Sumāgadhāvadāna · Verses 61-80

sā kathayati: nāyam āryo mahākāśyapo, 'yaṃ bhagavatā alpecchānāṃ saṃtuṣṭānāṃ dhūtaguṇadharāṇām agro nirdiṣṭaḥ.

anenaikonaṃ lāṅgalasahasraṃ lakṣāhatānāṃ, ṣaṣṭihiraṇyakoṭyaḥ sauvarṇānāṃ, yavānām aśītibhiḥ khāryaṃ, ṣoḍaśa dāsagrāmam, aṣṭādaśa mahābhāktagrāmāḥ, anekaśatasahasrāṇi vastūny upakaraṇaṃ samutsṛjya pravrajitaḥ.

punar aparaṃ: sarvaśrāvakānāṃ samakṣam ayaṃ bhagavatārdhāsanenopanimantritaḥ.
ekaprasthodanaṃ śreyaḥ, ekaśayyā sukhāvahā /
ekadūṣyayugaṃ vāryaṃ, geyo mohaparigrahaḥ //
iti kṛtvā, pratigṛhītāśeṣā yā aparigraha iti na gṛhītaḥ. yaś ca bhāgineyām abhirūpāṃ darśanīyāṃ janapadakalyāṇīsadṛśīṃ tām apahāya pravrajitaḥ, sa eṣāgacchati. (3)

atrāntareṇāyuṣmān mahāmaudgalyāyana airāvaṇagajavaravilāsagāminaṃ paramasvabhāvalakṣaṇavyañjanopetapuṇyadarśanaṃ hastinam abhinirmāya tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī papraccha: sumāgadhe, 'yaṃ te sa śāstā yo 'yaṃ nāgendrarathenāgacchati.

sā kathayati: nāyam āryo mahāmaudgalyāyano, 'yaṃ bhagavatā ṛddhimatām agro nirdiṣṭaḥ.

anena śakrasya devānām indrasya vaijayantaḥ prāsādaḥ, yojanasahasraṃ samantāt, parikṣepeṇa caturaśītibhiḥ stambhasahasraiḥ supratiṣṭhitaḥ, ardhapañcemāni yojanāni devapurād atyudgataḥ pādāṅguṣthenābhikampitaḥ.

nandopanandau nāma nāgarājānau sumerubhṛguṇapariveṣṭitaṃ kṛtvāvasthitau ca vinītau.

punar apy anena bhagavān evam uktaḥ: evaṃ hi bhadanta vaijayante durbhikṣaṃ kṛcchraṃ kāntāraṃ, durlabhaḥ piṇḍako yācanakena, bhikṣavo 'pi lūhabhojanena pariklāmyante.

saṃmukhaṃ me bhadanta bhagavato 'ntikāc chrutaṃ saṃmukham udgṛhītam: asyāṃ mahāpṛthivyāṃ pārthivaḥ praṇīto rasadhātuḥ: so 'dhastād avasthita iti.

tad icchāmy asyā mahāpṛthivyāḥ pārthivaḥ praṇīto rasadhātuḥ tam ūrdhvaṃ kartuṃ, yam ūrdhvaṃ tam adhaḥ kartum.

bhagavān āha: kasmin sthāne sthitvā mahāpṛthivīṃ parivartayasīti.

eṣa evam āha: cakravāḍamahācakravāḍābhyāṃ stāne mahāpṛthiviṃ parivartayiṣyāmi.

bhagavān āha: ye pṛthivīsaṃniśritāḥ prāṇinas tān kathaṃ kariṣyasīti. eṣa evam āha: ye pṛthivīsaṃniśritāḥ prāṇinas tān vāmena pāṇinoddhṛtya dhārayiṣyāmi, dakṣiṇena prāṇinā mahāpṛthivīṃ parivartayiṣyāmi. bhagavān āha: kā tava saṃjnā bhaviṣyati.

tadyathā, bhadanta, balavān puruṣaḥ kadalīpatraṃ parivartayan paramalaghusaṃjñī bhavati, evam evāhaṃ bhadanta, mahāpṛthivīṃ parivartayan paramalaghusaṃjñī bhaviṣyāmīti.

sādhu sādhu, maudgalyāyana, śakyasi tvam anayā ṛddhyānenopāyena mahāpṛthivīṃ parivartayitum iti. sa eṣāgacchati. (4)

atrāntareṇāyuṣmān mahākātyāyanaḥ sphaṭikamayaṃ kūṭāgāram abhinirmāya marakatenācchāditaṃ nānāratnastambhopanibaddhaṃ pravālavedikopaśobhitaṃ, tatra paryaṇkaḥ prajñaptaḥ paṭikāstṛto goṇikāstṛtaś citrikāstṛtaś tūlikāstṛtaḥ, yāval lohitopadhānas, tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ sphaṭikamayaṃ kūṭāgāram abhinirmāya tatropaviṣṭa upari vihāyasā ṛddhyākāśenāgacchati.

sā kathayati: nāyam āryo mahākātyāyanaḥ, ayaṃ bhagavatā sūtrāntavaibhaṅgakānāṃ puṇyamaheśākhyānām agro nirdiṣṭaḥ, sa eṣāgacchati. (5)

atrāntareṇāyuṣmān mahākausṭhilo vrṣabharatham abhinirmāya tatropaviṣṭa upari vihāyasā ṛddhyākāśenāgacchati.