Surya Siddhanta · Chapter 12

athārkāṃśasamudbhūtaṃ praṇipatya kṛtāñjaliH/
bhaktyā paramayābhyarcya papracchedaṃ mayāsuraH//

bhagavan kimpramāṇā bhūH kim ākārā kim āśrayā/
kiṃvibhāgā kathaṃ cātra saptapātālabhūmayaH//

ahorātravyavasthāṃ ca vidadhāti kathaṃ raviH/
kathaṃ paryeti vasudhāṃ bhuvanāni vibhāvayan//

devāsurāṇām anyonyam ahorātraṃ viparyayāt/
kim atha tat kathaṃ vā syād bhānor bhagaṇapūraṇāt//

pitryaṃ māsena bhavati nāḍīṣaṣṭyā tu mānuṣam/
tad eva kila sarvatra na bhavet kena hetunā//

dinābdamāsahorāṇām adhipā na samāH kutaH/
kathaṃ paryeti bhagaṇaH sagraho +ayaṃ kim āśrayaH//

bhūmer uparyuparyūrdhvāH kim utsedhāH kim antarāH/
graharkṣakakṣāH kiṃmātrāH sthitāH kena krameṇa tāH//

grīṣme tīvrakaro bhānur na hemante tathāvidhaH/
kiyatī tatkaraprāptir mānāni kati kiṃ ca taiH//

evaṃ me saṃśayaṃ chindhi bhagavan bhūtabhāvana/
anyo na tvām ṛte chettā vidyate sarvadarśivān//

iti bhaktyoditaṃ śrutvā mayoktaṃ vākyam asya hi/
rahasyaṃ param adhyāyaṃ tataH prāha punaH sa tam//

śṛṇuṣvaikamanā bhūtvā guhyam adhyātma saṃjñitam/
pravakṣyāmy atibhaktānāṃ nādeyaṃ vidyate mama//

vāsudevaH paraṃ brahma tanmūrtiH puruṣaH paraH/
avyakto nirguṇaH śāntaH pañcaviṃśāt paro +avyayaH//

prakṛtyantargato devo bahir antaś ca sarvagaH/
saṅkarṣaṇo +apaH sṛṣṭvādau tāsu vīryam avāsṛjat//

tadaṇḍam abhavad dhaimaṃ sarvatra tamasāvṛtam/
tatrāniruddhaH prathamaṃ vyaktībhūtaH sanātanaH//

hiraṇyagarbho bhagavān eṣa chandasi paṭhyate/
ādityo hy ādibhūtatvāt prasūtyā sūrya ucyate//

paraṃ jyotis tamaH pāre sūryo +ayaṃ saviteti ca/
paryeti bhuvanān eṣa bhāvayan bhūtabhāvanaH//

prakāśātmā tamohantā mahān ity eṣa viśrutaH/
ṛco +asya maṇḍalaṃ sāmānyustrāmūrtir yajūṃṣi ca//

trayīmaho +ayaṃ bhagavāṇ kālātmā kālakṛd vibhuH/
sarvātmā sarvagaH sūkṣmaH sarvam asmin pratiṣṭhitam//

rathe viśvamaye cakraṃ kṛtvā saṃvatsarātmakam/
chandāṃsy aśvāH sapta yuktāH paryaṭaty eṣa sarvadā//

tripādam amṛtaṃ guhyaṃ pādo +ayaṃ prakaṭo +abhavat/
so +ahaṅkāraṃ jagatsṛṣṭyai brahmāṇam asṛjat prabhuH//

tasmai vedān varān dattvā sarvalokapitāmaham/
pratiṣṭhāpyāṇḍamadhye +atha svayaṃ paryeti bhāvayan//

atha sṛṣṭyāṃ manaś cakre brahmāhaṅkāramūrtibhṛt/
manasaś candramā jajñe sūryo +akṣṇos tejasāṃ nidhiH//

manasaH khaṃ tato vāyur agnir āpo dharā kramāt/
guṇaikavṛddhyā pañcaiva mahābhūtāni jajñire//

agnīṣomau bhānucandrau tatas tv aṅgārakādayaH/
tejobhūkhāmbuvātebhyaH kramaśaH pañca jajñire//

punar dvādaśadhātmānaṃ vyabhajad rāśisañjñakam/
nakṣatrarūpiṇaṃ bhūyaH saptaviṃśātmakaṃ vaśī//

tataś carācaraṃ viśvaṃ nirmame devapūrvakam/
ūrdhvamadhyādharebhyo +atha srotobhyaH prakṛtīH sṛjan//

guṇakarmavibhāgena sṛṣṭvā prāgvad anukramāt/
vibhāgaṃ kalpayāmāsa yathāsvaṃ vedadarśanāt//

grahanakṣatratārānāṃ bhūmer viśvasya vā vibhuH/
devāsuramanuṣyāṇāṃ siddhānāṃ ca yathākramam//

brahmāṇḍam etat suṣiraṃ tatredaṃ bhūrbhuvādikam/
kaṭāhadvitayasyeva sampuṭaṃ golakākṛti//

brahmāṇḍamadhye paridhir vyomakakṣābhidhīyate/
tanmadhye bhramaṇaṃ bhānām adho +adhaH kramaśas tathā//

mandāmarejyabhūputrasūryaśukrendujendavaH/
paribhramanty adho+adhaHsthāH siddhhavidyādharā ghanāH//

madhye samantād aṇḍasya bhūgolo vyomni tiṣṭhati/
bibhrānaH paramāṃ śaktiṃ brahmaṇo dhāraṇātmakām//

tadantarapuṭāH sapta nāgāsurasamāśrayāH/
divyauṣadhirasopetā ramyāH pātālabhūmayaH//

anekaratnanicayo jāmbūnadamayo giriH/
bhūgolamadhyago merur ubhayatra vinirgataH//

upariṣṭāt sthitās tasya sendrā devā maharṣayaH/
adhastād asurās tadvad dviṣanto +anyonyam āśritāH//

tataH samantāt paridhiH krameṇāyaṃ mahārṇavaH/
mekhaleva sthito dhātryā devāsuravibhāgakṛt//

samantān merumadhyāt tu tulyabhāgeṣu toyadheH/
dvīpiṣu dikṣu pūrvādinagaryo devanirmitāH//

bhūvṛttapāde pūrvasyāṃ yamakoṭīti viśrutā/
bhadrāśvavarṣe nagarī svarṇaprākāratoraṇā//

yāmyāyāṃ bhārate varṣe laṅkā tadvan mahāpurī/
paścime ketumālākhye romakākhyā prakīrtitā//

udak siddhapurī nāma kuruvarṣe prakīrtitā/
tasyāṃ siddhā mahātmāno nivasanti gatavyathāH//

bhūvṛttapādavivarās tāś cānyonyaṃ pratiṣṭhitāH/
tābhyaś cottarago merus tāvān eva surāśrayaH//

tāsām uparigo yāti viṣuvastho divākaraH/
na tāsu viṣuvacchāyā nākṣasyonnatir iṣyate//

meror ubhayato madhye dhruvatāre nabhaH sthite/
nirakṣadeśasaṃsthānām ubhaye kṣitijāśraye//

ato nākṣatrocchrayas tāsu dhruvayoH kṣitijasthayoH/
navatir lambakāṃśās tu merāvakṣāṃśakās tathā/

meṣādau devabhāgasthe devānāṃ yāti darśanam/
asurāṇāṃ tulādau tu sūryas tadbhāgasañcaraH//

atyāsannatayā tena grīṣme tīvrakarā raveH/
devabhāge surāṇāṃ tu hemante mandatānyathā//

devāsurā viṣuvati kṣitijasthaṃ divākaram/
paśyanty anyonyam eteṣāṃ vāmasavye dinakṣape//

meṣādāv uditaH sūryas trīn rāśīn udaguttaram/
sañcaran prāgaharmadhyaṃ pūrayen meruvāsinām//

*karkyādīn sañcaraṃś tadvad ahnaH paścārdham eva saH/(C karkādīn)
tulādīṃs trīn mṛgādīṃś ca tadvad eva suradviṣām//

ato dinakṣape teṣām anyonyaṃ hi viparyayāt/
ahorātrapramāṇaṃ ca bhānor bhagaṇapūraṇāt//

dinakṣapārdham eteṣām ayanānte viparyayāt/
uparyātmānam anyonyaṃ kalpayanti surāsurāH//

anye +api samasūtrasthā manyante +adhaH parasparam/
bhadrāśvaketumālasthā laṅkāsiddhapurāśritāH//

sarvatraiva mahīgole svasthānam upari sthitam/
manyante khe yato golas tasya kvordhavaṃ kva vādhaH//

alpakāyatayā lokāH svasthānāt sarvato mukham/
paśyanti vṛttām apy etāṃ cakrākārāṃ vasundharām//

savyaṃ bhramati devānām apasavyaṃ suradviṣām/
upariṣṭād bhagolo +ayaṃ vyakṣe paścān mukhaH sadā//

atas tatra dinaṃ triṃśannāḍikaṃ śarvadī tathā/
hānivṛddhī sadā vāmaṃ surāsuravibhāgayoH//

meṣādau tu sadā vṛddhir udaguttarato +adhikā/
devāṃśe ca kṣapāhānir viparītaṃ tathāsure//

tulādau dyuniśor vāmaṃ kṣayavṛddhī tayor ubhe/
deśakrāntivaśān nityaṃ tadvijñānaṃ puroditam//

bhūvṛttaṃ krāntibhāgaghnaṃ bhagaṇāṃśavibhājitam/
avāptayojanair arko vyakṣād yāty uparisthitaH//

paramāpakramād evaṃ yojanāni viśodhayet/
bhūvṛttapādāc cheṣāṇi yāni syur yojanāni taiH//

ayanānte vilomena devāsuravibhāgayoH/
nāḍīṣaṣṭyā sakṛd aharniśāpy asmin sakṛt tathā//

tadantare +api ṣaṣṭyante kṣayavṛddhī aharniśoH/
parato viparīto +ayaṃ bhagolaH parivartate//

ūne bhūvṛttapāde tu dvijyāpakramayojanaiH/
dhanur mṛgasthaH savitā devabhāge na dṛśyate//

tathā cāsurabhāge tu mithune karkaṭe sthitaH/
naṣṭacchāyā mahīvṛttapāde darśanam ādiśet//

ekajyāpakramānītair yojanaiH parivarjite/
bhūmikakṣācaturthāṃśe vyakṣāc cheṣais tu yojanaiH//

dhanur mṛgālikumbheṣu saṃsthito +arko na dṛśyate/
devabhāge +asurāṇāṃ tu vṛṣādye bhacatuṣṭaye//

merau *meṣādicakrārdhe devāH paśyanti bhāskaram/(ḍ -cakārdhe)
sakṛd evoditaṃ tadvad asurāś ca tulādigam//

bhūmaṇḍalāt pañcadaśe bhāge deve +atha vāsure/
upariṣṭād vrajaty arkaH saumyayāmyāyanāntagaH//

tadantarālayoś cchāyā yāmyodak sambhavaty api/
meror abhimukhaṃ yāti parataH svavibhāgayoH//

bhadrāśvoparigaH kuryād bhārate tūdayaṃ raviH/
rātryardhaṃ ketumāle tu kurāv astamayaṃ tadā//

bhāratādiṣu varṣeṣu tadvad eva paribhraman/
madhyodayārdharātryastakālān kuryāt pradakṣiṇam//

dhruvonnatir bhacakrasya natir meruṃ prayāsyataH/
nirakṣābhimukhaṃ yātur viparīte natonnate//

bhacakraṃ dhruvayor baddham ākṣiptaṃ pravahānilaiH/
paryety ajasraṃ tannaddhā grahakakṣā yathākramam//

sakṛd udgatam abdārdhaṃ paśyanty arkaṃ surāsurāH/
pitaraH śaśigāH pakṣaṃ svadinaṃ ca narā bhuvi//

*upariṣṭasya mahatī kakṣālpādhaHsthitasya ca/(C upariṣṭhasya)
mahatyā kakṣayā bhāgā mahānto +alpās tathālpayā//

kālenālpena bhagaṇaṃ bhuṅkte +alpabhramaṇāśritaH/
grahaH kālena mahatā maṇḍale mahati bhraman//

svalpayāto bahūn bhuṅkte bhagaṇān śītadīdhitiH/
mahatyā kakṣayā gacchan tataH svalpaṃ śanaiścaraH//

mandād adhaH krameṇa syuś caturthā divasādhipāH/
varṣādhipatayas tadvat tṛtīyāś ca prakīrtitāH//

ūrdhvakrameṇa śaśino *māsānām adhipāH smṛtāH/(ḍ masānām)
horeśāH sūryatanayād adho+adhaH kramaśas tathā//

bhaved bhakakṣā tīkṣṇāṃśor bhramaṇaṃ ṣaṣṭitāḍitam/
sarvopariṣṭād bhramati yojanais tair bhamaṇḍalam//

kalpoktacandrabhagaṇā guṇitāH śaśikakṣayā/
ākāśakakṣā sā jñeyā karavyāptis tathā raveH//

saiva yatkalpabhagaṇair bhaktā tadbhramaṇaṃ bhavet/
kuvāsarair vibhajyāhnaH sarveṣāṃ prāggatiH smṛtā//

bhuktiyojanajā saṅkhyā sendor bhramaṇasaṅguṇā/
svakakṣāptā tu sā tasya tithyāptā gatiliptikā//

kakṣā bhūkarṇaguṇitā mahīmaṇḍalabhājitā/
tatkarṇā bhūmikarṇonā grahoccyaṃ svaṃ dalīkṛtāH//

khatrayābdhidvidahanāH kakṣā tu himadīdhiteH/(32430
jñaśīghrasyāṅkakhadvitritkṛtaśūnyendavas tathā//(1043209)

śukraśīghrasya saptāgnirasābdhirasaṣaḍyamāH/(2664637)
tato +arkabudhaśukrāṇāṃ khakhārthaikasurārṇavāH//(4331500)

kujasyāpy aṅkaśūnyāṅkaṣaḍvedaikabhujaṅgamāH/(8146909)
candroccasya kṛtāṣṭābdhivasudvitryaṣṭavahnayaH//(38328484)

kṛtartumunipañcādriguṇenduviṣayā guroH/(51375764)
svarbhānor vedatarkāṣṭadviśailārthakhakuñjarāH//(80572864)

pañcavāṇākṣināgarturasādryarkāH śanes tataH/(127668255)
bhānāṃ ravikhaśūnyāṅkavasurandhraśarāśvinaH//(25980012)

khavyomakhatrayakhasāgraṣaṭkanāgavyomāṣṭaśūnyayamarūpanagāṣṭacandrāH/(18712080864000000)
brahmāṇḍasampuṭaparibhramaṇaṃ samantād abhyantare dinakarasya karaprasāraH//
[jyotiṣopaniṣad]