Śrīghanācārasaṃgraha · Chapter 3.1

iti saṃghasenena saṃvihitoddhāre śrīghanācārasaṃgrahe śrāmaṇerabhāvo nāma dvitīyo 'dhyāyaḥ ||
tṛtīyo 'dhyāyaḥ
śrāmaṇerabhāvopāyaḥ
1 prāṇivadhaviratiśikṣāpadaṃ
saṃvaratyāgaḥ
sakalena śarīreṇa śarīrānyatareṇa vā |
pañcaśākhādinirvṛttaṃ na hanyāt prāṇinaṃ [yatiḥ]

mṛtyorvarṇa na bhāṣeta śastrahāraṃ na caiṣayet |
vadhakena na cittena māraṇāya niyojayet

virekavamanālepaviṣaśastrābhisaṃskṛti |
na kuryāt prāṇighātāya na ca garbhasya śātanaṃ

nimittaṃ na vratī kuryāt svapnolūkādivāśitaiḥ |
[dauḥśīlaṃ] (vāpi kāryaṃ na) dānaśīlaphalāptibhiḥ

madhyapaścātpurogeṣu yatraiva vadhakaṃ manaḥ |
[taṃ puruṣaṃ] dhnato hiṃsā nānyamityāha sarvavit

kūṭāvamārthāvaṣṭambhavetālā[dya]bhisaṃskṛti |
avapayañca kuryānna māraṇāya śarīriṇāṃ

taskarā[dya]hisenābhyaḥ yatra mārge bhayaṃ[bhavet] |
tatpanthānaṃ na nāśāya dehināṃ kathayedyatiḥ

bhujagāvartakābhyāṃ ca yatra tīrthe[bhayaṃ bhavet] |
[nadīprataraṇārthāya] tattīrthaṃ na prakāśayet

kiñcid bhūpataye mā dāstvaṃ varaṃ jīvitaṃ tyaja |
iti baddhāyukte 'yuktaṃ vacanaṃ na vaded [yatiḥ]

bhujaga [vyāḍayakṣe]bhyaḥ yadvihāre[bhayaṃ bhavet] |
tadvadhakābhiprāyeṇāgantukāya na coddiśet

vyāghrādivyapadeśena śatruṃ hanyād hi yaḥ śaṭhaḥ |
vihārādāśu[nirdvāraṃ] ghaṭṭanīyaḥ sa cellakaiḥ

tathā kāryaṃ yathaiko 'pi nānirjīvecca kaścana |
adharmyā na kriyā kāryā saṃsmṛtya krakacopamaṃ

vadhaśca śrāmaṇerā ye ghātayituṃ vadhīkṛtāḥ |
yugapat tatprayoge te nāśanīyā vihārataḥ

upakramo nṛsaṃjñā ca naro vadhakacetanā |
jīvitasya kṣayaśceti pañcāṃgāni nṛghātane

śrāmaṇereṇa nāśāya viṣaśastrādi yat[kṛtaṃ] |
mriyate narastenaivāsau tadāsaṃvarī bhavet

avakrītādirajñānāt manuṣyaṃ mārayan khalu |
saṃvarakṣobhalābhī sa [yatir] nonmattādikaḥ

duṣkṛtāni
kāyamaitrādi sattveṣu yatinā kāryaṃ sarvadā |
yasmāt kāruṇikairuktaṃ tasmāt[sattvānna pīḍayet]

na sattvān pīḍayeddārurajvayaścarmabandhanaiḥ |
jalānalapraveśānutyāgādau na niyojayet

kṛmigorūpa[kādīnāṃ] mithyājīvaśca hiṃsanaṃ |
karṣaṇe[hi] bhavedyasmāt tasmāt[tad]dūrato tyajet

nāṃkayed gomahiṣyādi nāsikāṃ nāsya vedhayet |
[yatiśca vividhān sattvān] vetrādinā na tāḍayet

uddiśya yat kṛtaṃ māṃsavyañjanaṃ [khādato] yateḥ |
nighṛṇaṃ jāyate cittaṃ tasmāttannaiva bhakṣayet

jñeyaṃ tu tribhirākārairīkṣitaśrutaśaṃkitaiḥ |
īkṣitaṃ yat svayaṃ dṛṣṭaṃ śrutaṃ pratyāyitoditaṃ

gṛhābaddhamṛgādīnāṃ śrṛṃgapakṣādidarśanāt |
āśaṃkotpadyate [tatra] mamoddiśya hatā na vā

pṛṣṭo dātā vadedevaṃ tvannimittamamī hatā |
tasmin gṛhe na bhuñjīta virataḥ prāṇināṃ vadhāt

śyenakādihatā vai[te] śāliyavamudgabhakṣaṇāt |
mātāpitrośca yajñasya kṛte doṣo 'sti nāśnatāṃ

ekaṃ śrīghanamuddiśya māṃsaṃ matsyādikaṃ kṛtaṃ |
anyeṣāṃ śrāmaṇerāṇāṃ tadbhogāya na kalpate

nādeyādijalaṃ jānan nāpi pibet sajantukaṃ |
jantavo 'bhimatāḥ sūkṣmās trasikormikirādayaḥ

vāri[pūtyā]yadhiṣṭheyaḥ karako [hi] sakhallakaḥ |
vighātaparihārārthaṃ kośo 'ntaśaḥ suvāsasaḥ

divyanetrāndhayorneṣṭaṃ jalasya pratyavekṣaṇaṃ |
hastāṃguṣṭhāgrakāvartadarśino na nivāryate

locanavibhramo mā bhūditi paśyenna tacciraṃ |
kalpamātraṃ na vai kuryāt māyāśāṭhayasamanvitaḥ

yenāntareṇa ṣaṣṭayabdaḥ paribhramyate kuñjaraḥ |
śakaṭaṃ vaṃśapūrṇaṃ vā sa kālaḥ salilekṣaṇe

ūrdhvādhomadhyamāstistraḥ salilasyāpi bhūmayaḥ |
yāyā bhūḥ śuddhimāyāti kāryaṃ kuryāttayā[yatiḥ]

yatrādhaḥ prāṇakā yānti sthūlāḥ karatalāhatāḥ |
[grāhyaṃ] tadudakaṃ [srāvyaṃ] paṃcāṃgulikayā na cet

bhaveyurudake yasmin kare lagnā[śca] prāṇinaḥ |
na tatra pāṇipādāsyavastrādi kṣālayedyatiḥ

kule gatena praṣṭavyaṃ jalaṃ [hi] srāvitaṃ na vā |
neti cet saṃjñiko vācyaḥ srāvayetyitaro na tu

[kintu] srāvyaṃ jalaṃ pātre kṛtvātmīye sajantukaṃ |
[pṛṣṭvā] yastadānītaṃ muñcet tatraiva [sa] svayaṃ

saptāhaṃ vā[tathā] yatra pānīyamavatiṣṭhati |
vihāre vā kaṭāhādau sthāpayet tadaśuṣyati

pravṛṣṭe vā [yatir] deve svacchanīraughavāhini |
nimnagānāṃ patiṃ pātaṃ gacchateti visarjayet

sudīrghatalikāvaktrarajjudvayā[va]baddhayā |
ghaṭikayodakaṃ muñcedadhastādudake 'dhvagaḥ

ghaṭikātritayaṃ vīkṣya mārgageṇodapānataḥ |
pariśuddhāścet peyaṃ jalaṃ tat srāvyamanyathā

na rajjughaṭikādānaṃ śastaṃ saprāṇake jale |
pibeti vaktuṃ dātuṃ vā na jātu kṣamate yatiḥ

sajantukaṃ taḍāgādi na pareṣāmuccairvadet |
[kṛtyaṃ] kuru samīkṣyeti pṛṣṭaḥ prativadetparān

upādhyāye 'pi vaktavyaṃ saprāṇakamidaṃ na vā |
taḍāgādīti [vai] śāṭhayaṃ karttavyaṃ [yatinā] na [tu]

vṛkṣaseko na dātavyo 'pariśuddhena vāriṇā |
upādhyāyādikasnānaṃ karttavyaṃ ca tathaiva na

mastukāñjikasauvīramaṇḍadaṇḍāhatādikaṃ |
na pibet na yatirdadyāt parasmai na bhuvi tyajet

samatkuṇaṃ yacchayanamātape tanna śoṣayet |
na hime kardame vā[pi] śītoṣṇavāriṇi kṣipet

navakarma sa no kuryāt sajantukena [vāriṇā] |
dināntaṃ srāvayitvā tad dhāryaṃ [trikoṇa]khallakaṃ

bhṛtakaṃ śikṣayedevaṃ vadhāna tvaṃ trikoṇakaṃ |
kapāt[tat] srāvayotkṣipya khallakaṃ ca vimocaya

trikoṇasaptakenāmbhaḥ srāvyaṃ khallakena tat |
[pratikūpyatha] kāryā[vā] tyaktvā deśāntaraṃ [vrajet]

abhūtvā sambhavantyete bhūtvā yānti bhavāntaraṃ |
navakarma tadā kārya yathoktavidhikāriṇā

satpaṭābaddhamañcāderucchīdaccaturāṃgulāt |
nadyādau jalamālokya kāryaṃ ca navakarmaṇi

chidrakarṇadvayāsaktasūtrabaddhadvidaṇḍakaṃ |
dhāraṇapātrakaṃ dadhyāt khallakasya bahir[yatiḥ]

kṛpāparītacittena svādu vāri sajantukaṃ |
kṣāre 'mbhasi na moktavyamanāpat mṛṣṭasaṃjñinaḥ