Śrīghanācārasaṃgraha · Chapter 3.2

2 adattādānaviratiśikṣāpadaṃ
saṃvaratyāgaḥ
kālikaṃ [yāmikaṃ] yāvajjīvikaṃ sarpirādikaṃ |
pārihāryamanādheyaṃ kalpyākalpyamakalpikaṃ

pṛthivyudakadvicatuṣpadāpadakapādapa |
tadgataṃ ca yatiḥ kiñcinnādadīta parasvakaṃ

kārṣāpaṇacaturbhāgaṃ tadardhamathavā dhanaṃ |
steyacitto harannanyair nāśanīyo[yatir] laghu

vāṭāddhṛte gaje pādaiś caturbhirayatiś cyute |
niṣkrānte saṃvṛtadvārād dvipahṛtsyād yatiḥ [khalu]

gulphābaddhekṣadaṇḍāre dūrākṛṣṭe mahītalāt |
saṃvarabhaṃga utkṣipte pañjarādgajavaddvije

deśānnayed hi sandeśadraviṇaṃ ca sañcārayet |
aṃgāt stainyena cittena saṃvaraghūtamāpnute

mṛto 'sau matvā śrutvaivādhvagād vai brahmacāriṇaḥ |
sīmāntasthāyine datvā gṛhṇan syādayatiryatiḥ

yadvittaṃ śrāmaṇerasya mṛtasya nirvṛtārhataḥ |
upādhyāyasya prāpnoti tadityevaṃ jagau muniḥ

hartturiṣṭāṃ diśaṃ yāyād vratī ced hastinaṃ haret |
asau harttā vratī cauraḥ karipe hṛtasaṃjñini

pūjācīvaramālāntadvayasya khalu mocanāt |
avanau taccyutau satyāṃ bhraśyate saṃvarād [yatiḥ]

kṣiptaṃ mauktikahārādi gṛhītvā tad mahākulāt ||
nyasya prasevikāyāṃ ca sahāyena ca hārayan

jaṭālenāthavā vatsa haran ki saṃvaracyutaḥ |
ki pādacyutimātreṇa hyupacāravyatikrame

rātrau gośakaṭāśvādīn kaścid vadhnāti ced yatiḥ |
etānete hariṣyanti tat kiṃ syāccyutasaṃvaraḥ

ṛjuke kīlake bandhe kaṭhine hāra[kaṃ] haran |
utkṣepaṇe ca cauraḥ syāt kuṭile śithile na tu

chidrayitvā ghaṭaṃ sarpiḥ kṣaudraṃ tailaṃ jalaṃ haran |
yatiḥ pūrasya vicchede saṃvarakṣobhamāpnute

vaṇṭayamāṇe gṛhe bhrātrorbhāgādekasya lipsayā |
bālamātraṃ bhūmiṃ yatiḥ syāt kṣatasaṃvaraḥ

taskaropāttapātrādi nirāśaḥ punarādadan |
saṃvarād bhraśyate hītotarastvāpnoti nāpadaṃ

mitrabhāvena labdhaṃ syād dattaṃ gopādibhiś[ca]vā |
tadā [tad] ādadānasya yaternāpattiriṣyate

bhayopadarśanaṃ kāryaṃ pātracīvaramuktaye |
rājani na vaded gatvaibhiścaurair muṣitā vayaṃ

niṣkāsayasyupādhyāyācāryāṇāṃ yattadāvathoḥ |
tadityuktvā haredekaḥ syātāṃ dvāvapi taskarau

svadravyaṃ stainyacittenāpaharantāyimau yatī |
bhāgārdhenāyatistveko niṣkāsitārdhenetaraḥ

dāsyāmaste samaṃ tiṣṭha dvāre kuryāma caurikāṃ |
ityuktakṛta āpattiḥ sahaiva cauracellakaiḥ

uṣitvāgantuke yāte vismṛtya pātracīvaraṃ |
āgatya yo yatistacced gopayeccaura eva saḥ

evamāvāsikā sarve bhavanti kṣatasaṃvarāḥ |
sa eva yadi saṃsmṛtya nayatīha na kilviṣī

anyena steyacittena pātramanyasya ced yatiḥ |
ānāyayati sa tato doṣavān bhavati vratī

yāvat pūjā munestāvat saṃghasyāpi pravartate |
iti yo 'nyasya datte sa bhavati kṣatasaṃvaraḥ

likhitvoddhārakaṃ grāhyaṃ mithaḥ stūpācca saṃghataḥ |
karmādāne ca vaktavyamiyat noktakṛto 'nyathā

svāṃśamuktaharaścauro[yatyora]madhye tayordvayoḥ |
dāsyāmīti ca viśvāsaṃ kṛtvā prāpnoti nāpadaṃ

labhase tvaṃ labhe cāhaṃ yaṃ lābhaṃ tadāvayoḥ |
iti lābhe samutpanne tato 'rdhena [sa] taskaraḥ

dakṣiṇādeśane 'pyevaṃ pāṃśukūlikayordvayoḥ |
bhinatti yaḥ kriyākāraṃ tataḥ sa cyutasaṃvaraḥ

upakāryapakāribhyaścānnapānādi sāṃghikaṃ |
vihārasvāmirājādicaurādibhyo yathākramaṃ

śrīghanebhyo 'pi dātavyaṃ prātarāśādi sāṃghikaṃ |
ālepanādi kurvanti vihāre yadi nānyathā

sīmāntasthāyine datvā bhikṣūpasthānakāriṇe |
dārakaprasthavyājena gṛhṇīyāttaṇḍulādikaṃ

atyaktāśo[hi]gṛhṇīyāt naṣṭaṃ svapātracīvaraṃ |
matvaivaṃ naṣṭapātrādirāśāṃ naiva tyajed [yatiḥ]

svādhyāyādhyayanoddeśaṃ kṛtvā ye saṃghaśīlakaṃ |
kriyākāraṃ na kurvanti te jinoditalaṃghinaḥ

patākālakṣaṇaṃ stūpānna grāhyaṃ yatinā[khalu] |
prāṃśukūlamiti grāhyamaniloddhūtapātitaṃ

śulkakṛtyaṃ paradravyaṃ na nayet nāpi nāyayeta |
śulkapradānamokṣārthopāyaṃ nopadiśed yatiḥ

ratnaṃ datvā yatibhyaḥ prāk paścāt mārgayate vaṇik |
visaṃvādayasītyevaṃ dātavyaṃ paribhāṣya tat

nāsti śulkaṃ munerevaṃ vratināṃ pāribhogike |
krayavikrayakṛddadyāt śulkamanyatra vastuni

varṣāvāsikalābho [hi] deyo varṣoṣitasya ca |
jīvitabrahmacaryasya yayornāśastayorapi

prākprāgupagataiḥ kāryā varṣāvāsikayācanā |
paścādupagataiḥ paścāt saṃghe yugapadeva ca

punargṛhṇāti dīkṣāṃ yo vastukarmajugupsayā |
bhikṣubhāvaṃ parityajya tasmai cāpyāha sarvavit

avarṣoṣitavibhrāntakudṛṣṭimṛtakās[tathā] |
deśāntaragatā lābhaṃ nārhanti paṃcapudgalāḥ

amuṣmai deyamityevaṃ lābhotpanne yatau mṛte |
dātavyo niyataṃ tasmai sa vikalpitabhikṣave

deśāntaragatasyāpi sthāpayet kalpamandire |
traye kurvanti cānarthaṃ tebhyo deyaṃbudharna hi

ācchādaṃ cīvaraṃ mūlyaṃ dāsyāmīti catuṣpadaiḥ |
āpnoti sammukhībhūtān lābho netareṣu ca

varṣāvāsikalābhaśca varṣoṣitasya [gacchati] |
tadetarasya doṣo na gṛhṇato dāyakecchayā

kāliko yāmiko yāvajjīvikaḥ sāptāhikaḥ |
mṛtakṣudrapariṣkāranaityakākālacīvaraṃ

kuṭīpratiṣṭhājātyādisambodhyādimahodbhavaḥ |
prāpnoti daśadhā lābhaḥ sammukhībhūtapudgalān

anādheyaṃ [gurudravyaṃ] sāṃghikaṃ śayanāsanaṃ |
vikretavyaṃ na bhoktavyaṃ kṛtvā paudgalikaṃ na ca

cāturdiśāya buddhāya sammukhībhūtasāṃghike
yatirdravyāntare datte tatra tatropanāmayet

tūṣṇīṃ datvā gate deyaṃ buddhe muktāphalādikaṃ |
cāturdiksammukhībhūte śayanāsanamaṃśukaṃ

pṛthu dravyaṃ paropāttaṃ tatsaṃjñī steyacetanā |
sthānacyutiśca paṃcāṃgairyuktaścedayatirbhavet

dattasvakāparopāttasaṃjñī cānyo 'pi saṃvarī |
na tāvatkālikaṃ svāṃśād gṛhṇan jahāti saṃvaraṃ

ādāyādattamutplutya khaṃ gatvāśācatuṣṭayaṃ |
tatraiva punarāsīno bhavati kṣatasaṃvaraḥ

avakrītādirajñānāt paradravyaṃ haran khalu |
saṃvarakṣobhalābhī sa yatirnonmattādikaḥ