Sumāgadhāvadāna · Verses 41-60

tato bhagavantaṃ namaskṛtya yasyāṃ diśi prativasati tām diśaṃ prekṣitum ārabdhā.

atrāntareṇāyuṣmān ājñātakauṇḍinya uragaratham abhinirmāya śanair mandaṃ mandaṃ deve vṛṣṭāyamāne vidyutsu niścarantīṣu meghadhvaninirnādena tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā, yo 'yam uragarathopaviṣṭaḥ śanair mandaṃ mandaṃ deve vṛṣṭāyamāne vidyududdyotaṃ darśayamāno meghadhvaninirnādena ṛddhyākāśenāgacchati.

sā provāca: nāyam āryo 'jñātakauṇḍinyaḥ saṃghasthaviraḥ, anena bhagavatā bārāṇasyāṃ dharme deśyamāne tatprathamato vairāgyam adhigatam ayaṃ bhagavatā nirvāṇādhigamaprāptānām agro nirdiṣṭah, sa eṣāgacchati. (1)

atrāntareṇāyuṣmāñ chāriputraḥ siṃharatham abhinirmāya tatropaviṣṭa upari vihāyasā rddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ siṃharathenāgacchati.

sā kathayati: nāyam āryaḥ śāriputro, yo 'yaṃ bhagavatā prajñāvatām agro nirdiṣṭaḥ.

asya ca garbhasthasya mātrā jambūdvīpe sarvavādino nirgṛhītāḥ.

jananyāś cānena dauhadam utpāditam: apy evāhaṃ sumerumūrdhāruhya caturṇām api ratnākarāṇāṃ payaḥ pibeyam iti.

atha tiṣyena dvijapravareṇendrajālapāramiprāptaṃ harim indrajālācāryam āhūya narasurāsuragaruḍakinnaramahoragagandharvayakṣasamavāye devyā dauhadaṃ vinītam.

asya ca mātuḥ kukṣiniṣkrāntasya pitrā sarvanaimittikāḥ samāhūyoktāḥ: paśyantu bhavantaḥ, kumārasya kiṃ prabhāvo bhaviṣyatīti.

te cāvalokayitum ārabdhāḥ. kumārasya lakṣaṇodāratāṃ rūpodāratāṃ ca dṛṣṭvā paraṃ vismayam āpannā, na śaknuvanti vyākartuṃ kumārasyedaṃ prabhāvam iti.

athāmbaragatena mahābrāhmaṇā teṣām saṃśayam apanayanārthaṃ brāhmaṇasvareṇāvaghoṣitam.

eṣa kumāraḥ śākyamuneḥ samyaksaṃbuddhasya śāsane pravrajya sarvakleśaprahāṇād arhattvaṃ sākṣāt kariṣyati, sarvaśrāvakānāṃ cāgro bhaviṣyati, dharmacakrānuvartayitā.

idānīṃ vādinaś cāsya mukhaṃ nirīkṣya cirakālābhilaṣitāṃ vācam api na niścārayanti, kaḥ punar vādo. vādakaraṇe ayaṃ bhagavatā evam uktaḥ.

mahāsamudrapramāṇaṃ pūrṇamasibhājanasya, sumerupramāṇam bhūrjapatrabhārasya, caturdvīpeṣu sarvasattvadhātupramāṇaṃ lekhakānām, asyāḥ pṛthivyās tṛṇakāsṭhaśākhāparṇasadapramāṇaṃ kalamānāṃ parikṣayaṃ paryāyena gacchet, na tv evāsya śāriputrasya prajñāyāḥ kṣayaṃ vadāmi. ato mahāprajña ity ākhyātaḥ mahāsārthavāhavat.

yāvat sarvasattveṣu prajñā 'sya sarvotkṛṣṭā yāvat tribhuvavāsisakalanarāmarasurasya
sarvalokasya yā prajñā sthāpayitvā tathāgatam /
śāriputrasya prajñāyāḥ kalāṃ nārhati ṣoḍaśām //

anyam apy uktam: caturāryasatyasaṃkṣepavistaravibhāgavidhikathāvasare nāsty utpattiṣv asya samo jagati pratyekabuddho 'pi, sa eṣāgacchati. (2)

atrāntareṇāyuṣmān mahākāśyapaḥ sauvarṇaṃ parvatam abhinirmāya nānāmṛgagaṇopetaṃ nānāprasravākulaṃ nānāpakṣigaṇākīrṇaṃ nānāvṛkṣopaśobhitaṃ tatropaviṣṭaḥ sa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, ayaṃ te sa śāstā yo 'yaṃ suvarṇam parvatam abhiruhyāgacchati.