Skandapurāṇa: Revākhaṇḍa (revised text) · Chapter 99

iti śrīskandapurāṇe revākhaṇḍe gopāleśvaramahimānuvarṇano nāmāṣṭanavatitamo 'dhyāyaḥ ||
RKS adhyāya 99
mārkaṇḍeya uvāca:
narmadāyottare kūle tīrthaṃ paramaśobhanam /
sarvapāpaharaṃ puṇyaṃ nāmnā vai gautameśvaram

sthāpitaṃ gautamenaiva lokānāṃ hitakāmyayā /
svargasopānarūpeṇa tīrthaṃ puṃsāṃ yudhiṣṭhira

gaccha tvaṃ parayā bhaktyā yatra devo jagadguruḥ /
pātakānāṃ vināśāya svargavāsāptaye nṛpa

saukhyasya vardhanaṃ liṅgaṃ jayadaṃ duḥkhanāśanam /
piṇḍadānena caikena kulānāṃ uddharet trayam

yat kiṃcid dīyate bhaktyā svalpaṃ vā yadi vā bahu /
tatsarvaṃ śatasāhasram ājñayā gautamasya ca

tīrthānāṃ paramaṃ tīrthaṃ svayaṃ rudreṇa bhāṣitam /
mārkaṇḍeya uvāca:
dakṣiṇe narmadākūle tīrthaṃ paramaśobhanam

śaṅkhacūḍeśvaraṃ tatra prasiddhaṃ bhūmimaṇḍale /
śaṅkhacūḍeśvaras tatra saṃsthitaḥ pāṇḍunandana

vainateyabhayāt pārtha saṃsthito narmadātaṭe /
tatra tīrthe tu yo bhaktyā śucir bhūtvā samāhitaḥ

snāpayec chaṅkhacūḍaṃ tu kṣaudreṇa dadhisarpiṣā /
rātrau jāgaraṇaṃ kṛtvā devasyāgre narādhipa

dadhibhaktena sampūjya brāhmaṇān chaṃsitavratān /
godānaṃ ca tathā deyaṃ sarvapāpakṣayaṃ karam

tasmiṃs tīrthe tu yaḥ pārtha sarpadaṣṭo 'pi naśyati /
so 'pi yāti paraṃ lokaṃ śaṅkhacūḍasya cājñayā