Skandapurāṇa: Revākhaṇḍa (revised text) · Chapter 100

iti śrīskandapurāṇe revākhaṇḍe śaṅkhacūḍatīrthamahimānuvarṇano nāma navanavatitamo 'dhyāyaḥ ||
RKS adhyāya 100
mārkaṇḍeya uvāca:
tato gacchet tu rājendra parāśaravarottamam /
parāśaro mahātmā ca narmadāyās taṭe śubhe

tapaś cacāra vipulaṃ putrārthaṃ pāṇḍunandana /
himācalasutā gaurī lakṣmīnārāyaṇānvitā

toṣitā parayā bhaktyā narmadāyottare taṭe /
parāśareṇa ṛṣiṇā tasya tuṣṭā varaṃ dadau

devy uvāca:
bho bho ṛṣivaraśreṣṭha tuṣṭāhaṃ tava bhaktitaḥ /
varaṃ yācasva viprendra parāśaramahāmate

parāśara uvāca:
yadi tuṣṭāsi me devi yadi deyo varo mama /
putro me dīyatāṃ śīghraṃ sarvaśāstraviśāradaḥ

tīrthaṃ cātra bhaved devi sannidhānaṃ vareṇa tu /
lokopakārahetv arthaṃ sthīyatāṃ girinandini

parāśarābhidhānena narmadādakṣiṇe taṭe /
parāśaravacaḥ śrutvā devī himavataḥ sutā

evaṃ bhavatu te vipra ityuktvāntaradhīyata /
parāśaro mahātmā ca sthāpayāmāsa pārvatīm

śaṅkaraṃ sthāpayāmāsa surāsuranamaskṛtam /
arcitaṃ sarvadevānāṃ dānavānāṃ durāsadam

parāśaro mahātmā ca kṛtārtho vigatajvaraḥ /
tasmiṃs tīrthe tu yo bhaktyā śuciḥ prayatamānasaḥ

māse caitre ca vikhyāte śrāvaṇe nṛpanandana /
māsi mārgaśire caiva śuklapakṣe tu sarvadā

śaṅkaraṃ pāṇḍavaśreṣṭha girijāṃ pūjayet tathā /
aṣṭamyāṃ ca caturdaśyāṃ sūryaparvaṇi sarvadā

striyo vā puruṣā vāpi kāmakrodhavivarjitāḥ /
tatra gatvā śūcau sthāne narmadādakṣiṇe taṭe

upoṣya parayā bhaktyā vrataṃ kuryur mahāmune /
rātrau jāgaraṇaṃ kṛtvā dīpadānaṃ svaśaktitaḥ

sapatnīkānuttamāṃś ca śīlaśraddhāsamanvitān /
pūjayed brāhmaṇān pārtha annadānahiraṇmayaiḥ

vastreṇa cchatradānena śayyā tāmbūlabhojanaiḥ /
śrāddhaṃ kāryaṃ nṛpaśreṣṭha āmaśrāddhaṃ praśasyate

āmaṃ caturguṇaṃ proktaṃ brāhmaṇānāṃ yudhiṣṭhira /
vedoktena vidhānena dvijāḥ pūjyāḥ prayatnataḥ

hastamātrakuśaiś caiva tilaiś ca vāñcchitair nṛpa /
vipraṃ codaṅmukhaṃ caiva ātmānaṃ dakṣiṇāmukham

āmaṃ darbheṣu niḥkṣipya ityuccārya dvijāgrataḥ /
pretā yāntu paraṃ lokaṃ tīrthasyāsya prabhāvataḥ

pāpaṃ me praśamaṃ yātu yātu vṛddhiḥ sadā śubham /
vṛddhiṃ yātu sadā vaṃśo jñātivargo dvijottama

evam uccārya viprendraṃ deyaṃ parāśarāśrame /
gobhūnīlahiraṇyāni annaṃ vastraṃ ca śaktitaḥ

dātavyaṃ pāṇḍavaśreṣṭha parāśaravarāśrame /
yaḥ śṛṇoti naro bhaktyā so 'pi pāpaiḥ pramucyate