Śrīghanācārasaṃgraha · Chapter 3.4

4 mṛṣāvādaviratiśikṣāpadaṃ
pratyekabuddhasaṃbuddhatacchiṣyajñānadarśanaṃ |
mamāstīti bruvan mithyā nāśyo 'nyatrābhimānataḥ

jñānaṃ satyābhisaṃbodhirabhijñāḥ paṃca darśanaṃ |
dharmānvayādikajñānāṃgīkaraṇe kṣamo na saḥ

āryamlecchavacolekhalipyā [ca] hastamudrayā |
jñānādi pratijānīte boddhavyamapi tanmṛṣā

vṛkṣamūle 'hamekākī viharāmi rame [gṛhe] |
samāhitaṃ ca me cittaṃ na ca vācyamatīndriyaṃ

buddhādīnāṃ vaded varṇamātmano na kathaṃcana |
parakīyaṃ guṇaṃ pṛṣṭo brūyāttatsaṃmukhaṃ na tu

dṛṣṭaṃ śrutaṃ mataṃ yadyad vijñātaṃ caiva tad vadet |
[śrīghano] vaiparītyena gadanmithyābhidhāyakaḥ

vastu cālīkasaṃjñī ca cittaṃ vinihitaṃ [tathā] |
mṛṣāsaṃjñī vadedvācaṃ paṃcāṃgo 'nṛtavādikaḥ

catustridvayeka[kai] raṃgairyukto yo 'tra mṛṣāṃ vadeta |
anyaiḥ sa yatibhirjñeyo mṛṣāvādīti [śrīghanaḥ]

abhūtenānidānena yatiḥ [prāṇivadhādinā] |
dhvaṃsanacyāvanākūtaḥ saṃmukhaṃ na ca codayet

kṣudrāpattinimittena leśamātreṇa tena vā |
śrāmaṇero[hi] pratyakṣaṃ [śrīghanān] na kṣipet parān

jātiliṃgakriyāvādair hīnamadhyottamairvratī |
jihmaniṣpratibhānārthaṃ na prāṇān jātu codayet

upakleśagadākrośāpattyādyairhi yatiṃ vratī |
āśayena puroktena brūyānnaiva kadācana

bhedaṃ yāsyati so 'nyena saṃdhāsyati mayā saha |
yatira jātyādivādena paiśunyaṃ na samācaret