Sumāgadhāvadāna · Verses 81-100

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ vṛsabharathenāgacchati.

sā kathayati: nāyam āryo mahākauṣṭhilo, 'yaṃ bhagavatālpecchānām agro nirdiṣṭaḥ.

ayaṃ bhikṣūn evam āha: sātirekāṇi me, āyuṣmanto, 'śītivarṣāni pravrajitasya, nābhijānāmi sabrahmacāriṇām antikāt parikarma svīkartum antaśaḥ pṛṣṭhodgharṣaṇamātram api, sa eṣāgacchati. (6)

atrāntareṇāyuṣmān upālī haimaṃ tālavanam abhinirmāya suvarṇapuṣpaphalopetaṃ vividhamanojñasvarasaṃyuktaṃ, tatrāsajjamānaśarīra ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yam te sa śāstā yo 'yaṃ haimaṃ tālavanam āśritya ṛddhyākāśenāgacchati.

sā kathayati: nāyam ārya upālī, ayaṃ bhagavatā vinayadharāṇām agro nirdiṣṭaḥ.

asya ca pañcamātrātraiḥ śākyakumāraśatair nānālaṃkāravibhūṣitaiḥ pravrajyamānaiḥ purastād vastrāṇām ābharaṇānāṃ ca mahān rāśiḥ kṛtaḥ.

ayam āryaḥ saṃlakṣayati: ime tāvat kumārāḥ kulavibhavayauvanopetāḥ sphītāny antaḥpurāṇi sphītāṇi ca kośakoṣṭhāgārāṇy apāsya pravrajitum ārabdhāḥ, aham asmim alaṃkāramātreṇa sakto.

'nena vyasanam āpatsyate iti tāṃ vibhūtiṃ kheṭapiṇḍam ivāpahāya pravrajya tatprathamataram arhattvam adhigataṃ, sa eṣāgacchati. (7)

atrāntareṇāyuṣmān aśvajic chānteneryāpathena mattahastinaṃ damayati, pātrakaravyagrahasta upari vihāyasā ṛddhyākāśenāgacchati.

taṃ dṛsṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ śānteneryāpathena pātrakaravyagrahasta upari vihāyasā ṛddhyākāśenāgacchati.

sā prāha: nāyam āryo 'śvajic, chānteneryāpathena mattahastinaṃ damayati. asya sakāśād anayā gāthayā:
karmakleśahetukāraṇavatī lokasya nivṛttir yathā
karmakleśanivṛttikāraṇam api provāca tan nāyakaḥ /
yasmin janmajarāvipattiniyataṃ duḥkhaṃ na saṃtiṣṭhate
tat mokṣapravaraṃ sa cādivṛṣabho jñātvā svayaṃ bhāṣate //
śrutvā pūrvaṃ tīrthikasyāryeṇa śāriputreṇa śrotaāpattiphalam adhigatam ayaṃ bhagavatā smṛtimatām agro nirdiṣṭaḥ, sa esāgacchati. (8)

atrāntareṇāyuṣmān pūrṇo maitrāyaṇīputraḥ sauvarṇaṃ padmam abhinirmāya sahasrapatraṃ śakaṭacakramātraṃ vaiḍūryadaṇḍaṃ vajrāṅkurakeśaraṃ tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, ayaṃ te sa śāstā yo 'yaṃ sauvarnaṃ padmam abhinirmāya sahasrapatraṃ śakaṭacakramātraṃ vaiḍūryadaṇḍaṃ vajrāṅkurakeśaraṃ tatropaviṣṭa upari vihāyasā ṛddhyākāśenāgacchati.

sā kathayati: nayām āryo pūrṇo maitrāyaṇīputraḥ, ayaṃ bhagavatā maitrāṇikānām agro nirdiṣṭaḥ, sa eṣāgacchati. (9)

atrāntareṇāyuṣmān dravyo mallaputraś catūratnamayam parvataśikharam abhinirmāya nānāghaṇṭāravākīrṇaṃ nānādhvajapatākopaśohitaṃ tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ: papraccha sumāgadhe, 'yaṃ te sa śāstā yo 'yaṃ catūratnamayaṃ parvataśikharam abhinirmāya nānāghaṇṭārāvakīrṇaṃ nānādhvajapatākopaśobhitaṃ tatropaviṣṭa upari vihāyasā ṛddhyākāśenāgacchati.

sā kathayati: nāyam āryo dravyo mallaputro, 'yaṃ bhagavatā pratilayakānām agro nirdiṣṭaḥ, yo 'yaṃ saṃlayān bhikṣūn tathā pratisaṃlayaneṣu niyojayati, sa eṣāgacchati. (10)

atrāntareṇāyuṣmān aniruddhaḥ sarvasauvarṇaṃ prāsādam abhinirmāya vaiḍūryapravālastambhopaśobhitaṃ nānāratnavicitraṃ vitānamālāviracitaṃ śatapatākopaśobhitaṃ tanmadhye, tatra cābhyantare niṣaṇṇa, upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ sauvarṇaṃ prāsādam abhinirmāya, tatra cābhyantare siṃhāsane niṣaṇṇa upari vihāyasā ṛddhyākāśenāgacchati.