Surya Siddhanta · Chapter 3

yugmānte viṣamānte tu nakhaliptonitās tayoH//

śilātale +ambusaṃśuddhe vajralepe +api vā same/
tatra śaṅkvaṅgulair iṣṭaiH samaṃ maṇḍalam ālikhet//

tanmadhye sthāpayec chaṅkuṃ kalpanādvādaśāṅgulam/
tacchāyāgraṃ spṛśed yatra vṛtte pūrvāparārdhayoH//

tatra bindū vidhāyobhau vṛtte pūrvāparābhidhau/
tanmadhye timinā rekhā kartavyā dakṣiṇottarā//

yāmyottaradiśor madhye timinā pūrvapaścimā/
diṅmadhyamatsyaiH saṃsādhyā vidiśas tadvad eva hi//

caturasraṃ bahiH kuryāt sūtrair madhyād vinirgataiH/
bhujasūtrāṅgulais tatra dattair iṣṭaprabhā smṛtā//

prākpaścimāśritā rekhā procyate samamaṇḍale/
unaṇḍale ca viṣuvanmaṇḍale parikīrtyate//

rekhā prācyaparā sādhyā viṣuvadbhāgragā tathā/
iṣṭacchāyāviṣuvator madhyam agrābhidhīyate//

śaṅkucchāyākṛtiyuter mūlaṃ karṇo +asya vargataH/
projjhya śaṅkukṛtiṃ mūlaṃ chāyā śaṅkur viparyayāt//

triṃśatkṛtyo yuge bhānāṃ cakraṃ prāk parilambate/
tadguṇād bhūdinair bhaktād dyugaṇād yad avāpyate//

taddos trighnā daśāptāṃśā vijñeyā ayanābhidhāH/
tatsaṃskṛtād grahāt krānticchāyācaradalādikam//

sphuṭaṃ dṛktulyatāṃ gacched ayane viṣuvadvaye/
prāk cakraṃ calitaṃ hīne chāyārkāt karaṇāgate//

antarāṃśair athāvṛtya paścāc cheṣais tathādhike/
evaṃ viṣuvatī chāyā svadeśe yā dinārdhajā//

dakṣiṇottararekhāyāṃ sā tatra viṣuvatprabhā//
śaṅkucchāyāhate trijye viṣuvatkarṇabhājite/

lambākṣajye tayoś cāpe lambākṣau dakṣiṇau sadā/
madhyacchāyā bhujas tena guṇitā tribhamaurvikā//

svakarṇāptā dhanurliptā natās tā dakṣiṇe bhuje/
uttarāś cottare yāmyās tāH sūryakrāntiliptikāH//

digbhede miśritāH sāmye viśliṣṭāś cākṣaliptikāH/
tābhyo +akṣajyā ca tadvargaṃ projjhya trijyākṛteH padam//

lambajyārkaguṇākṣajyā viṣuvadbhātha lambayā/
svākṣārkanatabhāgānāṃ dikṣāmye +antaram anyathā//

digbhede +apakramaH śeṣas tasya jyā trijyayā hatā/
paramāpakramajyāptā cāpaṃ meṣādigo raviH//

karkyādau projjhya cakrārdhāt tulādau bhārdhasaṃyutāt/
mṛgādau projjhya bhagaṇān madhyāhne +arkaH sphuṭo bhavet//

tanmāndam asakṛd vāmaṃ phalaṃ madhyo divākaraH/
svākṣārkāpakramayutir dikṣāmye +antaram anyathā//

śeṣaṃ natāṃśāH sūryasya tadbāhujyā ca koṭijyā/
śaṅkumānāṅgulābhyaste bhujatrijye yathākramam//

koṭijyayā vibhajyāpte chāyākarṇāv ahardale/
krāntijyā viṣuvatkarṇaguṇāptā śaṅkujīvayā//

arkāgrā sveṣṭakarṇaghnī madhyakarṇoddhṛtā svakā/
viṣuvadbhāyutārkāgrā yāmye syād uttaro bhujaH//

viṣuvatyām viśodhyodaggole syād bāhur uttaraH/
viparyayād bhujo yāmyo bhavet prācyaparāntare//

mādhyāhniko bhujo nityaṃ chāyā mādhyāhnikī smṛtā/
lambākṣajīve viṣuvacchāyādvādaśasaṅguṇe//

krāntijyāpte tu tau karṇau samamaṇḍalage ravau/
saumyākṣonā yadā kāntiH syāt tadā dyudalaśravaH//

viṣuvacchāyayābhyastaH karṇo madhyāgrayoddhṛtaH/
svakrāntijyā trijīvāghnī lambajyāptāgramaurvikā//

sveṣṭakarṇahatā bhaktā trijyayāgrāṅgulādikā/
trijyāvargārdhato +agrajyāvargonād dvādaśāhatāt//

punar dvādaśanighnāc ca labhyate yat phalaṃ budhaiH/
śaṅkuvargārdhasaṃyuktaviṣuvadvargabhājitāt//

tadeva karaṇī nāma tāṃ pṛthak sthāpayed budhaH/
arkaghnī viṣuvacchāyāgrajyayā guṇitā tathā//

bhaktā phalākhyaṃ tadvargasaṃyuktakaraṇīpadam/
phalena hīnasaṃyuktaṃ dakṣiṇottaragolayoH//

yāmyayor vidiśoH śaṅkur evaṃ yāmyottare ravau/
paribhramati śaṅkos tu śaṅkur uttarayos tu saH//

tattrijyāvargaviśleṣān mūlaṃ dṛgjyābhidhīyate/
svaśaṅkunā vibhajyāpte dṛktrijye dvādaśāhate//

chāyākarṇau tu koṇeṣu yathāsvaṃ deśakālayoH/
trijyodakcarajāyuktā yāmyāyāṃ tadvivarjitā//

antyā natotkramajyonā svahorātrārdhasaṅguṇā/
trijyābhaktā bhavec chedo lambajyāghno +atha bhājitaH//

tribhajyayā bhavec chaṅkus tadvargaṃ pariśodhayet/
trijyāvargāt padaṃ dṛgjyā chāyākarṇau tu pūrvavat//

abhīṣṭacchāyayābhyastā trijyā tatkarṇabhājitā/
dṛgjyā tadvargasaṃśuddhāt trijyāvargāc ca yat padam/

śaṅkuH sa tribhajīvāghnaH svalambajyāvibhājitaH/
chedaH sa trijyayābhyastaH svāhorātrārdhabhājitaH//

unnatajyā tayā hīnā svāntyā śeṣasya kārmukam/
utkramajyābhir evaṃ syuH prākpaścārdhanatāsavaH//

iṣṭāgrāghnī tu lambajyā svakarṇāṅgulabhājitā/
krāntijyā sā trijīvāghnī paramāpakramoddhṛtā//

taccāpaṃ bhādikaṃ kṣetraṃ padais tatra bhavo raviH/
iṣṭe +ahni madhye prākpaścād dhṛte bāhutrayāntare//

matsyadvayāntarayutes trispṛkṣūtreṇa bhābhramaH/
tribhadyukarṇārdhaguṇāH svāhorātrārdhabhājitāH//

kramād ekadvitribhajyās taccāpāni pṛthak pṛthak/
svādho +adhaH pariśodhyātha meṣāl laṅkodayāsavaH//

khāgāṣṭayo +arthago +agaikāH śaratryaṅkahimāṃśavaH/
svadeśacarakhaṇḍonā bhavantīṣṭodayāsavaH//

vyastā vyastair yutāH svaiH svaiH karkaṭādyās tatas trayaH/
utkrameṇa ṣaḍevaite bhavantīṣṭās tulādayaH//

gatabhogyāsavaH kāryā bhāskarād iṣṭakālikāt/
svodayāsuhatā bhuktabhogyā bhaktāH khavahnibhiH//

abhīṣṭaghaṭikāsubhyo bhogyāsūn praviśodhayet/
tadvat tadeṣyalagnāsūn evaṃ yātāt tathotkramāt//

śeṣaṃ cet triṃśatābhyastam aśuddhena vibhājitam/
bhāgair yuktaṃ ca hīnaṃ ca tallagnaṃ kṣitije tadā// (C bhāgahīnaṃ ca yuktaṃ ca)

prākpaścān natanāḍībhis tasmāl laṅkodayāsubhiH/
bhānau kṣayadhane kṛtvā madhyalagnaṃ tadā bhavet//

bhogyāsūn ūnakasyātha bhuktāsūn adhikasya ca/
sampīṇḍyāntaralagnāsūn evaṃ syāt kālasādhanam//

sūryād ūne niśāśeṣe lagne +arkād adhike divā/
bhacakrārdhayutād bhānor adhikke +astamayāt param//
[candragrahaṇa]