Sumāgadhāvadāna · Verses 201-220

atrāntareṇāyuṣmān ānandaḥ haṃsakrauñcamayūraśukasārikākokilajīvaṃjīvakanādopakūjitam ārāmam abhinirmāya tatropaviṣṭa upari vihāyasā ṛddhyākāśenāgacchati.

taṃ dṛṣṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā yo 'yaṃ haṃsakrauñcamayūraśukasārikākokilajīvaṃjīvakanādopakūjitam ārāmam abhinirmāya tatropaviṣṭa upari vihāyasā ṛddhyākāśenāgacchati.

sā kathayati: nāyam ārya ānandaḥ, ayaṃ ca bhagavatā indriyaguptadvārāṇām agro nirdiṣṭaḥ.

ayaṃ ca bhagavataś caturbhir aṅgulair ūnaḥ suvarṇavarṇo dvātriṃśanmahāpuruṣalakṣaṇaiḥ samalaṃkṛtaḥ.

anena kāśyapasya samyaksaṃbuddhasya stūpe madhyamaṃ chattram āropitam. tasya karmaṇo vipākenārdhatṛtīyāni cakravartirājyasahasrāṇi; yady etarhi na pravrajito 'bhaviṣyad etarhi apy anena balacakravartirājyam akariṣyat.

ayaṃ ca bhagavatā balāt pravrajitaḥ. ayaṃ ca bhagavato mātṛsvasāputro bhrātā bhavati. sa eṣāgacchati. (18)

atrāntarenāyuṣmān rāhulaś cakravartiveśam abhinirmāya saptaratnasamanvāgataś caturaśītyā bhaṭabalāgrakoṭibhiḥ samanugamyamānaś caturaśītyā nāgasahasrair upoṣadhanāgarājapramukhaiś caturaśītyāśvasahasrair bālāhakāśvarājapramukhair caturaśītyā rathasahasrair nandīghoṣarathapramukhair anekaiś ca paurajānapadasahasrair nānāpaṭahaśaṅkhabherīninādair ucchritadhvajapatākopaśobhitam abhinirmāya tatropaviṣṭa upari vihāyasā ṛddhyākāśenāgacchati.

taṃ dṛsṭvā sumāgadhāyāḥ svāmī sumāgadhāṃ papraccha: sumāgadhe, 'yaṃ te sa śāstā, yo 'yaṃ cakravartiveśenāgacchati.

sā kathayati: nāyam āryo rāhulo, 'yaṃ bhagavatā śikṣakāmānām agro nirdiṣṭaḥ.

bhagavataḥ putro 'yaṃ pitur ujjhitāṃ śriyam uddyotamānaḥ, sarvacakravartiprativiśiṣṭatarām ṛddhim upadarśayann upari vihāyasā ṛddhyākāśenāgacchati.

āha ca:
lakṣmīṃ lakṣaṇamālinīṃ surucirāṃ śakrarddhivispardhanīṃ
nāgānīkabalānvitāṃ sumahatīṃ ratnair vṛtāṃ saptabhiḥ /
kṛtvā buddhasuto 'bhyupaiti nabhasā veśaṃ ca rājñām ayaṃ
nāmnā rāhula ity aveti sumahate sampūjyamānaḥ suraiḥ //

bhittvorvīṃ jalavat prayānti munayaḥ kecit sṛjanto 'nalaṃ
ramyatoyadharā ivāśu jagati spaṣṭaṃ kṣaranto jalam /
śakrabrahmakuberavigrahadharāś candrārkadaityatviṣo
lokasyodayakāṅkṣiṇo hi nabhasā saṃprasthitāḥ sūratāḥ //
sa eṣāgacchati. (19)

saṃprasthitesu bhikṣusaṃghesu atrāntareṇa tathāgatapraveśaḥ. bhagavāṃs tathārūpaṃ samādhiṃ samāpanno, yathāsamāhite citte bhagavataḥ kāyād raśmayo niścaranti, tadyathā nīlapītalohitāvadātamañjiṣṭhasphaṭikavarṇaḥ, yair ayaṃ loke udāreṇāvabhāsenāvabhāsito yāvac ca śrāvastīṃ yāvac ca puṇḍravardhanaṃ nagaram.

atrāntareṇa sarve lokā bhagavantam abhiniṣkramantaṃ paśyanti, mahāṃś ca pṛthivīcālo babhūva.

atha brahmā sahāṃpatir bhagavataś cetasā cittam ājñāya sārdhaṃ rūpāvacarair devair āgatya bhagavato dakṣiṇe pārśve vyavasthitaḥ.

śakro 'pi devānām indraḥ sārdhaṃ kāmāvacarair devair āgatya vāme pārśve vyavasthitaḥ.

tumburusupriyapramukhāni pañcamātrāṇi gandharvaśatāny āgatya bhagavato 'grato vividhair vādyagītanṛttaviśeṣair upasthānaṃ kurvanto gacchanti.

anekāni ca devatāśatasahasrāṇi pṛṣṭhataḥ pṛṣṭhataḥ samanugacchanti.

upariṣṭāc ca bhagavato 'psaraso divyāny utpalapadmakumudapuṇḍarīkamāndāravāṇi puṣpāṇi, divyāny agarucūrṇāni tagaracūrṇāni candanacūrṇāni tamālapattracūrṇani, divyāni ca vādyāni saṃpravādayanti, cailavikṣepāṃś cākārṣuh.

tena khalu punaḥ samayenānyatarasmin araṇyāyatane sapta ṛṣisahasrāṇi prativasanti.