Skandapurāṇa: Revākhaṇḍa (revised text) · Chapter 98

iti śrīskandapurāṇe revākhaṇḍe maṇināgatīrthavarṇano nāma saptanavatitamo 'dhyāyaḥ ||
RKS adhyāya 98
mārkaṇḍeya uvāca:
dakṣiṇe narmadātīre tīrthaṃ paramaśobhanam /
sarvapāpaharaṃ puṇyaṃ gopāleśvaram uttamam

godehān niḥsṛtaṃ liṅgaṃ puṇyaṃ bhūmitale nṛpa /
yudhiṣṭhira uvāca:
godehāt niḥsṛtaṃ kasmāl liṅgaṃ pāpakṣayaṃ karam

dakṣiṇe narmadā tīre maṇināgasamīpataḥ /
saṃkṣepāt kathyatāṃ vipra gopāleśvaram uttamam

mārkaṇḍeya uvāca:
kāmadhenus tapas tatra putrārthaṃ ca cakāra ha /
dhyāyatī parayā bhaktyā devadevaṃ maheśvaram

tuṣṭas tasyā jagannāthaḥ kapilāyā maheśvaraḥ /
niḥsṛto dehamadhyāt tu akṣayaḥ parameśvaraḥ

maheśvara uvāca:
tuṣṭo devi jaganmātaḥ kapile parameśvari /
ārādhanaṃ kṛtaṃ kasmād vada devi varānane

surabhir uvāca:
lokānām upakārāya sṛṣṭāhaṃ parameṣṭhinā /
loke kāryaṃ hi sarvaṃ vai matprasādāt prasidhyati

lokāḥ sarve prapaśyanti tvatpasādāt triśūlinam /
tīrthe tvaṃ bhava bhoḥ śambho lokānāṃ hitakāmyayā

mārkaṇḍeya uvāca:
tadā prabhṛtitattīrthaṃ vikhyātaṃ vasudhātale /
snānenaikena rājendra sarvapāpaṃ vyapohati

gopāleśe tu godānaṃ yas tu bhaktyā pradāpayet /
yogye dvijottame deyā yogyā dhenuḥ sakāñcanī

savastrā taruṇī śubhrā kṣīriṇī vṛṣasaṃyutā /
kṛṣṇapakṣe caturdaśyām aṣṭamyāṃ vā yudhiṣṭhira

sarveṣu caiva māseṣu kārttike ca viśeṣataḥ /
dāpayet parayā bhaktyā dvije svādhyāyatatpare

vidhinā ca pradāsyanti vidhinā pratigṛhṇate /
ubhayoḥ puṇyakarmāṇi prekṣakāḥ puṇyabhājanāḥ

piṇḍadānaṃ prakartavyaṃ pretānāṃ bhāvasaṃyutaiḥ /
piṇḍenaikena rājendra pretā yānti parāṃ gatim

bhaktyā praṇāmaṃ rudrasya ye kurvanti dine dine /
teṣāṃ pāpaṃ pralīyeta bhinnapātre jalaṃ yathā

tasmiṃs tīrthe tu yo rājan vṛṣaṃ caiva samutsṛjet /
yudhiṣṭhira uvāca:
vṛṣotsarge kṛte tāta yatphalaṃ bhavate nṛṇām

tatsarvaṃ kathayasvādya prayatnena dvijottama /
mārkaṇḍeya uvāca:
sarvalakṣaṇasampanne vṛṣe caiva tu yatphalam

tad ahaṃ sampravakṣyāmi śṛṇu tvaṃ dharmanandana /
kārttike caiva vaiśākhe paurṇamāsyāṃ narādhipa

rudrasya sannidhau bhūtvā śuciḥ snātvā jitendriyaḥ /
vṛṣotsargaṃ tathā rājan kārayed dharaprītaye

sthāne sthitvā pavitre tu catasro vatsikāḥ śubhāḥ /
vṛṣabhāya ca muñceta sarvalakṣaṇasaṃyutāḥ

prīyatāṃ ca mahādevo brahmāviṣṇus tathā pare /
vṛṣabhe romasaṃkhyā tu sarvāṅgeṣu narādhipa

tāvad varṣapramāṇaṃ tu śivaloke mahīyate /
śivaloke uṣitvā tu paścān martye ca jāyate

kule mahati sambhūto dhanadhānyasamākule /
surūpe rūpavāṃś caiva vidyāḍhye satyavādinām

gopāleśvarakaṃ puṇyaṃ mayākhyātaṃ yudhiṣṭhira /
godehāt niḥsṛtaṃ liṅgaṃ narmadādakṣiṇe taṭe