāṃ samyaggṛhītvā baḍiśaistribhistu/
pathyāphalena pratisārayettu ghṛṣṭena vā tauvarakeṇa samyak//

6.16.9

catvāra ete vidhayo vihantuṃ pakṣmoparodhaṃ pṛthageva śastāḥ/
virecanāścyotanadhūmanasyalepāñjanasneharasakriyāśca//

Original text: Suśrutasaṃhitā · Edition: ed. Yādavaśarman Trivikrama Ācārya (Nirnaya Sagar Press); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0