Subhāṣitaratnakośa · Chapter 14

ayaṃ sa bhuvana-traya-prathita-saṃyamī śaṅkaro bibharti vapuṣādhunā viraha-kātaraḥ kāminīm
anena kila nirjitā vayam iti prayāyāḥ karaṃ kareṇa parilālayañ jayati jāta-hāsaḥ smaraḥ //

bhrū-śārṅgākṛṣṭa-muktāḥ kuvalaya-madhupa-stoma-lakṣmī-muṣo ye kṣepīyāḥ kṛṣṇasārā nara-hṛdaya-bhidas tārava-krūra-śalyāḥ
te dīrghāpāṅga-puṅkhāḥ smita-viṣa-viṣamāḥ pakṣmalāḥ strī-kaṭākṣāḥ pāyāsur vo 'tivīryās tribhuvana-jayinaḥ pañcabāṇasya bāṇāḥ //

manasi kusuma-bāṇair eka-kālaṃ trilokīṃ kusuma-dhanur anaṅgas tāḍayaty aspṛśadbhiḥ
iti vitata-vicitrāścarya-saṃkalpa-śilpo jayati manasijanmā janmibhir mānitājñaḥ //

śatruḥ kāraṇaṃ manmano 'pi bhagavān vāmāṅga-nityāṅganaḥ svar-lokasya sudhaika-pāna-caṣako mitraṃ ca tārā-patiḥ
cumbanto jagatāṃ manaḥ sumanaso marm-aspṛśaḥ sāyakāḥ dārāḥ prīti-ratī iti kva mahimā kāmasya nālaukikaḥ //

kula-gurur abalānāṃ keli-dīkṣā-pradāne parama-suhṛd-ananṅgo rohiṇī-vallabhasya
api kusuma-pṛṣatkair deva-devasya jetā jayati suratalīlā-nāṭikā-sūtra-dhāraḥ //

vande devam anaṅgam eva ramaṇī-netrotpala-cchadmanā pāśenāyata-śālinā suniviḍaṃ saṃyamya loka-trayam
yenāsāv api bhasma-lāñchita-tanur devaḥ kapālī balāt prema-kruddhanagātmajāṅghri-vinati-krīḍā-vrate dīkṣitaḥ //

sa jayati saṃkalpa-bhavo rati-mukha-śata-patra-cumbana-bhramaraḥ /
yasyānurakta-lalanā-nayanānta-vilokitaṃ vasatiḥ //

aho dhanuṣi naipuṇyaṃ manmathasya mahātmanaḥ
śarīram akṣataṃ kṛtvā bhinatty antargataṃ manaḥ //

dhanur mālā maurvī kvaṇad-alikulaṃ lakṣyam abalā mano-bhedyaṃ śabda-prabhṛtaya ime pañca-viśikhāḥ
iyāṃ jetuṃ yasya tribhuvanam adehasya vibhavaḥ sa vaḥ kāmaḥ kāmān diśatu dayitāpāṅga-vasatiḥ //

jayati sa mada-lekhocchṛṅkhala-prema-rāmā lalita-surata-līlā-daivataṃ puṣpa-cāpaḥ
tribhuvana-jaya-siddhyai yasya śṛṅgāra-mūrter upakaraṇam apūrvaṃ mālyam indur madhūni //

yācyo na kaścana guruḥ pratimā ca kāntā pūjā vilokana-vigūhana-cumbanāni
ātmā nivedyam itara-vrata-sāra-jetrīṃ vandāmahe makara-ketana deva dīkṣām //