Surya Siddhanta · Chapter 6

na chedyakam ṛte yasmād bhedā grahaṇayoH sphuṭāH/
jñāyante tat pravakṣyāmi chedyakajñānam uttamam//

susādhitāyām avanau binduṃ kṛtvā tato likhet/
saptavargāṅgulenādau maṇḍalaṃ valanāśritam//

grāhyagrāhakayogārdhasammitena dvitīyakam/
maṇḍalaṃ tat samāsākhyaṃ grāhyārdhena tṛtīyakam//

yāmyottarāprācyaparāsādhanaṃ pūrvavad diśām/
prāg indor grahaṇaṃ paścān mokṣo +arkasya viparyayāt//

yathādiśaṃ prāgrahaṇaṃ valanaṃ himadīdhiteH/
maukṣikaṃ tu viparyastaṃ viparītam idaṃ raveH//

valanāgrān nayen madhyaṃ sūtraṃ yady atra saṃspṛśet/
tatsamāse tato deyau vikṣepau grāsamaukṣikau//

vikṣepāgrāt punaH sūtraṃ madhyabinduṃ praveśayet/
tadgrāhyabindusaṃsparśād grāsamokṣau vinirdiśet//

nityaśo +arkasya vikṣepāH parilekhe yathādiśam/
viparītāH śaśāṅkasya tadvaśād atha madhyamam//

valanaṃ prāṅmukhaṃ deyaṃ tadvikṣepaikatā yadi/
bhede paścān mukhaṃ deyam indor bhānor viparyayāt//

valanāgrāt punaH sūtraṃ madhyabinduṃ praveśayet/
madhyasūtreṇa vikṣepaṃ valanābhimukhaṃ nayet//

vikṣepāgrāl likhed vṛttaṃ grāhakārdhena tena yat/
grāhyavṛttaṃ samākrāntaṃ tadgrastaṃ tamasā bhavet//

chedyakaṃ likhatā bhūmau phalake vā vipaścitā/
viparyayo diśāṃ kāryaH pūrvāparakapālayoH//

svacchatvād dvādaśāṃśo +api grastaś candrasya dṛśyate/
liptātrayam api grastaṃ tīkṣṇatvān na vivasvataH//

svasaṃjñitās trayaH kāryā vikṣepāgreṣu bindavaH/
tatra prāṅmadhyayor madhye tathā maukṣikamadhyayoH//

likhen matsyau tayor madhyān mukhapucchaviniHsṛtam/
prasārya sūtradvitayaṃ tayor yatra yutir bhavet//

tatra sūtreṇa vilikhec cāpaṃ bindutrayaspṛśā/
sa panthā grāhakasyoktā yenāsau samprayāsyati//

grāhyagrāhakayogārdhāt projjhyeṣṭagrāsam āgatam/
avaśiṣṭāṅgulasamāṃ śalākāṃ madhyabindutaH//

tayor mārgonmukhīṃ dadyād grāsataH prāggrahāśritām/
vimuñcato mokṣadiśi grāhakādhvānam eva sā//

spṛśed yatra tato vṛttaṃ grāhakārdhena saṃlikhet/
tena grāhyaṃ yadākrāntaṃ tat tamograstam ādiśet//

mānāntarārdhena mitāṃ śalākāṃ grāsadiṅmukhīm/
nimīlanākhyāṃ dadyāt sā tanmārge yatra saṃspṛśet//

tato grāhakakhaṇḍena prāgvan maṇḍalam ālikhet/
tadgrāhyamaṇḍalayutir yatra tatra nimīlanam//

evam unmīlane mokṣadiṅmukhīṃ samprasārayet/
vilikhen maṇḍalaṃ prāgvad unmīlanam athoktavat//

ardhād ūne sadhūṃraṃ syāt kṛṣṇam ardhādhikaṃ bhavet/
vimuñcataH kṛṣṇatāṃraṃ kapilaṃ sakalagrahe//

rahasyam etad devānāṃ na deyaṃ yasya kasyacit/
suparīkṣitaśiṣyāya deyaṃ vatsaravāsine//
[grahayuti]