Śrīghanācārasaṃgraha · Chapter 3.3

3 maithunaviratiśikṣāpadaṃ
saṃvaratyāgaḥ
nṛstrīpaṇḍakaviṇmūtravaktrarandhreṃ'gajāta[kaṃ] |
kṣiptvā nigamayet svādaṃ sa [yatiḥ] kṣatasaṃvaraḥ

mānuṣā'mānuṣāste tu tiryañcaśca narādayaḥ |
mṛtāḥ suptāśca jāgranto jñeyā [hi] maithunāśrayāḥ

hastinīmāditaḥ [kṛtvā] yāvat kukkuṭajāti[kāṃ] |
kṣudrikāṃ mahatīṃ gacchan[sa yatiś] cyavate vratāt

duṣkṛtāni
raktaḥ san na striyaṃ paśyet śabdamākarṇayenna ca |
nirvastraḥ san na copeyādaṃgajāta na nirbhujet

bhittidvaye kṛtāṃ śuṣkāṃ klinnāṃ saṃyojya [koṭarīṃ] |
[vipratipattito] nāśyaḥ saṃgrahe sati nānyadā

adha ūrdhvaṃ trikhaṇḍāyā vinīlādhmātikāṃ ca na |
na cāsthisaṃkalāṃ yāyāt nābhyaktāṃ rudhirādibhiḥ

sitāsthisaṃkalāṃ śailadārupustamayīṃ[yatiḥ] |
na ca gacchet striyaṃ yo 'tra virato maithunātsadā

dhyānamiddhagataṃ mattamabhibhūtaṃ ca nidrayā |
vikṣiptaṃ vedanātunnaṃ gṛhītvābhiniṣīdati

ādimadhyāvasāneṣu svādayet dhyānavyutthitaḥ |
vihārād ghaṭṭanīyaḥ so 'bhāve tu svādanasya na

nānāvyaṃjana[ko]petarasaśālyupabhogavat |
āsvādanā ca tailācchaśauṇḍāsavapānavat

anāsvādo yuvagrīvāmṛtakukkurabandhavat |
vijñeyaḥ sukumārasya pradīptalohasparśavat

avakrītādi[rajñānāt] |
[āpattibhāg yatirnaivonmattavikṣiptacetasaḥ]

rāgā[manuṣyasaṃyogāt] praguṇībhūtāṃgajāta[kaṃ] |
na spṛśet śukramokṣārthaṃ sa pṛthivyādidhātubhiḥ

tiryak[pramatta]saṃyogāt śukramuktirbhaved yadi |
[sva]mānasaṃ yatigarhet kṛtaṃ me nu virūpakaṃ

majjajakṣaraṇaṃ yasya yateḥ svapneṣu jāyate |
svapnaśukravinirmuktau taddoṣo na manāgapi

rāgāviṣṭena cittena nārīṃ na śrīghanaḥ spṛśet |
[anyaṃ spṛśettathārūpaṃ nāpi ca] puṃnapuṃsakaṃ

stanakakṣauṣṭhanābhyūrupārśva kukṣimalabhramān |
saṃraktaḥ [san] yatiḥ strīṇāṃ na nindet na ca saṃstuyāt

yadyad vadet striyaṃ[tāvat] kartukāmo yathā yathā |
tattat tathā tathā brūyāt śrīghano nāntike striyāḥ

agrā bhavati sā yoṣid yā māṃ paricared rahaḥ |
lābhinī cāyurādīnāṃ vyādhihīnā yaśasvinī

ityādi na vaco brūyād rāgāgnipluṣṭamānasaḥ |
purastācchroghanaḥ strīṇāṃ punapuṃsakayostathā

vivāhāvāhayordautyaṃ na kuryāt śrāmaṇerakaḥ |
[na ca kuryāt tathārūpanimittamapi dautyakaṃ]

dāpayeyamimāṃ śrāddhāṃ tathāsmai dārikāmiti |
arthasaṃsyandanāsūtraṃ ghaṭate na [sa] bhāṣituṃ

bījārthaṃ na vratī dadyāt [svayameva] gavādikaṃ |
etāneva parebhyo 'pi kadācinna [hi] prārthayet

tulyametāsu tvaṃ tiṣṭha mā striyā caikayā vasa |
ityevaṃ hi bahustrīkaṃ puruṣaṃ na yatirvadet