Subhāṣitaratnakośa · Chapter 2

dyuti-svaccha-jyotsnāpaṭa-paṭala-vṛṣṭyā na kamalaṃ na candraḥ sāndra-śrī-parimala-garimṇāsyam amalam
madhūdrāṇāṃ nidrābhiduram apamudrādbhutamudaś cakorān bibhrāṇaṃ sarasiruha-pāṇer avatu vaḥ //

varada-kara-saroja-syandamānāmṛtaugha vyupaśamita-samasta-preta-saṃghāta-tarṣaḥ
jayati sita-gabhasti-stoma-śubhrānana-śrīḥ sahaja-guru-dayārdrālokano lokanāthaḥ //

atyudgāḍha-raya-sthirākṛti-ghana-dhvāna-bhraman-mandara kṣubdha-kṣīradhi-vīci-saṃcaya-gata-prāleya-pādopamaḥ
śrīmat-potalake gabhīra-vivṛti-dhvāna-pratidhvānite sāndra-svāṃśu-caya-śriyā valayito lokeśvaraḥ pātu vaḥ //

kṛpā-vṛṣṭi-sphūtāt tava hṛdaya-pīyūṣa-sarasaḥ pravāho nirgatya krama-tanima-ramyaḥ karuṇayā
tṛṣārtānām īṣad vitataṃ adharāntaḥ prati gati praṇālībhiḥ pañcābhavad iti kiṃ anyad bhuja-karāt //

ravim iva dhṛtāmitābhaṃ kavim iva surasārtha-viracita-stotram /
madhum iva saṃbhṛta-karuṇaṃ vidhum iva nāthaṃ kha-sarpaṇaṃ vande //

udarasyedam aṇutvaṃ sahaja-gurutvaṃ yadi nedaṃ hṛdayasya /
svārthe katham alasatvaṃ katham anusatvaṃ hita-karaṇe matir asya //

vaktraṃ naiṣa kalānidhir dhavalimā naiṣojjvalā kaumudī netre nīra-rucī na lāñchana-yugaṃ candre 'sty amanda-cchavi
ity unnīya vidhor abhīti-vihasad yat saṃnidhiṃ sādhvagān nūnaṃ nīrajam astu vaḥ śiva-dive tad lokanāthānanam //

jaṭā-jūṭābhyantar-nava-ravir iva śyāma-jalabhṛd vṛtaḥ śoṇāśokastavakam amitābhaḥ praminute
maharṣer yasyendu-dyuti-ghaṭita-mūrter iva sa vaḥ klamaṃ bhindyād dadyāt praśama-sukha-pīyūṣa-laharīm //