Subhāṣitaratnakośa · Chapter 25

niḥśeṣa-cyuta-candanaḥ stana-taṭo niryāta-rāgo 'dharo netre dūram anañjane jala-lava-prasyandinī te tanuḥ
āśā-cchedini dūti bāndhava-janasyājñāta-pīḍāgame vāpīṃ snātum ito gatāsi na punas tasyādhamasyāntikam //

kiṃ tvaṃ nigūhase dūti stanau vaktraṃ ca pāṇinā
savraṇā eva śobhante śūrādhara-payodharāḥ //

sādhu dūti punaḥ sādhu kartavyaṃ kim ataḥ param
yan mad-arthe virugṇāsi dantair api nakhair api //

vihāraḥ kaṇṭha-deśas te dūti pravrajitāsi kim
adharo vīta-rāgas te kaṣāye tava locane //

dūti kiṃ tena pāpena śāstrātikrama-kāriṇā
pañca pañcanakhā bhakṣyāḥ ṣaṣṭhī tvaṃ yena khāditā //

nāyātaḥ sāmadānābhyām iti bhede 'pi darśite
sādhu yad durvinītasya tvayā daṇḍo nipātitaḥ //

anena vīta-rāgeṇa buddhenevādhareṇa te
dūti virvyājam ākhyātā sarva-vastuṣu śūnyatā //

pārśvānbhyāṃ sa-prahārābhyām adhare vraja-khaṇḍite
dūti saṃgrāma-yogyāsi na yogyā dūta-karmaṇi //

tvayā dūti kṛtaṃ karma yat tad anyena duṣkaram
śaraṇāgata-vidhvaṃsī chidrānveṣī nipātitaḥ //

kṣāmā tanur gatiḥ khinnā netre vyālola-tārake
vāg aspṛṣṭā ślathaṃ vāso dūti tvaṃ jvaritāsi kim //

rajanyām anyasyāṃ surata-parivartād anucitaṃ madīyaṃ yad vāsaḥ katham api hṛtaṃ tena suhṛdā
tvayā prītyānītaṃ sva-nivasana-dānāt punar idaṃ kutas tvādṛg dūti skhalita-śamanopāya-nipuṇā //

nāyāto yadi tādṛśaṃ sa śapathaṃ kṛtvāpi dūti priyas tat kiṃ kopanayā tvayā sva-daśanair agrādharaḥ khaṇḍitaḥ
svedāmbhaḥ-kaṇa-dāyi vepanam idaṃ tyaktvā bhaja svasthatāṃ ko lokasya sakhi svabhāva-kuṭilasyāntargataṃ jñāsyati //

romāñcaṃ vahasi śvasiṣy avirataṃ dhyānaṃ kim apy āśritā dṛṣṭis te bhramati prakampa-capale vyaktaṃ ca te śītkṛtam
taṃ labdhvā khalu bandhakīva surata-vyāpāra-dakṣaṃ janaṃ kiṃ dūti jvaritāsi pāpam athavā spṛṣṭvā bhavanty āpadaḥ //

śvāsaḥ kiṃ tvaritā gatiḥ pulakitā kasmāt prasādyāgatā veṇī bhraśyati pādayor nipatanāt kṣāmā kim ity uktibhiḥ
svedārdraṃ mukham ātapena galitā nīvī gamād āgamād dūti mlāna-saroruha-dyuti-muṣaḥ svauṣṭhasya kiṃ vakṣyasi //

adhareṇonnati-bhājā bhujaṅga-paripīḍitena te dūti /
saṃkṣobhitaṃ mano me jalanidhir iva manda-rāgeṇa //

sad-bhāvopagatā sama-praṇayinī dārāḥ parasyeti vā dūte rāga-parābhavaḥ kriyata ity etan na mīmāṃsitam
yenāmbhoruha-saṃnibhasya vadanasyāpāṇḍutā te kṛtā dūti bhraṣṭa-guṇasya tasya nilayaṃ svapne 'pi mā gāḥ punaḥ //

sva-kārya-buddhyaiva sadā mad-arthe dūti pravṛttiṃ pratipālayantyā
tvayā phalenaiva vibhāvito 'yaṃ mayā sahābhinna-śarīra-vādaḥ //